اباي وبلىسىنداعى قوڭىر اۋليە ۇڭگىرىنە 30 مىڭ تۋريست كەلگەن

الايدا ويدىم-ويدىم جول مەن تۋريستىك ينفراقۇرىلىمنىڭ ناشارلىعى كەلۋشىلەرگە قولايسىزدىق تۋعىزادى. اباي وبلىسىنداعى قوڭىر اۋليە ۇڭگىرى ەلدىڭ تۇكپىر-تۇكپىرىنەن تۋريستەر اعىلاتىن كيەلى مەكەن. جىل سايىن مۇندا مىڭداعان ادام كەلىپ، تىلسىم تابيعاتتى تاماشالاپ، اڭىزعا اينالعان ورىننىڭ قاسيەتىن سەزىنۋگە تىرىسادى. جەرگىلىكتى جۇرت بۇل مەكەندى «كۇش- قۋات ورنى» دەپ اتايدى. الايدا ۇڭگىرگە جەتۋدىڭ ءوزى وڭاي ەمەس.

گۇلسارا تۇردىحان قىزى قوڭىر اۋليە ۇڭگىرى تۋرالى كوپتەن بەرى ەستىپ جۇرگەنىن ايتادى. اقمولا وبلىسىنىڭ ارشالى اۋدانىنان كەلگەن ول بۇل ساپاردى بىرنەشە جىلدان بەرى جوسپارلاعان. بيىل ءساتى ءتۇسىپ، كيەلى جەرگە ۇلىمەن بىرگە كەلگەن. الايدا قاسيەتتى مەكەنگە جەتۋ وڭاي بولماعانىن ايتادى.

گۇلسارا تۇردىحان قىزى، اقمولا وبلىسىنىڭ تۇرعىنى:

 - كەلۋدەگى ماقسات دەرتىمىزگە شيپا، دەنىمىزگە ساۋلىق سۇرادىق. سەزىم وتە كۇشتى. ۇڭگىردىڭ ءوزىنىڭ ءىشى تاماشا ەكەن. دەمالعاندا كەۋدەڭ كەڭىپ، تىنىسىڭ اشىلادى. سۋى دا وتە تاماشا ەكەن.  ءبىراق جولى وتە ناشار. اينالما جول ەكەن. جاسالماعان ەسكى جەر جولمەن 2-3 ساعات اقىرىنداپ ءجۇرىپ كەلدىك.

ۇڭگىر تۋرالى جوڭعار شاپقىنشىلىعى كەزەڭىمەن بايلانىستى اڭىزدار ەل اراسىندا ءالى كۇنگە دەيىن ساقتالعان. حالىق اراسىندا جەراستى سۋىنىڭ شيپالىق قاسيەتى بار دەگەن سەنىم قالىپتاسقان. عاسىرلار بويى بۇل مەكەنگە زيارات ەتۋشىلەر كەلىپ، تىلەك تىلەگەن. قاسيەتتى مەكەنگە ەلىمىزدىڭ ءار وڭىرىنەن جانە الىس-جاقىن شەتەلدەردەن ساياحاتشىلار ات باسىن بۇرادى.

 نازگۇل شۇدەرحان قىزى، استانا قالاسىنىڭ تۇرعىنى:

- كەرەمەت مەكەن، ءبىرىنشى رەت كەلىپ تۇرمىن. وتە تاڭعالۋدامىن. ۇڭگىردىڭ ءوزى ۇزاق، ۇلكەندىگىنىڭ ءوزى مەن ويلاعانداي ەمەس، الدەقايدا ۇلكەن ەكەن. سۋىنا قانشا سان مىڭداعان ادام تۇسسە دە ءموپ-ءمولدىر جالتىراپ جاتىر. استانادان شىققان ۋاقىتتا تۇڭگى ەكىدە جەتەسىڭ دەپ كورسەتىپ تۇرعان، ءبىراق جولدىڭ كەدىر-بۇدىرىنان تاڭعى بەستە ءبىراق جەتتىك. كوز ىلمەي تاڭعا دەيىن ءجۇرىپ كەلدىك.

 اۋدان ورتالىعىنان ۇڭگىرگە دەيىنگى 45 شاقىرىم جول اسفالتتالعان. ال قالعان 31 شاقىرىم تاۋ اراسىنداعى قارا جول. ونىڭ ۇستىنە، بۇل اۋماق بىرنەشە شارۋاشىلىقتىڭ جەرى سانالادى. سوندىقتان جولدىڭ ناقتى مارتەبەسى جوق.

مەيىرجان سماعۇلوۆ، اباي اۋدانىنىڭ اكىمى:

- بۇگىنگى تاڭدا ول - جەتى شارۋاشىلىقتىڭ جەرى. ولاردى ءبىز ۇكىمەتكە قايتارىپ، جول ەسەبىنە جاساتساق دەيمىز. ەگەر وسى كەزەڭ- كەزەڭمەن جاسالاتىن جۇمىسىمىز ءوز دەڭگەيىندە بولاتىن بولسا، قوڭىر اۋليە ۇڭگىرى ماۋسىمدىق قانا بولمايدى، ونى جىل ون ەكى اي حالىققا قىزمەت كورسەتەتىن ەتىپ جاساۋعا بولادى. بۇدان بولەك، تۋريستەر ءۇشىن اۋدان ورتالىعىندا 55 ادامعا ارنالعان قوناقۇي سالىنىپ جاتىر. قوڭىر اۋليەگە باراتىن جول بويىندا جانارماي بەكەتى مەن تەحنيكالىق قىزمەت كورسەتۋ ورتالىعى دا اشىلعان.

ايتا كەتەيىك، بيىلعى جىلدىڭ سەگىز ايىندا وڭىرگە 30 مىڭنان استام تۋريست كەلسە، ولاردىڭ باسىم بولىگى قوڭىر اۋليە ۇڭگىرىنە بارعان. 

 24.kz