اباي پوليتسياسى جول قوزعالىسىن درونداردىڭ كومەگىمەن قاداعالايدى

استانا. KAZINFORM - دروندار جۇرگىزۋشىلەردىڭ قاراما-قارسى جولاققا شىعۋ، جىلدامدىقتى ارتتىرۋ سىندى قۇقىق بۇزۋشىلىقتارىن دەر كەزىندە انىقتاۋعا مۇمكىندىك بەرەدى، دەپ حابارلايدى ىشكى ىستەر مينيسترلىگىنىڭ باسپا ءسوز قىزمەتى.

اباي وبلىسىندا جول قوزعالىسى قاۋىپسىزدىگىن قامتاماسىز ەتۋ جانە جول-كولىك وقيعالارىنىڭ الدىن الۋ ماقساتىندا پوليتسيا قىزمەتكەرلەرى اۆتوجولدارداعى جاعدايدى قاداعالاۋ ءۇشىن زاماناۋي بەسپيلوتتىق ۇشۋ اپپاراتتارىن كەڭىنەن قولدانىپ جاتىر.

بيىلعى جىلدىڭ العاشقى سەگىز ايىنىڭ قورىتىندىسى بويىنشا وڭىردە جول- كولىك وقيعالارىنىڭ سانى %4,6- عا (668-دەن 637-گە دەيىن) ازايدى. جول اپاتىنان قازا تاپقاندار سانى دا %16,4- عا (50-دەن 42-گە دەيىن) تومەندەدى. دەگەنمەن، جاراقات العاندار سانى %3,6- عا (951-دەن 985-كە دەيىن) ءسال ارتقان.

جول-كولىك وقيعالارىنىڭ باسىم بولىگى - %79- ى نەمەسە 428 دەرەك ەلدى مەكەندەر اۋماعىندا تىركەلگەن. اپاتتاردىڭ نەگىزگى سەبەپتەرى - جىلدامدىق رەجيمىن بۇزۋ (106 دەرەك نەمەسە %19) جانە رەتتەلمەيتىن جاياۋ جۇرگىنشىلەر وتكەلدەرىنەن ءوتۋ ەرەجەسىن ساقتاماۋ (99 دەرەك نەمەسە %18). ءجيى كەزدەسەتىن اپات تۇرلەرى: كولىكتەردىڭ سوقتىعىسۋى (%37 نەمەسە 202 جاعداي) جانە جاياۋ جۇرگىنشىلەردى قاعۋ (%33 نەمەسە 178 جاعداي) .

- جول-كولىك وقيعالارىنىڭ الدىن الۋ ءۇشىن پاترۋلدىك پوليتسيا قىزمەتكەرلەرى «قۇقىقتىق ءتارتىپ» جەدەل- پروفيلاكتيكالىق ءىس-شاراسى اياسىندا قاۋىپتى ۋچاسكەلەردە رەيدتەر جۇرگىزىپ كەلەدى. سونىمەن قاتار جۇرگىزۋشىلەرگە جول قوزعالىسى ەرەجەلەرىن ساقتاۋ، ەڭبەك جانە دەمالىس رەجيمىن بۇزباۋ قاجەتتىگى جونىندە ءتۇسىندىرۋ جۇمىستارى جۇرگىزىلىپ جاتىر. بۇدان بولەك، جاسىرىن پاترۋلدەۋ ادىستەرى قولدانىلىپ، دروندار ارقىلى زاڭ بۇزۋشىلىقتار دەر كەزىندە انىقتالۋدا،- دەلىنگەن ۆەدومستۆو حابارلاماسىندا.

اباي وبلىسىنىڭ پوليتسيا دەپارتامەنتى جول قوزعالىسىنا قاتىسۋشىلاردى ساقتىق شارالارىن قاتاڭ ۇستانۋعا جانە زاڭ تالاپتارىن بۇلجىتپاي ورىنداۋعا شاقىرادى.

بۇدان بۇرىن اباي وبلىسىندا جىل باسىنان بەرى قوس ازاماتتىق ءۇشىن 15 ادام جاۋاپقا تارتىلعانىن جازعان ەدىك.

اۆتور

اينۇر تۋماكبايەۆا