اڭشىلىق بايلاردىڭ ەرمەگى، سوندىقتان اڭ اتۋ باعاسىن كوتەرۋ قاجەت - ءماجىلىس دەپۋتاتى
استانا. KAZINFORM - اڭشىلىق ارزان ويىن-ساۋىق ەمەس، جاۋاپتى تاڭداۋ بولۋى ءتيىس. بۇل تۋرالى ءماجىلىستىڭ جالپى وتىرىسىندا دەپۋتات ەلنۇر بەيسەنبايەۆ ايتتى.
- جانۋارلار الەمىن پايدالانۋعا ارنالعان تولەمدەردىڭ مولشەرىن مىڭ ەسە كوتەرۋ قاجەت دەپ سانايمىن. قاراپايىم مىسال - قويان اۋلاۋ. اڭشىلىقتىڭ قازىرگى قۇنى نە ءبارى 117 تەڭگە. دۇكەندەگى ءبىر بوتەلكە سۋدان دا ارزان. ال بۇل رەتتە وق 500 تەڭگە تۇرادى. مۇنداي جاعداي حالىقتىڭ تابيعاتقا مەنسىنبەي قاراۋىن قالىپتاستىرادى. سونىمەن قاتار بىزگە تاياۋ ەلدەردەن شەتەلدىك تۋريستەر كەلىپ، زاڭدى تۇردە تىيىم سالىنباعان جانۋارلار الەمىن تيىن-تەبەنگە اتادى، - دەدى دەپۋتاتى جاڭا سالىق كودەكسىن تالقىلاۋ بارىسىندا.
وسى ورايدا ول جاعدايدى وزگەرتەتىن ۋاقىت جەتكەندىگىن باسا ايتتى.
- اڭشىلىق ارزان ويىن-ساۋىق ەمەس، جاۋاپتى تاڭداۋ بولۋى ءتيىس. اڭشىلىق - بۇل بايلاردىڭ ەرمەگى. سوندىقتان ۇكىمەتكە بارلىق باعانى قايتا قاراپ، بيۋدجەتكە ءتۇسىمدى ارتتىرۋدى وتىنەمىن. اتالعان كلاستەردى ەليتالى قىزمەت ەلەمەنتتەرىمەن حالىقارالىق دەڭگەيگە دەيىن دامىتۋعا بولادى. مىسالى، افريكادا اڭعا شىعۋ ەلدىڭ جالپى ىشكى ءونىمىنىڭ ايتارلىقتاي بولىگىن تولتىراتىن وتە قىمبات تۋريزم. ماسەلەن، افريكا ارىستان اتۋ 60 مىڭ دوللار تۇرادى، - دەدى ەلنۇر بەيسەنبايەۆ.
ايتا كەتەيىك، بۇگىن پرەمەر-ءمينيستردىڭ ورىنباسارى ءماجىلىستىڭ جالپى وتىرىسىندا سالىق كودەكسىنىڭ جوباسىنداعى سوڭعى وزگەرىستەردى اتادى.
اۆتور
مارلان جيەمباي
