نان تۋرالى قىزىقتى دەرەكتەر

نان ەگىنشىلىكتەن بۇرىن پايدا بولعان ارحەولوگتار يوردانيا اۋماعىنان شامامەن 14400 جىل بۇرىن دايىندالعان ناننىڭ قالدىقتارىن تاپقان. بۇل ادامداردىڭ ناندى ەگىنشىلىك كەڭىنەن دامىماي تۇرىپ-اق پىسىرگەنىن كورسەتەدى. عالىمداردىڭ پايىمىنشا، ەجەلگى ادامدار جابايى ءداندى داقىلداردى جيناپ، ۇنتاقتاپ، ودان نانعا ۇقساس تاعام ازىرلەگەن.

ەجەلگى مىسىردا نان ەڭبەكاقى رەتىندە بەرىلگەن

 ەجەلگى مىسىردا نان كۇندەلىكتى اس قانا ەمەس، ەڭبەكاقىنىڭ ءبىر بولىگى بولعان. جۇمىسشىلارعا اتقارعان ەڭبەگى ءۇشىن نان مەن سىرا سەكىلدى ازىق-تۇلىك بەرىلگەن. بۇل ونىمدەر سول كەزەڭدەگى تۇرمىستا ماڭىزدى ورىن العان.

ناندى كوپ تۇتىناتىن ەلدەردىڭ ءبىرى - تۇركيا

Guinness World Records دەرەگىنە سايكەس، 2000 -جىلى ەلدە جان باسىنا شاققانداعى نان تۇتىنۋ كورسەتكىشى جىلىنا 199,6 كەلىگە جەتكەن. بۇل مالىمەت تۇركيانىڭ نان تۇتىنۋ ءداستۇرىنىڭ قانشالىقتى تەرەڭ ەكەنىن اڭعارتادى.

عارىشكەرلەر نەگە تورتيليا جەيدى؟

 ال عارىشتا نان جەۋدىڭ وزىندىك ەرەكشەلىگى بار. سالماقسىزدىق جاعدايىندا كادىمگى ناننىڭ ۇگىندىلەرى اۋادا قالقىپ، عارىش اپپاراتىنىڭ جابدىقتارىنا زيان كەلتىرۋى مۇمكىن. سوندىقتان عارىشكەرلەر كوبىنە ۇگىندىسى از تورتيليانى پايدالانادى. NASA مالىمەتىنشە، 1985 -جىلدان بەرى بۇل ءونىم عارىشتاعى اس ءمازىرىنىڭ ءبىر بولىگىنە اينالعان.

فرانسۋز باگەتى - مادەني مۇرا

 نان ءپىسىرۋ ءداستۇرى دە كوپتەگەن حالىقتىڭ مادەني مۇراسىنىڭ اجىراماس بولىگى سانالادى. ماسەلەن، فرانسۋز باگەتىن دايىنداۋ ءداستۇرى 2022 -جىلى يۋنەسكو- نىڭ ماتەريالدىق ەمەس مادەني مۇرالار تىزىمىنە ەنگىزىلدى. وعان قامىر يلەۋ، اشىتۋ، قولمەن پىشىندەۋ، ءپىسىرۋ جانە ناۋبايشىلىق شەبەرلىكتى ۇرپاقتان ۇرپاققا جەتكىزۋ داستۇرلەرى كىرەدى. نان - تەك داستارقاننىڭ ءسانى ەمەس، ادامزاتتىڭ تاريحى مەن مادەنيەتىن جالعاپ كەلە جاتقان قۇندىلىق. ونىڭ دايىندالۋ تاسىلدەرى مەن تۇتىنۋ داستۇرلەرى ءار حالىقتىڭ تۇرمىس- تىرشىلىگىنەن سىر شەرتەدى.