ا ق ش- تىڭ مەملەكەتتىك قارىزى رەكوردتىق دەڭگەيگە جەتتى

ا ق ش- تىڭ مەملەكەتتىك قارىزى 34 تريلليون دوللاردان اسىپ كەتتى، دەپ حابارلايدى 24KZ.

مۇنداي رەكوردتىق كورسەتكىش بىلتىر ماۋسىم ايىندا دەفولت قاۋپىنىڭ الدىن الۋ بويىنشا اق ءۇي مەن رەسپۋبليكاشىلار اراسىنداعى مامىلەدەن كەيىن تۋىنداعان. ەكىجاقتى كەلىسىمگە سايكەس تاراپتار 31 تريلليون دوللاردان استام ۇكىمەتتىك قارىز مەجەسىن ۋاقىتشا الىپ تاستاعان. الايدا پايىزدىق ۇستەمەسىنىڭ ءوزى كۇن سايىن 1 ميلليارد 800 ميلليون دوللاردى قۇراپ وتىر.

الەمدىك پاندەمياعا دەيىن دە كونگرەستىڭ بيۋدجەتتىك كەڭسەسى مەملەكەتتىڭ قارىزى 2029 -جىلعا دەيىن 34 تريلليون دوللاردان اسادى دەپ بولجاعان بولاتىن. ءبىراق بۇل مەجەگە ا ق ش ساراپشىلار ويلاعاننان دا تەز جەتتى. سىن ساعاتتا جاعدايدى بارىنشا تۇراقتاندىرۋ ءۇشىن بيلىك قوماقتى قارىز الۋعا ءماجبۇر بولعان. ال قارىزدى قايتارۋ ينفلياتسيانىڭ كۇرت وسۋىمەن قاباتتاسىپ قالعاندىقتان، بۇل پايىزدىق مولشەرلەمەنىڭ وسۋىنە جانە قىزمەت كورسەتۋ شىعىندارىنىڭ ارتۋىنا اكەلىپ وتىر. دەگەنمەن ازىرگە بۇل سوما ەكونوميكانىڭ وسۋىنە ايتارلىقتاي اسەر ەتپەۋى مۇمكىن. سەبەبى ينۆەستورلار ۇكىمەتكە نەسيە بەرۋگە دايىن. بۇل نەسيە سالىققا سالماق سالماي-اق قازىنانىڭ سارقىلماۋىنا مۇمكىندىك بەرمەك.

مارك زاندي، ەكونوميست:

- زاڭ شىعارۋشىلار سايلاۋشىلار ءۇشىن ءبىر مامىلەگە كەلۋى ءتيىس. وزگەرىس جاساماساق، سالىقتى كوتەرۋ، شىعىنداردى ازايتۋ سەكىلدى قاتاڭ بولسا دا، ناقتى شارالاردى قولعا الماساق، پايىزدىق مولشەرلەمە وسە بەرەدى. كوپتەگەن امەريكالىققا ءۇي الماق تۇگىلى ءتىپتى كولىك ساتىپ الۋ دا مۇڭ بولىپ قالادى. جالپى قارىزدى جان باسىنا شاققاندا شامامەن 101 مىڭ دوللاردان كەلەدى. قارىز ماسەلەسى ۋشىققان سايىن تاڭداۋ دا قيىنداي تۇسەدى، سەبەبى مەديتسينالىق كومەك پەن الەۋمەتتىك سالانىڭ شىعىندارى سالىق تۇسىمىنەن الدەقايدا ارتىق.

وتكەن جىلى كوممەرتسيالىق ەمەس پيتەر پيتەرسون قورى جۇرگىزگەن ساۋالناماعا سۇيەنسەك، سايلاۋشىلاردىڭ %84- ءى قارىز ماسەلەسىن شەشۋ پرەزيدەنت پەن كونگرەسس ءۇشىن باسىم باعىت بولۋى كەرەك دەپ سانايدى.

2023 -جىلدىڭ باسىندا ا ق ش-تىڭ مەملەكەتتىك قارىزى بەلگىلەنگەن شەكتى 31,4 تريلليون دوللاردان استى. سول كەزدە قارجى مينيسترلىگى ليميت كوتەرىلمەسە، دەفولت قاۋپى بارىن بىرنەشە رەت ەسكەرتكەن بولاتىن. پرەزيدەنت دجو بايدەن مەن دەموكراتتار كونگرەستى شەكتى مەجەنى ەشقانداي شارت قويماي، كوتەرۋگە شاقىردى. ال رەسپۋبليكاشىلار بولسا، بيۋدجەت شىعىندارىن قىسقارتۋدى تالاپ ەتتى. ىمىراعا قول جەتكىزگەن سوڭ ماۋسىم ايىندا اق ءۇي باسشىسى مەملەكەتتىك قارىزدىڭ شەگىن ۋاقىتشا الۋ تۋرالى زاڭ جوباسىنا قول قويدى. مەملەكەتتىك قارىزعا ۋاقىتشا شەكتەۋدى الىپ تاستاۋ تۋرالى كەلىسىم 2025 -جىلدىڭ قاڭتارىنا دەيىن جارامدى.

اۆتورى: ايجان سىدىكوۆا.