اباي مەن قىزىلوردا وبلىستارىنىڭ اگرارشىلارى استاناداعى جارمەڭكەدە قانداي ونىمدەر ۇسىنادى

استانا. KAZINFORM - وسى دەمالىس كۇندەرى، 28-29-قىركۇيەكتە استانادا اباي جانە قىزىلوردا وبلىستارىنىڭ تاۋار وندىرۋشىلەرىنىڭ قاتىسۋىمەن ءىرى اۋىل شارۋاشىلىعى جارمەڭكەسى وتەدى، دەپ حابارلايدى ەلوردا اكىمدىگىنىڭ رەسمي سايتى.

ەكى وبلىستىڭ اگرارشىلارى استاناعا نارىقتىق باعادان تومەن باعامەن 830 توننادان استام جوعارى ساپالى اۋىل شارۋاشىلىعى ءونىمىن اكەلەدى. ساتىلاتىن تاۋارلار تىزىمىندە: ەت، كۇرىش، بالىق، كوكەنىستەر مەن جەمىستەر، وسىمدىك مايى، ءسۇت ونىمدەرى، بال، قىمىز، شۇجىق ونىمدەرى، باقشا داقىلدارى، اس تۇزى، سونداي-اق ءسۇت جانە كونديتەرلىك ونىمدەر بار.

جارمەڭكەنى وتكىزۋ بارىسىندا ەلوردا تۇرعىندارى مەن قوناقتارى اباي جانە قىزىلوردا وبلىستارى ارتىستەرىنىڭ قاتىسۋىمەن ويىن- ساۋىق كونسەرتتىك باعدارلاماسىن تاماشالاي الادى. اۋىلشارۋاشىلىق جارمەڭكەسى ساعات 9.00-دەن 18.00-گە دەيىن اشىق بولادى.

ەستەرىڭىزگە سالا كەتەيىك، بيىل جارمەڭكە «قازانات» يپپودرومىنا قاراما-قارسى، قارقارالى تاس جولى، 1-دە وتەدى. ەلوردا تۇرعىندارى مەن قوناقتارىنا ىڭعايلى بولۋى ءۇشىن ونى وتكىزۋ كەزەڭىندە № 18، 37، 303 جانە 323 اۆتوبۋس مارشرۋتتارى جۇرەدى.

جارمەڭكەلەر ءار دەمالىس كۇندەرى 27-قازانعا دەيىن وتەدى.