ا ق ش ۆيتسە-پرەزيدەنتى رەسپۋبليكاشىلداردىڭ سايلاۋدا جەڭىلۋ سەبەبىن ءتۇسىندىردى

ۆەنس بۇل تۋرالى X الەۋمەتتىك جەلىسىندەگى پاراقشاسىندا جازىپ، سايلاۋ ناتيجەسىنە اسەر ەتكەن نەگىزگى فاكتورلاردى اتادى.

ونىڭ ايتۋىنشا، رەسپۋبليكاشىلداردىڭ جەڭىلۋىنە يرانعا قارسى اسكەري قيمىلدار مەن يزرايلگە قاتىستى ساياسات ىقپال ەتكەن. ۆيسە-پرەزيدەنت بۇعان دەيىن دونالد ترامپتىڭ دا وسىنداي پىكىر بىلدىرگەنىن ەسكە سالدى.

- ءبىزدىڭ جەڭىلۋىمىزدىڭ سەبەبى - سوعىس. بۇل جاعدايدىڭ شىنايى سەبەبى بارلىعىنا دەرلىك تۇسىنىكتى. بىزدەن تەرىس اينالعان سايلاۋشىلاردى قالاي قايتارۋعا بولاتىنىن انىقتاۋ ءۇشىن قوعامدىق پىكىردى زەرتتەۋ جونىندەگى مامانمەن كەڭەستىم، - دەدى دجەي دي ۆەنس.

ۆيسە-پرەزيدەنت پارتيانىڭ ساياسي ۇستانىمىن قايتا قاراۋ ءۇشىن ءتورت باعىتقا نازار اۋدارۋ قاجەت ەكەنىن ايتتى. اتاپ ايتقاندا، يرانمەن سوعىستى توقتاتۋ، حالىقتىڭ كۇنكورىس شىعىندارى مەن ينفلياتسيا ماسەلەسىنە باسىمدىق بەرۋ، «امەريكا ءبىرىنشى ورىندا» قاعيداتىن جۇزەگە اسىرۋ جانە يزرايلمەن قارىم-قاتىناستى قايتا قاراۋ ۇسىنىلدى.

سونىمەن قاتار ۆەنس رەسپۋبليكالىق پارتيانىڭ سايلاۋالدى جاعدايىن باعالاعان ساراپشىلاردى سىنعا الدى. ونىڭ سوزىنشە، ولار پارتيا باسشىلىعىنا سايلاۋشىلاردىڭ كوڭىل-كۇيى تۋرالى شىنايى اقپارات بەرمەگەن.

- ءبىزدىڭ تاراپتاعى دەرەكتەردى تالداۋشىلار نازار اۋدارعان ماسەلەلەردىڭ ءبىرى سايلاۋشىلاردىڭ قۇرامى بولدى. ياعني سايلاۋشىلاردىڭ قۇرىلىمى رەسپۋبليكاشىلداردىڭ جەڭىسى ءۇشىن قاجەت 2024 - جىلعى كورسەتكىشتەرگە قانشالىقتى سايكەس كەلەتىنى زەرتتەلدى. ساۋالنامالار دەموكراتتاردىڭ ايقىن جەڭىسىن بولجاعانىنا قاراماستان، بىزگە ۇسىنىلعان دەرەكتەر ۇنەمى ءبىر كورىنىستى كورسەتتى. كەيبىر شتاتتاردا سايلاۋشىلاردىڭ بەلسەندىلىگى جەتكىلىكتى جوعارى، ال باسقالارىندا وتە جاقسى بولدى. بىردە-ءبىر شتاتتا قاتىسۋ دەڭگەيى اپاتتى تۇردە تومەن بولعان جوق، - دەپ جازدى ۆەنس.

ونىڭ ايتۋىنشا، وسى مالىمەتتەر پارتيا كومانداسىنىڭ سايلاۋ ناتيجەسىنە قاتىستى وپتيميستىك كوزقاراسىن قالىپتاستىرعان.

ۆيسە-پرەزيدەنت الداعى ايلاردا قوعامدىق پىكىرگە ىقپال ەتۋگە باعىتتالعان ءتۇرلى ارەكەتتەر بولۋى مۇمكىن ەكەنىن دە ەسكەرتتى.

اتاپ ايتقاندا، ول زاڭسىز ميگرانتتارعا جاپپاي راقىمشىلىق جاساۋ تۋرالى ۇسىنىستاردى سىنعا الدى. دەگەنمەن زاڭسىز جۇمىس كۇشىن پايدالاناتىن كاسىپورىندارعا باقىلاۋدى كۇشەيتۋ سياقتى كوشى-قون ساياساتىن جۇزەگە اسىرۋ تاسىلدەرىن وزگەرتۋگە دايىن ەكەنىن جەتكىزدى.

ءسوز سوڭىندا ۆەنس سايلاۋداعى جەڭىلىستى الدىن الا ەسكەرتكەن ازاماتتاردىڭ نارازىلىعىن تۇسىنەتىنىن ايتىپ، ولاردى اشۋدى ىسىرىپ قويىپ، ەل ءۇشىن جۇمىس ىستەۋگە شاقىردى.

بۇعان دەيىن ا ق ش پرەزيدەنتى دونالد ترامپ تا يرانمەن سوعىستىڭ رەسپۋبليكاشىلداردىڭ سايلاۋداعى ناتيجەسىنە اسەر ەتكەنىن مويىنداعان بولاتىن. ونىڭ ايتۋىنشا، يران ماسەلەسى جەڭىلىسكە ىقپال ەتكەن سەبەپتەردىڭ ءبىرى بولعان.

ايتا كەتەيىك، بۇعان دەيىن ا ق ش-تا وتكەن ارالىق سايلاۋدا دەموكراتتاردىڭ سەنات پەن وكىلدەر پالاتاسىندا باسىمدىققا يە بولعانى حابارلانعان ەدى. NBC News بولجامىنا سايكەس، دەموكراتتار سەناتتا قوسىمشا جەتى ورىن جەڭىپ الىپ، وكىلدەر پالاتاسىندا كەمىندە 258 ماندات يەلەنۋى مۇمكىن. جەكەلەگەن وكرۋگتەردە داۋىس ساناۋ جالعاسىپ جاتىر.