ا ق ش-تىڭ ورتالىق بارلاۋ باسقارماسى قىزمەتكەرلەرىنە ترامپ باعدارلاماسى اياسىندا جۇمىستان شىعۋدى ۇسىندى

استانا. KAZINFORM - ورتالىق بارلاۋ باسقارماسى ءوز قىزمەتكەرلەرىنە پرەزيدەنت دونالد ترامپتىڭ باعدارلاماسى اياسىندا ءوز ەركىمەن وتستاۆكاعا كەتكەن جاعدايدا وتەماقى تولەۋدى ۇسىندى، دەپ جازادى FOX News.

و ب ب فەدەرالدى قىزمەتكەرلەردى كادرلىق تازارتۋدان بوساتىلعانىنا قاراماستان، اگەنتتىكتىڭ جاڭا ديرەكتورى دجون رەتكليفف قىزمەتكەرلەرىنە ەرىكتى تۇردە جۇمىستان شىعۋدى جانە سەگىز ايلىق جالاقى مەن جەڭىلدىك الۋ ۇسىنىلعان ەلەكتروندى حات تاراتۋدى تاپسىردى.

رەتكليف سونداي-اق ۇزاق جىل قىزمەت ەتكەن وفيتسەرلەرگە مەرزىمىنەن بۇرىن زەينەتكە شىعۋ مۇمكىندىگىن بەرۋدى ۇيعاردى، سونداي-اق بايدەن اكىمشىلىگىنىڭ وكىلەتتىك مەرزىمىنىڭ سوڭىندا قىزمەتكە قابىلدانعان ادامداردىڭ جۇمىسقا ورنالاسۋىن توقتاتتى. بۇل ارەكەت ولاردىڭ لاۋازىمى ترامپ اكىمشىلىگىنىڭ باسىمدىقتارىنا سايكەس كەلەتىنىن قامتاماسىز ەتۋ ءۇشىن جاسالدى.

- بۇل قادام اگەنتتىكتى قايتا جانداندىرۋ، جاڭا باسشىلاردىڭ پايدا بولۋىنا مۇمكىندىك بەرۋ جانە و ب ب ءوز ميسسياسىن ورىنداۋ ءۇشىن جاقسىراق جاعداي جاساۋ جونىندەگى كەشەندى ستراتەگيانىڭ ءبىر بولىگى، - دەدى و ب ب وكىلى.

بۇعان دەيىن ترامپ اكىمشىلىگى 2 ميلليون فەدەرالدى قىزمەتكەرگە ەلەكتروندى حات جىبەرىپ، ولارعا جاڭا باعدارلاما بويىنشا 6-اقپانعا دەيىن جۇمىستان كەتۋگە جانە وتەماقى الۋعا مۇمكىندىك بەرگەن ەدى.

اۆتور

ەركەجان سماعۇلوۆا