اشتىقتان جۇدەپ، جۇرە الماعان: الماتى وبلىسىندا 6 جاسار بالا اۋرۋحاناعا جەتكىزىلدى

الماتى وبلىسى اۋماعىندا «باقىتتى جانە قاۋىپسىز بالالىق شاق» جوباسى جۇزەگە اسىرىلىپ جاتىر. ءىس-شارانى الماتى وبلىسىنىڭ پروكۋراتۋراسى پوليتسيا دەپارتامەنتىمەن جانە باسقا مۇددەلى ورگاندارىمەن بىرگە قولعا العان، دەپ حابارلايدى Kazinform.

وبلىستىق پروكۋراتۋرا مالىمەتىنشە، جوبا بالالاردىڭ قۇقىعىن قورعاۋعا باعىتتالعان. نەگىزگى ماقسات - زورلىق-زومبىلىق كورۋ قاۋپى بار نەمەسە وعان ۇشىراعان بالالاردى انىقتاۋ.

«موبيلدى توپتار ءبىر ايدا 400-دەن استام وتباسىن تەكسەردى. ونىڭ ىشىندە پوليتسيا جانە پروباتسيا ورگاندارىندا ەسەپتە تۇرعان تۇلعالار، تۇرمىسى قولايسىز، تولىق ەمەس جانە تابىسى از وتباسىلار، سونداي- اق بالالار وگەي اكەلەرىمەن تۇراتىن وتباسىلار بار. مىسالى، ىلە اۋدانىندا اشتىقتان جۇدەۋ، سويلەۋگە جانە جۇرۋگە مۇرشاسى قالماعان 6 جاسار چ. م. انىقتالدى. بالا «ەكى جاقتى پنيەۆمونيا» دياگنوزىمەن جەدەل تۇردە اۋداندىق اۋرۋحاناعا جاتقىزىلىپ، مەديتسينالىق كومەك كورسەتىلدى»، - دەپ اتاپ وتەدى پروكۋراتۋرادان.

ۆەدومستۆو مالىمەتىنشە، بالانىڭ اتا-اناسى اكىمشىلىك قۇقىقبۇزۋشىلىق تۋرالى كودەكستىڭ 127-بابىنىڭ 2-بولىگى بويىنشا جاۋاپكەرشىلىككە تارتىلدى. سونىمەن قاتار قامقورشىلىق ورگان ولاردىڭ اتا- انا قۇقىعىن شەكتەۋ تۋرالى تالاپپەن سوتقا جۇگىنگەن.

«رايىمبەك اۋدانىندا 3 بالاسى اشتىقتان جۇدەگەن وتباسى انىقتالدى. ولارعا مەديتسينالىق كومەك كورسەتىلىپ، قىسقى كيىم ساتىپ الىندى. ەكى بالا جازىلعان سوڭ بالاباقشاعا، ال ۇلكەنى مەكتەپ-ينتەرناتقا ورنالاستىرىلادى. بالقاش اۋدانىندا 3 وتباسىندا وگەي اكەلەرى بالالاردى ۇرىپ-سوققانى انىقتالدى. پوليتسيا ورگاندارى كىنالى تۇلعالارعا قاتىستى ا ق ب ت ك 73-2-بابى (ۇرىپ-سوعۋ) بويىنشا اكىمشىلىك قۇقىق بۇزۋشىلىق تۋرالى ءىس قوزعادى»، - دەلىنگەن پروكۋراتۋرا ۇسىنعان مالىمەتتە.

اۆتور

مارلان جيەمباي