اۋعانستانعا گۋمانيتارلىق كومەك تيەلگەن ارنايى رەيس استانادان شىعىپ، الماتىعا جەتتى

اۋعانستاننىڭ گەرات ايماعىندا بولعان جەر سىلكىنىسىنەن زارداپ شەككەندەرگە گۋمانيتارلىق كومەك تيەگەن ارنايى رەيس استانادان ۇشىپ شىقتى، دەپ حابارلايدى Kazinform اگەنتتىگى.

توتەنشە جاعداي مينيسترلىگىنىڭ گۋمانيتارلىق كومەك تيەگەن Y8F200W ۇشاعى استانادان الماتىعا ۇشىپ شىقتى.

«بۇگىن اۋعانستان مەملەكەتىندە بولعان جەر سىلكىنىسىنە بايلانىستى گۋمانيتارلىق كومەك تيەپ جاتىرمىز. قازىر استانا قالاسىنان 1 توننا مەديتسينالىق بۇيىم مەن ءدارى- دارمەك ارتتىق. ودان كەيىن الماتى قالاسىنان شاتىرلار الىپ، شىمكەنت قالاسىنان تاعى مەديتسينالىق بۇيىمدار مەن ءدارى- دارمەك تيەيمىز. كەلەسى كۇنى وسى گۋمانيتارلىق كومەكتىڭ ءبارىن اۋعانستان مەملەكەتىنە جەتكىزەمىز»، - دەيدى ۇلتتىق ۇلان اسكەري ءبولىمىنىڭ اۆياتسيالىق جاساق كومانديرى نۇرعالي توپانوۆ.

ەسكە سالساق، 7 - قازان كۇنى اۋعانستاننىڭ باتىسىنداعى گەرات پروۆينتسياسىنداعى 6,3 بالدىق جەر سىلكىنىسى سالدارىنان 2053 ادام قازا تاۋىپ، 9 مىڭنان استام ادام جاراقات العان.

بۇعان دەيىن قازاقستاننىڭ اۋعانستانعا گۋمانيتارلىق كومەك كورسەتەتىنى حابارلانعان ەدى.

گۋمانيتارلىق كومەك ازىق- تۇلىك تاۋارلارى، شاتىر، ءدارى- دارمەك، كيىم- كەشەك جانە باسقا دا قاجەتتى زاتتاردان تۇرادى.

جۇكتىڭ ءبىر بولىگى اۋەمەن جەتكىزىلسە، ءبىر بولىگى تەمىرجول كولىگىمەن جونەلتىلەدى.

سونىمەن قاتار اۋعانستانعا ءۇيىندى استىندا قالعان ادامداردى قۇتقارۋ ءۇشىن ت ج م قۇتقارۋشىلارى، سونىڭ ىشىندە كينولوگ ماماندار جىبەرىلەتىنى ايتىلدى.

سىرتقى ىستەر مينيسترلىگىنىڭ رەسمي وكىلى ايبەك سمادياروۆتىڭ ايتۋىنشا، اۋعانستانداعى جەر سىلكىنىسىنەن قازاقستان ازاماتتارى زارداپ شەككەن جوق.

اۆتور

ەسىمجان ناقتىباي