اداي تۇقىمداس جىلقىنىڭ 6 ءتۇرى جاڭا ۇلتتىق برەند رەتىندە تىركەلدى
بۇگىن ق ر ادىلەت مينيسترلىگى اداي تۇقىمداس جىلقىلاردىڭ 6 ءتۇرىن جاڭا ۇلتتىق برەند رەتىندە تىركەدى. بۇل تۋرالى ادىلەت مينيسترلىگىنىڭ باسپاءسو قىزمەتى حابارلادى، دەپ جازادى Kazinform.
28-جەلتوقساندا ادىلەت مينيسترلىگىنىڭ «ۇلتتىق زياتكەرلىك مەنشىك ينستيتۋتى» ر م ك اۋىل شارۋاشىلىعى مينيسترلىگى اپروباتسيا جونىندەگى مەملەكەتتىك كوميسسياسىنىڭ قورىتىندىسى نەگىزىندە سەلەكسيالىق جەتىستىككە التى پاتەنت بەرۋ تۋرالى شەشىم قابىلدادى جانە سەلەكسيالىق جەتىستىكتەردىڭ مەملەكەتتىك تىزىلىمىندە تىركەدى.
وسىنىڭ نەگىزىندە اداي جىلقىسىنىڭ جاڭا تۇقىمدارىن قازاقستان رەسپۋبليكاسىنىڭ سەلەكسيالىق جەتىستىگى رەتىندە تىركەۋ جانە پاتەنت يەلەنۋشىنىڭ سەلەكتسيالىق جەتىستىكتى پايدالانۋعا ايرىقشا قۇقىعىن، ونىڭ باسىمدىعى مەن سەلەكسيونەردىڭ اۆتورلىعىن كۋالەندىرەتىن پاتەنتتەر بەردى.
2023 -جىلعى 29-جەلتوقساندا پاتەنتتەر بەرۋ تۋرالى مالىمەتتەر رەسمي بيۋللەتەندە جاريالاندى.
ەستەرىڭىزگە سالا كەتەيىك مەملەكەت باسشىسى قاسىم-جومارت توقايەۆتىڭ ماڭعىستاۋ وبلىسىنا ساپارىنىڭ قورىتىندىسى بويىنشا ۇكىمەتكە اداي اسىل تۇقىمدى جىلقىسىن عىلىمي تۇرعىدان دالەلدەۋ جانە ءوسىمىن مولايتۋ بويىنشا جەدەل جۇمىس جۇرگىزۋ تۋرالى تاپسىرما بەرىلگەن بولاتىن.
اداي جىلقىسىنىڭ جاڭا تۇقىمدارىنا پاتەنت الۋ ونى ودان ءارى ساقتاۋعا، ىرىكتەۋگە جانە قازاقستان رەسپۋبليكاسىنىڭ ۇلتتىق برەندىن دامىتۋعا ىقپال ەتەتىن بولادى.
اۆتور
ەربول جانات
