اباي وبلىسىندا 14 ادامنىڭ ولىمىنە سەبەپ بولعان الاپات ورتكە قاتىستى سوت ۇكىمى شىقتى
سەمەي. KAZINFORM - اباي وبلىسىندا 14 ادام كوز جۇمعان الاپات ورتكە قاتىستى سوت ۇكىمى شىقتى.
بورودۋليحا اۋداندىق سوتىندا ءورت قاۋىپسىزدىگى تالاپتارىن بۇزۋى ابايسىزدا 14 ادامنىڭ ولىمىنە اكەپ سوقتىرعان «سەمەي ورمانى» مەملەكەتتىك تابيعي رەزەرۆاتىنىڭ ەكى قىزمەتكەرىنە قاتىستى قىلمىستىق ءىس قارالدى.
«سەمەي ورمانى» رەزەرۆاتىندا جانە جاڭا ءشۇلبى فيليالىندا باسشىلىق قىزمەتتەردى اتقارعان ۆ. جانە ك. ەسىمدى ايىپتالۋشىلار ءورت شىققان كەزدە جالىندى ءسوندىرۋدى ۇيىمداستىرۋ بويىنشا ءوز مىندەتتەرىن ورىنداماي، جاعدايدى قاتە باعالاعان. سونداي-اق ءورتتى ءسوندىرۋ كەزىندە قاۋىپسىزدىك شارالارىن ساقتاۋدى قامتاماسىز ەتپەۋى 14 ادامنىڭ ولىمىنە اكەلىپ سوقتىردى»، - دەپ حابارلادى اۋداندىق سوتتىڭ باسپا ءسوز قىزمەتىنەن.
ۆ. مەن ك. -نىڭ كىناسى كۋالاردىڭ ايعاقتارىمەن، جۇرگىزىلگەن ساراپتامالارمەن، وقيعا بولعان جەردى قاراۋ حاتتامالارىمەن جانە زاتتاي دالەلدەمەلەرمەن تولىقتاي دالەلدەندى.
«سوت ەكى سوتتالۋشىنىڭ جاس بالالارىنىڭ بارىن، ءارى اۋىرلاتاتىن ءمان-جايلاردىڭ جوقتىعىن ەسكەرىپ، ايىپتالۋشىلاردى 7 جىلعا باس بوستاندىعىنان ايىردى. ۇكىم ءالى زاڭدى كۇشىنە ەنگەن جوق»، - دەلىنگەن اقپاراتتا.
اۆتور
تالعاتجان مۇحامەتبەك ۇلى
