AITU - قازاقستانداعى سيفرلىق ەگەمەندىك پەن قاۋىپسىز بايلانىس قۇرالى

استانا. KAZINFORM - قازاقستاندىق سيفرلىق نارىقتاعى مەسسەندجەرلەر باسەكەسى ءداستۇرلى شەتەلدىك كوشباسشىلاردىڭ ىقپالىمەن عانا ەمەس، سونىمەن بىرگە جەرگىلىكتى IT ونىمدەردىڭ دامۋى ارقىلى دا ەرەكشەلەنىپ جاتىر.

سولاردىڭ ءبىرى - AITU مەسسەندجەرى. جوبا قازاقستاننىڭ سيفرلىق ەگەمەندىگىن نىعايتۋعا جانە ىشكى نارىقتا جاڭا ەكوجۇيە قالىپتاستىرۋعا باعىتتالعان. وسى ورايدا Kazinform ءتىلشىسى ماسەلەنى جان-جاقتى تالداپ كورۋگە تىرىستى.

قاراپايىم مەسسەندجەردەن سيفرلىق ەكوجۇيەگە دەيىن

جوبا - «BTS Digital» كومپانياسىنىڭ باستاماسى. ەڭ ماڭىزدىسى، جوبا مەملەكەتتىك بيۋدجەت ەسەبىنەن ەمەس، جەكە ينۆەستيتسيا ارقىلى جۇزەگە اسىرىلىپ وتىر. بۇل وتاندىق IT كومپانيالاردىڭ الەۋەتى مەن جاۋاپكەرشىلىگىن كورسەتەدى.

باستاپقىدا قاراپايىم مەسسەندجەر رەتىندە ىسكە قوسىلعان AITU بۇگىندە امبەباپ سۋپەرقوسىمشا رەتىندە دامىپ كەلەدى.

«BTS Digital» ج ش س باس اتقارۋشى ديرەكتورى نۇرتاي ابىلعاليەۆتىڭ سوزىنشە، قوسىمشانى دايىنداۋداعى باستى ماقسات - قازاقستاندىق پايدالانۋشىعا حالىقارالىق انالوگتەردەن كەم تۇسپەيتىن، ءبىراق جەرگىلىكتى قاجەتتىلىكتەرگە بەيىمدەلگەن امبەباپ ءونىم ۇسىنۋ.

- ءبىزدىڭ نەگىزگى موتيۆىمىز - الەمدىك دەڭگەيدەگى وتاندىق سيفرلىق ءونىم جاساۋ. AITU تەك مەسسەندجەر عانا ەمەس، SuperApp-قا اينالدى: تولەمدەر مەن اۋدارىمدار، كينو مەن مۋزىكا سەرۆيستەرى، كونتەنت-لەنتا، بيزنەسكە ارنالعان قۇرالدار - ءبارى ءبىر جەردە. ءبىز پايدالانۋشىعا شەتەلدىك سەرۆيستەردە جوق مۇمكىندىكتەردى بەرەمىز، - دەدى نۇرتاي ابىلعاليەۆ.

سونىمەن قاتار ول كومپانيا قىزمەتكەرلەرىنىڭ ەڭ كوپ تالقىلاعان ماسەلەلەردىڭ ءبىرى - چات-بوتتار مەن جاساندى ينتەللەكت اسسيستەنتتەرى اراسىنداعى تاڭداۋ بولعانىن اتاپ ءوتتى.

- چات- بوتتار قاراپايىم ءارى ۇيرەنشىكتى، ءبىراق ولاردىڭ مۇمكىندىكتەرى شەكتەۋلى. ال ج ي- اسسيستەنتتەر پايدالانۋشىعا يكەمدى، جەكە كومەك كورسەتەدى. ءبىز تۇپكىلىكتى تاڭداۋىمىزدى جاساندى ينتەللەكتىگە ارتىقشىلىق بەرۋ كەرەك دەپ شەشتىك، ويتكەنى ول پلاتفورمانى اقىلدى ءارى دەربەس ەتەدى، - دەدى ديرەكتور.

