ا ق ش- تا باسپاناعا قول جەتكىزۋ قيىنداپ بارادى

استانا. KAZINFORM - الەمدە 1,6 ميلليارد ادام ءۇي-كۇيسىز ءجۇر. 150 ميلليونعا جۋىعىندا ءاۋ باستان تۇراقتى باسپانا جوق. بۇل - جەر شارى حالقىنىڭ شامامەن 2 پايىزى. جىل سايىن تاعى 15 ميلليون ادام امالسىز اتا-قونىسىن تاستاپ كەتۋگە ءماجبۇر.

ال 2030 -جىلعا قاراي باسپاناسىزدار قاتارى 3 ميلليارد ادامعا كوبەيۋى ىقتيمال. UN- Habitat حالىقارالىق ۇيىمى وسىنداي دەرەك كەلتىردى. ولاردىڭ مالىمەتى بويىنشا، تۇرعىن ءۇي تاپشىلىعىنا الەۋمەتتىك جانە ەكونوميكالىق داعدارىستار، كليمات وزگەرىسى مەن تابيعات اپاتتارى سەبەپ.

 قاقتىعىستان ميلليونداعان ادام قونىسىنان ايىرىلدى

گازا سەكتورى باسپانا ماسەلەسى، دامۋشى ەلدەر ءۇشىن باستى ماسەلە. اسىرەسە قاقتىعىستان زيان شەككەن گازا سەكتورى، سيريا، ليۆان، يران سياقتى تاياۋ شىعىس ايماعىنىڭ تۇرعىندارى ءۇشىن ءۇي تەك ارمان. حالىقتىڭ دەنى ۋاقىتشا ورىندار مەن لاشىقتا كۇنەلتىپ ءجۇر. بىلتىر قازان ايىنان بەرى انكلاۆتان 2,3 ميلليون پالەستينالىق باس اماندىعىن ويلاپ، باسپاناسىن تاستاپ كەتكەن. ول ازداي، كۇننىڭ لەزدە سۋىپ، قىستىڭ قاھارىنا ءمىنۋى ماسەلەنى ودان سايىن ۋشىقتىرا ءتۇستى.

سامي وسەيلەح، جەرگىلىكتى تۇرعىن:

-ءبىز جانىمىزدى شۇبەرەككە ءتۇيىپ، قاقتىعىستان قاشىپ تۇرعىلىقتى ۇيىمىزدەن ايىرىلدىق. اتىس-شابىستان باسپانامىزدىڭ تۇگى قالمادى. قازىر قولدا باردان شاتىر تىگىپ، امالداپ ءجۇرمىز. ءبىراق جاۋىن جاۋسا، لاشىعىمىز توڭكەرىلىپ، ءوزىمىزدى باسىپ قالادى. باسپاناڭ بولعانى قانداي باقىت!

دامۋشى ەلدەردە احۋال وسىلاي. دامىعان ەلدەر دە جەتىسىپ وتىرعان جوق. يسپانيادا كەيىنگى 12 جىلدا ۇيسىزدەر قاتارى 24 پايىز ءوستى. حالىقتىڭ شامامەن جارتىسى، پاتەر جالداپ، كۇنىن كورەدى.

يسپانيا بانكىنىڭ رەسمي ستاتيستيكاسىنا سايكەس، جالدامالى ۇيدە تۇراتىنداردىڭ شامامەن %45- ى كەدەي- كەپشىك. بۇل ەۋروپاداعى ەڭ جوعارى كورسەتكىش. يسپانيا تۇرعىندارى باسپانا باعاسىنىڭ قولجەتىمسىزدىگىنە كۇيىنىپ، شەرۋگە شىقتى. نارازى جۇرتتىڭ ايتۋىنشا، جالاقىنىڭ جارتىسىنان كوبى پاتەر جالداۋعا كەتەدى. ونىڭ قۇنى، اسىرەسە بارسەلونادا قاتتى شارىقتاپ تۇر.

كاتالوندىق تۇرعىن ءۇي اگەنتتىگىنىڭ مالىمەتىنە سايكەس، 2014 -جىلى ورتاشا جالعا الۋ اقىسى ايىنا 668 ەۋرو بولسا، بيىل ول 1132 ەۋروعا دەيىن وسكەن.

كارمە، جەرگىلىكتى جالعا الۋشىلار وداعىنىڭ وكىلى:

-ءبىز جالاقىمىزدىڭ جارتىسىن پاتەر جالداۋعا جۇمسايمىز. سوڭعى ون جىلدا قىزمەت اقىسى ەكى ەسە ءوستى. تاۋلىگىنە 8 ساعات قىزمەت ەتسەك، 4 ساعات ءۇي يەسى ءۇشىن جۇمىس ىستەيمىز. بۇل قاشانعى جالعاسا بەرەدى؟ ءبىز بيلىك وكىلدەرىن ءبىر امالىن تابۋعا شاقىردىق. ءبىراق قۇلاق اسقان ەشكىم جوق! ەگەر ولار جالداۋ اقىسىن تومەندەتپەسە، ءبىز نە ىستەۋ كەرەگىن جاقسى بىلەمىز.

