اۋعانستان ازاماتتارى قازاقستاندىق شەنەۋنىككە پارا بەرىپ، رەسەيگە وتپەك بولدى - ۇ ق ك
استانا. KAZINFORM – ۇ ق ك شەكارا قىزمەتى «الماتى» شەكارالىق باقىلاۋ باسقارماسى ۇ ق ك الماتى قالاسى بويىنشا دەپارتامەنتىمەن بىرلەسە وتىرىپ، پروكۋراتۋرا ورگاندارىنىڭ ۇيلەستىرۋىمەن قازاقستان اۋماعى ارقىلى اۋعانستان ازاماتتارىنىڭ رەسەيگە جانە ودان ءارى ەۋروپا ەلدەرىنە زاڭسىز كوشى-قون ارناسىنىڭ جولىن كەستى.
ق ر ۇلتتىق قاۋىپسىزدىك كوميتەتى شەكارا قىزمەتىنىڭ حابارلاۋىنشا، بيىلعى 16-ناۋرىزدا لاۋازىمدى تۇلعاعا 5 مىڭ ا ق ش دوللارى كولەمىندە پارا بەرۋ ارەكەتى كەزىندە اۋعانستاننىڭ 4 ازاماتى ۇستالدى.
تەرگەۋ ماتەريالدارىنا سايكەس، بۇل قاراجات شەتەلدىكتەردى يسپانيا مەن پورتۋگاليانىڭ جالعان ءتولقۇجاتتارى بويىنشا الماتى قالاسىنىڭ حالىقارالىق اۋەجايى ارقىلى تاسىمالداۋدى ۇيىمداستىرۋعا ارنالعان.
قىلمىستىق كودەكستىڭ 394-بابىنىڭ 1-بولىگىندە جانە 367-بابىندا كوزدەلگەن قىلمىس بەلگىلەرى بويىنشا سوتقا دەيىنگى تەرگەپ-تەكسەرۋ جۇرگىزىلۋدە.
«سوتتىڭ سانكسياسىمەن ۇستالعان ادامدارعا قاماۋدا ۇستاۋ تۇرىندەگى بۇلتارتپاۋ شاراسى قولدانىلدى. قىلمىستىق- پروتسەستىك كودەكستىڭ 201-بابىنىڭ 1-بولىگىنە سايكەس وزگە دە اقپارات جاريا ەتۋگە جاتپايدى»، - دەلىنگەن باسپا ءسوز- بايانىندا.
اۆتور
ايدار وسپاناليەۆ