جوبا جەتەكشىسى نۇرتاي ابىلعاليەۆتىڭ ايتۋىنشا، AITU ارحيتەكتۋراسى app-پلاتفورما مودەلىنە نەگىزدەلگەن. وسى ءتاسىل ارقىلى كۇردەلى جاڭارتۋسىز جاڭا سەرۆيستەردى وڭاي ەنگىزۋگە بولادى. سونىمەن قاتار بيزنەس وكىلدەرى ءوز قىزمەتتەرىن ميني- قوسىمشا رەتىندە قولدانبا ىشىنە ورنالاستىرىپ، پايدالانۋشىلارعا قولجەتىمدى ەتە الادى.

كومپانيا وكىلدەرىنىڭ ايتۋىنشا، مەسسەندجەرلەر ەندى تەك بايلانىس قۇرالى بولىپ قالمايدى.

- ءبىز مەسسەندجەرلەردىڭ بولاشاعىن سيفرلىق ورتالىق رەتىندە كورەمىز. پايدالانۋشىلار وندا تەك سويلەسپەيدى، سونىمەن قاتار تولەم جاسايدى، قىزمەت الادى، كۇندەلىكتى ىستەرىن شەشەدى. ءبىزدىڭ ماقساتىمىز - AITU- دى ادام ومىرىندەگى تولىققاندى سيفرلىق كومەكشىگە اينالدىرۋ، - دەدى جوبا جەتەكشىسى.

قازاقستان تاجىريبەسى: AITU مەسسەندجەرى

وسى جاھاندىق ۇدەرىستەر اياسىندا قازاقستان پرەزيدەنتى قاسىم-جومارت توقايەۆ جاساندى ينتەللەكتىنى دامىتۋ ماسەلەلەرى جونىندەگى كەڭەستە مەملەكەتتىك قىزمەتشىلەردىڭ قىزمەتتىك بايلانىسىن AITU ۇلتتىق مەسسەندجەرىنە كوشىرۋ باستاماسىن جاريالاعان بولاتىن.

سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگىنىڭ مالىمەتىنشە، مەسسەندجەر مەملەكەتتىك قىزمەتكەرلەر ءۇشىن قىزمەتتىك حات-حابار الماسۋعا ارنالعان ارنايى قورعالعان ارنا رەتىندە قاراستىرىلادى. باستاما مەملەكەتتىك سەكتوردا ءبىرىڭعاي قاۋىپسىز بايلانىس پلاتفورماسىن قۇرۋعا جانە اقپاراتتىق تاۋەكەلدەردى ازايتۋعا باعىتتالعان.

سونداي- اق مينيسترلىك Kazinform اگەنتتىگىنىڭ رەسمي سۇراۋحاتىنا بەرگەن جاۋابىندا AITU مەسسەندجەرىنىڭ نەگىزگى ارتىقشىلىعىن اتادى: ونىڭ بارلىق سەرۆەرى قازاقستان اۋماعىندا ورنالاسقان. بۇل - دەرەكتەردى قورعاۋ تالاپتارىنا تولىقتاي سايكەس كەلەدى جانە جۇيەنى مەملەكەتتىك ورگاندار ءۇشىن اناعۇرلىم سەنىمدى ەتەدى دەلىنگەن.

وعان قوسا، AITU ارقىلى بۇقارالىق اقپارات قۇرالدارى (ب ا ق) جاڭالىقتار تاراتىپ، وقىرماندارمەن تىكەلەي بايلانىس ورناتا الادى. مەملەكەتتىك قۇرىلىمدار جاڭالىقتار مەن رەسمي اقپاراتتى جاريالاۋ ءۇشىن قوسىمشا پلاتفورما رەتىندە پايدالاناتىن بولادى. بۇدان بولەك قولدانىستاعى رەسمي سايتتار مەن الەۋمەتتىك جەلىلەردەگى پاراقشالاردى تولىقتىراتىن قۇرال رەتىندە قاراستىرۋعا مۇمكىندىك بار.

