ادام قۇتقارۋعا اتتاناتىن ۇشاقتار اۆتوكولىك جانارمايىن قۇيىپ ءجۇر - ءماجىلىس دەپۋتاتى

استانا. KAZINFORM - سانيتارلىق اۆياتسيادان ابدەن ەسكىرگەن ا ن-2 جانە ياك-40 ۇشاقتارىن الىپ تاستاۋ كەرەك. بۇل تۋرالى پرەمەر-ءمينيستردىڭ اتىنا دەپۋتاتتىق ساۋال جولداعان نارتاي سارسەنعاليەۆ ايتتى.

«بۇگىن مەديتسيناداعى تاعى ءبىر سۇمدىقتى ءسوز ەتپەكپىن. سەبەبى بىزدەگى جەدەل جاردەمنىڭ وزىنە جەدەل جاردەم كەرەك ەكەن. ءسوز – سان اۆياتسيا تۋرالى. مامىر ايىندا قوستاناي وبلىسىندا سانيتارلىق رەيستىڭ سۋ ۇستىندە توبەسىمەن توڭكەرىلىپ جاتقانىن كوپشىلىك كوردى. الىستاعى اعايىندى ەمدەۋگە، ورايىن تاۋىپ ورتالىققا اكەلۋگە اتتانعان ۇشاقتىڭ سيقى سول. «اۋرۋدان كەلمەگەن اجالىم اۆياتسيادان كەلە مە» دەپ قورقادى ەندى قاراپايىم ەل. حوش، قوستانايدا سۋعا قونامىن دەپ توبەسىمەن توڭكەرىلىپ تۇسكەن سان اۆياتسياعا تيەسىلى ان-2 ۇشاعى ءبىراز بىلىقتىڭ بەتىن اشتى. قازبالاپ كەپ جىبەرگەندە جانتۇرشىگەرلىك جايتتار اشكەرە بولدى. 2019-2023 -جىلدارى سانيتارلىق اۆياتسيا جەلىسىندە 11 وقىس وقيعا، 5 اۆياتسيالىق وقيعا تىركەلگەن. سونىڭ تەڭ جارتىسى ان-2 ۇشاعىنىڭ ەنشىسىندە»، - دەدى ول ءماجىلىستىڭ جالپى وتىرىسىندا.

ونىڭ دەرەگىنشە، 2023 -جىلى سانيتارلىق اۆياتسياعا 11,9 ميلليارد تەڭگە جۇمسالعان. ال قازاقستانداعى سان اۆياتسيادا قولدانىلاتىن ان-2 - كەڭەس كەزىندە، ياكي 1947 -جىلدان باستاپ شىققان ۇشاق. ال ياك-40 1966-1981 -جىلدارى قۇراستىرىلعان اۋە كولىگى.

«تابيعي بايلىقتىڭ ءبارى تابانىنىڭ استىندا جاتقان ەلىمىزدىڭ سانيتارلىق رەيستەرىندە ورتاشا قىزمەت ەتۋ مەرزىمى 40 جىلدان اسقان ۇشاقتار قاتىنايدى. ەڭ سوراقىسى قازاقستاننىڭ سان اۆياتسياداعى ان-2 ۇشاقتارى اي-95 ماركالى اۆتوموبيل بەنزينىمەن ۇشىپ ءجۇر. ويلاپ كورىڭىزدەر، اسپانمەن ادام قۇتقارۋعا اتتاناتىن ۇشاققا جەردە جۇرەتىن اۆتوكولىكتىڭ جانارمايىن قۇيىپ جۇرگەن ەل اتاندىق. وسىدان كەيىن سانيتارلىق اۆياتسياداعى اپاتتارعا ەشكىم تاڭ قالا قويماس»، - دەدى ءماجىلىس دەپۋتاتى.

دەپۋتاتتىڭ اتاپ وتۋىنشە، 2023 -جىلى «ۇلتتىق شۇعىل مەديتسينانى ۇيلەستىرۋ ورتالىعى» شالعايداعى ناۋقاسقا جەدەل جەتۋ ءۇشىن 11 اۋە كومپانياسىمەن شارت جاساسقان. ءبىراق سوڭعى 4 جىلداعى ۇشۋلاردىڭ 70 پايىزى ان-2 جانە ياك-40 ۇشاقتارىمەن جۇزەگە اسقان. ان-2 ۇشاعى 4 ساعاتتا جەتەتىن جەرگە، پايدالانۋ مەرزىمى 10 جىلدان اسقان ە س-145 تىكۇشاعى 2,5 ساعاتتا جەتەدى. سوعان قاراماستان ەسكى ۇشاقتاردىڭ تاريفى جىل ساناپ ءوسىپ بارادى. مىسالى، 2015 -جىلى ان-2 ۇشاعىنىڭ 1 ساعاتتىق ۇشۋ تاريفى - 219250 تەڭگە بولسا، بىلتىر 328 مىڭ تەڭگەگە جەتكەن.

وسىعان وراي نارتاي سارسەنعاليەۆ ۇكىمەت باسشىسىنا مىنداي ۇسىنىستار بەردى:

1. سانيتارلىق اۆياتسيادان ابدەن ەسكىرگەن ان-2 جانە ياك-40 ۇشاقتارىن الىپ تاستاۋ كەرەك. ونىڭ ورنىنا الەمدىك ستاندارتقا ساي زاماناۋي ۇشاقتار مەن تىكۇشاقتاردى پايدالانۋ قاجەت.

2. سانيتارلىق اۆياتسياعا قاجەت ۇشاقتاردى ۇسىناتىن اۋە كومپانيالارىمەن شارت جاساسقاندا ەڭ ارزان تاريفتى بەكىتۋ تۋرالى ءتارتىپتى قايتا قاراۋ كەرەك. ايتپەسە ەسكى ۇشاقتاردان قۇتىلا المايمىز، ال بۇل ءوز كەزەگىندە ونسىزدا اۋىر دەرتكە شالدىققان ادامدى ازاپتاۋ سانالادى.

3. الدىڭعى ۇسىنىستار جۇزەگە اسقانعا دەيىن قازىر ەلىمىزدىڭ سانيتارلىق اۆياتسياسىندا ۇشىپ جۇرگەن ان-2 ۇشاقتارىنا اۆياتسيالىق جانارماي قۇيۋدى قامتاماسسىز ەتۋ كەرەك. سەبەبى اۆتوكولىكتىڭ بەنزينىن قۇيعان ۇشاقتىڭ الىسقا ۇشپايتىنىنا كوز جەتتى.

اۆتور

مارلان جيەمباي