الەمدە 50 ميلليونعا جۋىق اڭشى بار
استانا. قازاقپارات - قىس قاھارىن توگىپ، قاۋىپ-قاتەردى كۇشەيتكەنمەن، بۇل اڭشىلاردىڭ ولجاعا كەنەلىپ، قانجىعاسىن مايلايتىن كەزەڭ. الەمدە 50 ميلليونعا جۋىق اڭشى بار ەكەن.
ۇل - ليتسەنزياسى بار اڭ-قۇس اۋلاۋشىلار. كوبى - امەريكالىقتار. Hunting Statistics وسىلاي دەيدى. قازىر ءبىراز ەلدە اڭشىلىق ماۋسىم اشىق بولعانىمەن، رۇقسات ەتىلگەن جىرتقىش تۇرىنە قاراي ول وزگەرىپ وتىرادى.
اڭشىلىققا قاتىستى الەمدە قانداي جاڭالىقتار بار؟
الەمنىڭ كەي ەلدەرىندە اڭ اۋلاۋ كاسىپ قانا ەمەس، ەجەلگى ءداستۇر. لاندشافتتى ايماق وڭتۇستىك افريكادا اڭشى كوپ. مۇندا سافاري تۋريزمى جاقسى دامىعان. وزگە ولكەدە جوق اڭ-قۇس اتاۋلىنىڭ 50-دەن استام ءتۇرى وسىندا بار. قاپتاعان قولتىراۋىنىمەن تانىمال موزامبيك وسى قۇرلىقتا. مۇندا اڭ اۋلاۋ ماۋسىمى مامىردان قىركۇيەككە دەيىن جالعاسادى. ال تروپيكالىق ايماق تانزانيا اڭشىلىق كاسىپ دامىعان ۇزدىك ۇشتىكتى قورىتىندىلايدى. بۇل ولكە كوپ كەزدەسپەيتىن تروفەي جانۋارلارىمەن جۇرتقا ءمالىم. ەۋروپادا ەجەلدەن اڭ اۋلايدى. مۇندا جىرتقىش اتاۋلى قارا قۇرلىقتاعىداي الۋان ءتۇرلى بولماعانمەن قابان، ايۋ، قىرعاۋىل مەن ۇيرەك كوپ.
ماجارستاندا قابان مەن مۋفلوندى جىل بويى اتۋعا بولادى. بودەنە مەن قىرعاۋىل، قاز- ۇيرەكتى سەربيادان دا ءجيى كەزدەستىرەسىز. اڭشىلىققا قولايلى تاعى ءبىر ايماق - كانادا. بۇل جەر جابايى تابيعاتى مەن جانۋاردىڭ الۋان تۇرىنە باي.
تاقاۋدا ناميبيا ۇكىمەتى 700-دەن استام جانۋاردى اۋلاۋعا رۇقسات ەتتى. ونىڭ ىشىندە ءپىل، زەبرا، بۋيۆول، يمپالا جانە بەگەموت بار. ۇكىمەت بۇل شەشىمنىڭ سەبەبىن قۋاڭشىلىقپەن بايلانىستىرادى. ياعني، ەگىن شىقپاي، حالىققا اشتىق قاۋپى تونگەن. كەيىنگى دەرەككە سۇيەنسەك، ناميبيا جۇرتىنىڭ جارتىسىنان كوبى، ياعني 1,4 ميلليون ادام اس-سۋعا مۇقتاج. قازىردىڭ وزىندە 83 ءپىل اۋلانىپ، مۇقتاجدارعا تاراتىلدى.
بۇل قادامدى قۋاڭشىلىق جايلاعان زيمبابۆە بيلىگى دە قولعا الدى. ولار اشتىقتان زارداپ شەككەن تۇرعىنداردى تاماقتاندىرۋ ءۇشىن 200 ءپىلدى اتۋدى جوسپارلاپ وتىر. ەگەر ءونىم ازدىق ەتسە، بۇل سان الدە دە ءوسۋى مۇمكىن. ايتا كەتەيىن، زيمبابۆەنى 80 مىڭنان استام ءپىل مەكەندەيدى.
