اۋەايلاقتاعى اۋا رايىن بولجاۋ: اۆياتسيالىق سينوپتيكتەر تۋرالى نە بىلەمىز؟

استانا. قازاقپارات- بىلتىر وتاندىق اۋە كومپانيالارى 72 مىڭ رەيس جاساعان، دەپ حابارلايدى 24KZ. ونىڭ 16 مىڭى مەجەلى ۋاقىتتا ورىندالماعان. بۇل - بىزدەگى ءاربىر ءتورتىنشى ۇشاق كەشىگىپ كوككە كوتەرىلەدى دەگەن ءسوز. ولاردىڭ ۋاقىتىلى ۇشپاۋىنا كوپ جاعدايدا كۇن رايىنىڭ قولايسىزدىعى سەبەپ.

دەگەنمەن اق قار، كوك مۇزدا دا امالىن تاۋىپ، اسپاندى باعىندىراتىن كەزدەر دە بولادى. مۇندايدا اۋا رايىن باقىلاپ، اۋە كولىكتەرىنىڭ قانات جايۋىنا ىڭعايلى مەزەتتى ءدوپ باسىپ تابۋ ماڭىزدى. بۇل - سينوپتيكتەر. دەگەنمەن كليماتتى زەرتتەپ، كۇن رايىنا بولجام جاساۋمەن شەكتەلمەيدى. ولار اۋە كولىكتەرىنىڭ كوككە كوتەرىلىپ، قونۋىنا ىڭعايلى مەزگىلدى انىقتاپ، قولايسىز جاعدايلاردى الدىن الا اقپاراتتاندىرىپ وتىرادى. ياعني، ءسىز مىنگەن ۇشاقتىڭ ۋاقىتىلى ۇشىپ، مەجەلى جەرگە قاۋىپسىز جەتۋىنە وسى مامانداردىڭ ۇلەسى زور. قازىر مۇندا 349 قىزمەتكەر ەڭبەك ەتەدى. ونىڭ 207- ءى - ينجەنەر، ال تەحنيكتەر - 129.

ۆاسيلينا كوستيكوۆا، «قازايرو ناۆيگاتسيا» ر م ك مەتەورولوگيالىق قامتاماسىز ەتۋ جانە اقپارات باسقارماسىنىڭ باسشىسى:

- مەتەورولوگيالىق قىزمەتتە ەڭبەك تاجىريبەسى مول ماماندار جۇمىس ىستەيدى، كەيبىرىنىڭ ەڭبەك ءوتىلى 20 جىلدان اسادى، ياعني كاسىپقويلىقتىڭ جوعارى دەڭگەيىن مەڭگەرگەن. ءبىراق جاس ماماندار دا بار، سوڭعى بىرنەشە جىلدا اۆياتسيالىق مەتەورولوگ قىزمەتىنە 30-دان استام ادام جۇمىسقا قابىلداندى. بىزدە مەتەورولوگيالىق جوعارى ءبىلىمى بار، سونداي-اق مەملەكەتتىك تالاپتاردان بولەك، حالىقارالىق ازاماتتىق اۆياتسيا ۇيىمى مەن دۇنيەجۇزىلىك مەتەورولوگيالىق ۇيىمنىڭ تالاپ-ۇددەسىنەن شىققان ازاماتتار ەڭبەك ەتەدى.

تابيعاتتىڭ توسىن مىنەزىن تاپ باسىپ ايتۋ قيىن. سوندىقتان سينوپتيكتەردىڭ ەڭبەگى جاۋاپكەرشىلىككە تولى. «دەگەنمەن جوعارى دالدىكتى زاماناۋي قۇرىلعىلاردىڭ ارقاسىندا ايتقانىمىزدىڭ %90 اينىماي كەلەدى»، - دەيدى ماماندار.

بۇل دا - بىزدەگى قىزمەتكەرلەردىڭ كاسىبي بىلىكتىلىگىنىڭ ءبىر بەلگىسى.

تۇرعانىم قاجراحيموۆا، «قازايروناۆيگاتسيا» ر م ك سينوپتيگى:

- اۆياتسيالىق سينوپتيكتەر - بۇل جەدەل جۇمىس ىستەيتىن ماماندار. بولجام جاساۋ - بۇل كۇردەلى، ءتىپتى شىعارماشىلىق پروتسەسس. اۋەايلاق بويىنشا بولجام ءار 3 ساعات سايىن جاڭارتىلادى، اۆياتسيالىق پايدالانۋشىلارعا ناقتى اۋا رايى ءار 30 مينۋت سايىن بەرىلەدى. اۆياتسيالىق سينوپتيك ءوزىنىڭ بارلىق ايروسينوپتيكالىق دەرەكتەرىن تالدايدى. ناتيجەسىندە ايرودرومنىڭ جەرگىلىكتى جاعدايلارى مەن كليماتتىق ەرەكشەلىكتەرىن ەسكەرە وتىرا اقپارات تاراتادى.

جارتى ساعات سايىن الىنعان سىناما ناتيجەسى اۋە كەمەسىنىڭ كومانديرىنە تانىستىرىلادى. ءتىپتى توتەنشە جاعداي كەزىندە جەدەل قونۋعا جايلى ايماقتار دا كورسەتىلەدى. دەگەنمەن سوڭعى شەشىم ەكيپاج مۇشەلەرىنىڭ ءوز قۇزىرىندا. قولايسىز اۋا رايىندا ۇشۋ نە رەيستى كەيىنگە شەگەرۋدى ۇشقىشتار شەشەدى.

جانار سەرلىبايەۆا، «قازايرو ناۆيگاتسيا» ر م ك ينجەنەر-سينوپتيگى:

- تاڭعى ۋاقىتتا بىزگە اتموسفەرالىق كارتالار تۇسەدى. بۇل كارتالاردى بارلىق بيىكتىكتە قاراپ وتەمىز، ودان كەيىن 850 كارتاسىن اشىپ، تالداۋ جۇرگىزەمىز. بۇگىنگى سينوپتيكالىق جاعدايدى قارايتىن بولساق، وندا استانا انتيتسيكلوندى جوتاسىندا ورنالاسقان جانە سوعان بايلانىستى اۋا رايى اشىق، وتە جاقسى. ءبىراق دەگەنمەن دە ءبىز ەكيپاجدارعا اۋا رايى بولجامىن عانا ۇسىنامىز، ال ءارى قاراي ۇشۋ جانە ۇشپاۋ تۋرالى شەشىمدى وزدەرى قابىلدايدى.

سىن ساعاتتا ساسپاي، جەدەل ءارى جۇيەلى شەشىم قابىلداۋ ەكىنىڭ ءبىرىنىڭ قولىنان كەلمەيدى. سوندىقتان بۇل ساپتا سان ساتىلى سىناقتان وتكەن كىل مىقتىلار قىزمەت ەتەدى. قازىر مەتەورولوگتاردى ءال-فارابي اتىنداعى قازۇۋ- دا عانا دايىندايدى. كەيىن تاعىلىمداما مەن ارنايى كۋرستا تاجىريبەسىن شىڭدايدى. كاسىبي قۇزىرەتتىلىگى باعالانادى. سودان كەيىن عانا ەڭبەك نارىعىنا مامان رەتىندە قوسىلادى.

اۆتورلارى: شەرنياز جالعاسبەك ۇلى، سەرىك قوڭىربايەۆ.