ا ە س- كە كادردى شەتەلدەن شاقىرۋدىڭ قاجەتى جوق، ءوزىمىز دە دايىنداپ ۇلگەرەمىز - سايابەك ساحيەۆ

استانا. KAZINFORM - اتوم ەلەكتر ستانساسى سالىنعان جاعدايدا قازاقستان وتاندىق كادرلاردى دايىنداپ ۇلگەرەدى. بۇل تۋرالى ۇكىمەت وتىرىسىندا يادرولىق فيزيكا ينستيتۋتىنىڭ ديرەكتورى سايابەك ساحيەۆ ايتتى.

«قازاقستاندا 3 ورتالىق بار. وسى ءۇش ورتالىق ەلىمىزگە 5 مىڭ كادر دايىنداپ ۇلگەردى. ال اتوم ەلەكتر ستانساسىنا بار- جوعى 1400 عانا كادر قاجەت ەكەن. 5 مىڭ كادر دايىنداعان قازاقستان ا ە س ءۇشىن 1400 كادر دايىنداپ ۇلگەرەدى. ول ءۇشىن شەتەلدەن شاقىرۋدىڭ قاجەتى جوق دەپ ويلايمىز»، - دەدى ول.

وسى رەتتە ينستيتۋت ديرەكتورى تاياۋدا ەلىمىزدىڭ بارلىق اۋماعىندا ا ە س سالۋعا قاتىستى قوعامدىق تىڭداۋلار وتكەنىن ەسكە سالدى.

«قازاقستان حالقىمەن كەزدەسۋلەردە ءجيى قويىلعان سۇراقتاردىڭ ءبىرى قاۋىپسىزدىك، ونىڭ ىشىندە رادياتسيالىق قاۋىپسىزدىك جانە كادرلاردى دايارلاۋ بولدى. جالپى، قازاقستان تاڭداپ وتىرعان سۋ-سۋ ەنەرگەتيكالىق رەاكتورى العاش رەت 1957 -جىلى سالىنعان. سول ۋاقىتتان بەرى 415 رەاكتور جۇمىس ىستەپ تۇر. سونىڭ 200-دەن استامى - سۋ-سۋ رەاكتورى. ونىڭ بارىندە 67 جىلدىڭ ىشىندە بىردە-ءبىر توتەنشە وقيعا بولعان ەمەس. شتاتتىق رەجيمدە جۇمىس ىستەپ كەلەدى. بۇل - قاۋىپسىزدىكتىڭ ءبىر بەلگىسى. ەكىنشىدەن، يادرولىق فيزيكا ينستيتۋتىمىزدىڭ بازاسىندا سۋ-سۋ زەرتتەۋ رەاكتورى بار. ال ماگاتە- ءنىڭ ا ە س پەن زەرتتەۋ رەاكتورىنا قوياتىن تالابى بىردەي. 57 جىلدىڭ ىشىندە كەم دەگەندە ءۇش ۇرپاق - عالىمدار، ينجەنەرلەر اۋىستى. دەمەك، تەك الەم ەمەس قازاقستان دا وسى سۋ-سۋ رەاكتورلارىنىڭ قاۋىپسىز ەكەنىن دالەلدەپ وتىر»، - دەدى سايابەك ساحييەۆ.

ونىڭ اتاپ وتۋىنشە، 1980 -جىلدارى يادرولىق فيزيكا ينستيتۋتى ورنالاسقان الاتاۋ مولتەك اۋدانىندا 4 مىڭداي ادام تۇرعان. قازىر حالىق سانى 15 مىڭعا جەتتى.

«2 جىل بولدى، سونىڭ 50-ىنە ەكسپەريمەنت رەتىندە دەتەكتور بەرگەنبىز. اپتاسىنا، ايىنا ولشەمدەر جۇرگىزىپ وتىرادى. 2 جىلدىڭ ىشىندە نورمادان بىردە-ءبىر اۋىسۋ بايقالعان جوق. وسىنىڭ ءبارى ا ە س- ءتىڭ رادياتسيالىق قاۋىپسىز ەكەنىن دالەلدەيدى»، - دەدى ول.

اۆتور

مارلان جيەمباي