- AITU ازاماتتاردىڭ جەكە ومىرىنە ارالاسپايدى جانە شەتەلدىك مەسسەندجەرلەردى الماستىرۋدى كوزدەمەيدى. قوسىمشا تەك مەملەكەتتىك سەكتورداعى قىزمەتتىك كوممۋنيكاتسيانى جۇرگىزۋگە ارنالعان، قورعالعان بايلانىس ارناسىن قامتاماسىز ەتۋگە باعىتتالعان، - دەلىنگەن رەسمي جاۋاپتا.

مينيسترلىكتىڭ تۇسىندىرۋىنشە، اتالعان قوسىمشا تەك مەملەكەتتىك جانە كۆازيمەملەكەتتىك سەكتور ءۇشىن ەنگىزىلەدى. جەكە ازاماتتاردىڭ WhatsApp ،Telegram سىندى شەتەلدىك مەسسەندجەرلەردى قولدانۋىنا شەكتەۋ قويىلمايدى. سونىمەن قاتار AITU ،eGov ،eGov Business جانە eOtinish پلاتفورمالارى ءۇشىن نولدىك تاريفيكاتسيا ەنگىزۋ دە قاراستىرىلىپ جاتىر. بۇل - مەملەكەتتىك قىزمەتتەرگە قولجەتىمدىلىكتى قامتاماسىز ەتۋگە باعىتتالعان ماڭىزدى قادام.

اقپاراتتىق قاۋىپسىزدىك تەحنولوگيالارى جونىندەگى ساراپشى الەكساندر بايتوۆ مەملەكەتتىك ورگاندارعا ارنالعان جاڭا مەسسەندجەرگە كيبەرشابۋىلدار قاۋپى جايىندا پىكىر ءبىلدىردى. ونىڭ ايتۋىنشا، بۇگىندە كيبەرقىلمىسكەرلەر مەسسەندجەرلەرگە قاتىستى ءبىرقاتار ءتاسىلدى قولدانىپ ءجۇر.

- قازىرگى ۋاقىتتا مەسسەندجەردى بۇزۋ ارەكەتى، اككاۋنتتاردى باقىلاۋعا الۋ نەمەسە ولاردى يەلەرىنەن ساتىپ الۋعا تالپىنۋ جاعدايلارى كوپ. مۇنداي قادامدار ارقىلى قىلمىسكەرلەر جۇيەگە ەنىپ، جالعان اقپارات تاراتىپ، فيشينگتىك سىلتەمەلەر ارقىلى الاياقتىق ارەكەتتەر جاساي الادى. اتالعان ادىستەردى ءبىز قازىردىڭ وزىندە Telegram مەن WhatsApp سەكىلدى پلاتفورمالاردا كورىپ وتىرمىز، ياعني قىلمىسكەرلەر قاراپايىم پايدالانۋشىنىڭ اككاۋنتىن يەمدەنىپ، ونىڭ اتىنان بايلانىسقا شىعىپ، دەرەكتەرگە قول جەتكىزۋدى كوزدەيدى، - دەدى ساراپشى.

بايتوۆتىڭ ايتۋىنشا، بۇنداي جاعدايدا تاۋەكەل ودان دا جوعارى بولۋى مۇمكىن، سەبەبى جاڭا مەسسەندجەر مەملەكەتتىك قىزمەتكەرلەرگە باعىتتالعان.