يسلانديادا كيت اۋلاۋعا رۇقسات ەتىلدى
ال يسلانديا 2029 -جىلعا دەيىن كيت اۋلاۋعا رۇقسات ەتتى. اڭشىلار ماۋسىم-قىركۇيەك ايلارىندا 400-دەن استام سۇتقورەكتىنى سويىسقا جىبەرۋى مۇمكىن. ءبىراق بيلىكتىڭ باستاماسى جانۋارلار قۇقىعىن قورعاۋشىلار تاراپىنان داۋعا ۇشىرادى. ولاردىڭ سوزىنشە، بۇل اڭ-قۇستى قورعاۋ زاڭىنا قاراما- قايشى. دەگەنمەن، ۇكىمەت ءوز دەگەنىنەن تانباي وتىر. ايتا كەتەيىك، الەم بويىنشا تەك يسلانديا، نورۆەگيا جانە جاپونيادا كيت اۋلاۋعا رۇقسات ەتىلەدى.
ە و قاسقىرلاردى قورعاۋ مارتەبەسىن اۋىستىردى
كەيىنگى ون جىلدىقتا ەۋروپادا قاسقىر پوپۋلياتسياسى ەكى ەسە ۇلعايدى. ونىڭ سيرەك كەزدەسەتىن ءتۇرى دە كوبەيگەن. 2016 -جىلى بار بولعانى 14300 قاسقىر تىركەلسە، كورسەتكىش 7 جىلدا 6 مىڭعا وسكەن. سول سەبەپتى ەۋرو وداق جىرتقىشتى «قاتاڭ قورعالاتىن» مارتەبەدەن «قورعالاتىن» مارتەبەگە اۋىستىردى. بۇل كەلەر جىلدىڭ ناۋرىزىنان باستاپ كۇشىنە ەنەدى. ەندى اڭشىلار رۇقسات ەتىلگەن كەزەڭدە قاسقىر اۋلاي الادى. ءبىراق ولارعا رەتسىز شابۋىل جاساپ، ولتىرۋگە بولمايدى. تەك مال-جانعا، ەگىستىك القابىنا ايتارلىقتاي قاۋىپ تونگەندە عانا اتۋعا قۇقىلى.
جىرتقىشتارعا قارسى روبوت قولدانىلا باستادى
ال جاپونيادا حالىقپەن بىرگە اڭشىلار دا قارتايىپ بارادى. مۇنىڭ سوڭى ايۋلار شابۋىلىنىڭ كوبەيۋىنە اكەلدى. بىلتىر ناۋرىزدان وسى جىلدىڭ ناۋرىزىنا دەيىن كۇنشىعىس ەلىندە ءتۇز تاعىسى تاراپىنان 219 شابۋىل جاسالعان. سولاردىڭ التاۋى كىسى ولىمىمەن اياقتالدى.
ال 2020 -جىلعى ستاتيستيكاعا جۇگىنسەك، مۇندا اڭ- قۇس اتۋعا رۇقساتى بار اڭشىلاردىڭ 60 پايىزى الپىستى القىمداعان. بيلىك قاريالاردىڭ ايۋمەن الىسپاق بىلاي تۇرسىن، قارۋ ۇستاۋعا شاماسى جەتە مە دەپ الاڭدايدى. وسى سەبەپتى ولار ماسەلەنى بىلاي شەشۋگە كىرىسكەن. جەرگىلىكتى كومپانيا جاساپ شىعارعان روبوتتى جىرتقىشقا قارسى قولدانا باستادى. بۇل قۇلتەمىر 60 ءتۇرلى دىبىس شىعارادى. ۇليدى، ادامنىڭ دا داۋسىن سالادى. اتىلعان وقتىڭ جاڭعىرىعىن ءبىر شاقىرىمعا دەيىن جەتكىزىپ بەرەدى. جاپون بيلىگى اڭشىلىقتى ۇيرەنەتىن جاستار تابىلماسا، وسىلاي امالداۋعا ءماجبۇر.