ۇلى بريتانيادا 8,5 ميلليون ادام ءۇيسىز ءجۇر

ۇلى بريتانيادا جىلجىمايتىن مۇلىك ماسەلەسى جىلدار بويى شەشىمىن تاپپاي تۇر. Resolution Foundation ۇيىمىنىڭ مالىمەتى بويىنشا، بريتاندىق تۇرعىن ۇيلەر باسقا ەلدەرمەن سالىستىرعاندا الدەقايدا قىمبات، تار ءارى ەسكى. ولاي دەۋگە نەگىز بار. جەرگىلىكتى تۇرعىن ءۇي قورى انگليادا پاتەردىڭ ورتاشا اۋدانى ءبىر ادام ءۇشىن 38 شارشى مەتر دەگەن دەرەك كەلتىردى. ا ق ش (66 شارشى مەتر)، گەرمانيا (46 شارشى مەتر)، فرانسيا (43 شارشى مەتر)، ءتىپتى جاپونيا (40 شارشى مەتر) سياقتى دامىعان ەلدەرمەن سالىستىرعاندا بۇل كورسەتكىش تىم تومەن.

سوعان قاراماستان پاتەر جالداۋ قۇنى وتە قىمبات. وعان قوسا مۇنداعى تۇرعىن ۇيلەردىڭ ابدەن توزىعى جەتكەن. ءۇي ەسكىرگەن سايىن كوممۋنالدىق شىعىن دا ارتا بەرەدى. كورولدىكتە قازىر شامامەن 8,5 ميلليون ادام ءۇيسىز ءجۇر.

ا ق ش-تا دا جاعداي ءماز ەمەس

ا ق ش-تىڭ ەسەپ بيۋروسىنا سۇيەنسەك، امەريكاندىقتاردىڭ 110 ميلليونى ءۇي جالداپ تۇرادى. بۇل ەلدەگى ۇيلەردىڭ 36 پروتسەنتى. ال ولاردىڭ 64 پايىزى ساتىپ الىنعان ۇيلەر. ءۇيى بارلاردىڭ دەنى 65 جاستان اسقاندار جانە اق ءناسىلدى امەريكالىقتار. سەبەبى ءۇيدىڭ باعاسى مەن تابىستىڭ اراسىنداعى الشاقتىق جىل وتكەن سايىن ۇلعايىپ بارادى. ماسەلەن، وسىدان 50 جىل بۇرىن امەريكالىق وتباسىنىڭ ورتاشا تابىسى 10 مىڭ دوللار بولسا، سول كەزدەگى ءۇيدىڭ باعاسى 30 مىڭ دوللاردان اسپاعان. ال قازىرگى امەريكالىق وتباسىنىڭ ورتاشا تابىسى 74 مىڭ دوللاردىڭ توڭىرەگىندە، ال ءۇيدىڭ باعاسى ورتاشا ەسەپپەن 479 مىڭ دوللارعا دەيىن شارىقتاپ كەتكەن.

حالىقتى باسپانامەن قامتاماسىز ەتۋ ءۇشىن ۇكىمەت بىرنەشە كومەك ءتۇرىن ۇسىنادى. مىسالى، تابىسى تومەن، ارداگەرلەر نەمەسە كومەككە مۇقتاج جاندار كەزەككە تۇرۋ ارقىلى فەدەرالدى كومەككە قول جەتكىزە الادى. ءبىراق ولاردىڭ شەكتەۋلى بولۋى ماسەلەنى تولىقتاي شەشە المايدى.

دامىعان ەلدىڭ ءبىرى گەرمانيادا كەرىسىنشە جىلجىمايتىن مۇلىك باعاسى كۇرت تومەندەگەن. بۇل كەيىنگى 60 جىلدا بولماعان جاعداي. تاقاۋدا نەمىس ۇكىمەتى جاڭا جوسپارىن جاريا ەتتى. ول بويىنشا 2030 -جىلعا تامان ەلدە باسپاناسىز بىردە-ءبىر ادام قالمايدى. بيلىك قۇرىلىس كولەمىن ارتتىرىپ، ءۇي-كۇيى جوقتاردىڭ بارلىعىن تۇرعىن ۇيمەن قامتىماق. سونداي-اق ولارعا مەديتسينالىق كومەكتەن باستاپ، سيفرلىق تەحنولوگيالاردى مەڭگەرۋىنە جاعداي جاساۋدى كوزدەپ وتىر. ءبىراق بۇل جوسپاردىڭ جۇزەگە اسىۋ-اسپاۋى الداعى ۋاقىتتىڭ ەنشىسىندە. باستىسى، جىلجىمايتىن مۇلىك باعاسى جۇرتتى جارعا جىعىپ، الاڭداتپاسا يگى.

24.kz