سوڭعى ۇكىم: احمەت بايتۇرسىن ۇلى تۋرالى جاڭا فيلم جارىققا شىقتى
استانا. KAZINFORM - استانادا «سوڭعى ۇكىم» فيلمىنىڭ الدىن الا جابىق كورسەتىلىمى ءوتتى. بۇل - قازاقتىڭ كورنەكتى اعارتۋشىسى، قوعام قايراتكەرى احمەت بايتۇرسىن ۇلى جايلى تۋىندى.
فيلمنىڭ سيۋجەتى احمەت بايتۇرسىن ۇلىنىڭ ءومىربايانىنا نەگىزدەلگەن. تاريحي درامانى مادەنيەت جانە اقپارات مينيسترلىگىنىڭ تاپسىرىسىمەن، ۇلتتىق كينونى قولداۋ مەملەكەتتىك ورتالىعىنىڭ قولداۋىمەن Folklore media ستۋدياسى تۇسىرگەن.
جابىق كورسەتىلىمگە قاتىسقان مادەنيەت جانە اقپارات ءمينيسترى ايدا بالايەۆا فيلمدى تۇسىرگەن بەلگىلى قالامگەر، رەجيسسەر، پروديۋسەر، قازاق تەلەۆيزياسىنا دا ەلەۋلى ۇلەس قوسقان عالىم دوسكەن باستاعان توپقا العىس ايتتى.
كوركەم فيلمدى تۇسىرۋگە ەكى جىلدان استام ۋاقىت كەتكەن.
«ەستەلىكتەرىنىڭ وزىندە قايشى تۇستار كەزدەسەدى. ونىڭ ءوزى قانشالىقتى راس ەكەنىن تەكسەرىپ الۋ كەرەك. سوندىقتان ءبىز بارىنشا سول كەزدەگى جاعدايعا، سول كەزدەگى شىندىققا، سول كەزدەگى ساياسي جاعدايعا وسى فيلم جاۋاپ بەرە الا ما، جوق پا دەگەنگە باسىمدىق بەردىك»، - دەيدى كينو پروديۋسەرى.
فيلمدە رەسەي يمپەرياسى مەن ەۋروپانىڭ ايتۋلى ۋنيۆەرسيتەتتەرىن ءتامامداعان ءبىلىمپاز قازاق زيالىلارىنىڭ العاشقى تولقىنى ۇستاز دەپ مويىنداعان باستاۋىش سىنىپ مۇعالىمىنىڭ ءومىر جولى تۋرالى باياندالادى.
فيلمدە احمەت بايتۇرسىن ۇلىنىڭ قازاق ءتىل ءبىلىمىنىڭ نەگىزىن سالىپ، XX عاسىردىڭ باس شەنىندەگى ءىرى تۇركولوگ عالىمدار ونى قالاي تەڭ تۇتقانى كورسەتىلەدى. سونداي-اق بۇل فيلم ءولىم ءتانىن السا دا، ءبىراق ءوزىن ەشقاشان جوعالتپاي، ىستەگەن بارلىق ىستەرى كەلەر ۇرپاقتىڭ يگىلىگىنە اينالادى دەپ سەنگەن احمەتتىڭ ءومىرىنىڭ سوڭعى ساتتەرىنەن سىر شەرتەدى. فيلم الماتى، سەمەي قالالارى مەن اباي، الماتى، جەتىسۋ وبلىستارىنىڭ جەرىندە ءتۇسىرىلدى.
ايتا كەتەيىك، فيلمدە باستى ءرولدى، ياعني احمەتتى قازاقستاننىڭ ەڭبەك سىڭىرگەن قايراتكەرى ازامات ساتىبالدى سومدادى. سونداي- اق كارتيناعا داريا الەكساندروۆا، ەركەبۇلان دايىروۆ، ايدار ناۋرىزبايەۆ تۇسكەن. تۋىندى 23-مامىردان باستاپ ەل كينوتەاترلارىنا جول تارتادى.