- ەگەر اككاۋنتتاردىڭ بىرىنە قول جەتكىزىلسە، قۇپيا دەرەكتەرگە قول سۇعۋ قاۋپى تۋىندايدى. سوندىقتان ماسەلەگە جەڭىل قاراۋعا بولمايدى. ارينە، ازىرلەۋشى كومپانيا تاراپىنان دا، مەملەكەت تاراپىنان دا قاۋىپسىزدىك دەڭگەيى كۇشەيتىلگەن. الايدا الەمدە 100 پايىز قورعالعان جۇيە جوق. بۇل - ەستە ۇستايتىن ماڭىزدى جايت. دەمەك، كيبەرقىلمىسكەرلەر مەن ءتىپتى باسقا ەلدەردىڭ كيبەرتوبى دا جۇيەگە قىزىعۋشىلىق تانىتىپ، قول جەتكىزۋگە ارەكەت جاساۋى ابدەن مۇمكىن، - دەپ تۇيىندەدى مامان.

حالىقارالىق تاجىريبە: اقپاراتتىق قاۋىپسىزدىك جانە ۇلتتىق مەسسەندجەرلەر

الەم ەلدەرىنىڭ كوپشىلىگى مەملەكەتتىك قۇرىلىمدارداعى اقپارات الماسۋدىڭ قاۋىپسىزدىگىن ارتتىرۋ ماقساتىندا ۇلتتىق مەسسەندجەرلەر مەن جابىق سيفرلىق ەكوجۇيەلەردى دامىتىپ جاتىر. اتاپ ايتار بولساق، رەسەيدىڭ نەگىزگى ۇلتتىق مەسسەندجەرى رەتىندە Max قوسىمشاسى تاڭدالعان بولاتىن. بۇل مەسسەندجەر بارلىق سمارتفوندارعا الدىن الا ورناتىلۋى مىندەتتى ەتىپ بەكىتىلگەن. Max ءوز پوزيتسياسىن تەك بايلانىس قۇرالى ەمەس، سونىمەن قاتار امبەباپ سيفرلىق پلاتفورما رەتىندە ۇستانادى. ول قىتايدىڭ WeChat قوسىمشاسىنا ۇقساس، ياعني ازاماتتارعا تەك حابار الماسۋ مۇمكىندىگىن عانا ەمەس، سونداي- اق مەملەكەتتىك قىزمەتتەرگە قول جەتكىزۋ، جەكە باسىن راستاۋ جانە تولەم جاساۋ سياقتى فۋنكسيالارىن ۇسىنا الادى.

ەۋروپا ەلدەرى دە دەرەكتەر قاۋىپسىزدىگىنە باسىمدىق بەرىپ وتىر. ماسەلەن، گەرمانيا مەن فرانسيادا مەملەكەتتىك قىزمەتشىلەر ءۇشىن ارنايى ازىرلەنگەن Matrix جانە Tchap سەكىلدى مەسسەندجەرلەر قولدانىلادى. وسى شەشىمدەر ەۋرووداقتىڭ جالپى دەرەكتەردى قورعاۋ رەگلامەنتىنە سايكەس كەلەدى جانە ۇلتتىق قاۋىپسىزدىك ستاندارتتارىنا جاۋاپ بەرەدى.

اتالعان تاجىريبەلەر ءبىر ورتاق فاكتىنى كورسەتەدى: مەملەكەتتىك باسقارۋدا قاۋىپسىز، سەنىمدى جانە باقىلاۋعا بولاتىن كوممۋنيكاتسيا ارنالارى ۇلتتىق قاۋىپسىزدىكتىڭ اجىراماس بولىگىنە اينالدى.

وسىلايشا، جاھاندىق سيفرلىق باسەكەلەستىك كۇشەيىپ تۇرعان قازىرگى زاماندا، قاۋىپسىز جانە دەربەس بايلانىس قۇرالدارىن دامىتۋ - ءار مەملەكەتتىڭ ستراتەگيالىق ماقساتىنا اينالدى دەۋگە بولادى.

بۇعان دەيىن ۇلتتىق مەسسەندجەردىڭ جاڭا مۇمكىندىكتەرىن جازعانبىز.

اۆتور

تاستان تويانوۆ