ا ق ش سەناتورى قازاقستانمەن ساۋدا- ەكونوميكالىق قارىم- قاتىناستى دامىتۋ تۋرالى ايتتى
استانا. KAZINFORM – ا ق ش- تىڭ مەملەكەتتىك حاتشى لاۋازىمىنا ۇمىتكەر ماركو رۋبيو سارسەنبىدە سەناتتىڭ سىرتقى ىستەر كوميتەتىنىڭ مۇشەلەرى اراسىندا ترامپتىڭ جاڭا اكىمشىلىگىنە ەكى پارتيادان قولداۋ تاپتى. بۇل تۋرالى قازاقپاراتتىڭ اگەنتتىگىنىڭ مەنشىكتى ءتىلشىسى حابارلايدى.

كونگرەستەگى تىڭداۋدا كانديداتۋرانى بەكىتۋ بارىسىندا ماركو رۋبيوعا حالىقارالىق كۇن ءتارتىبى (ناتو، قىتاي، رەسەي تاعى باسقا) بويىنشا ءبىرقاتار سۇراق قويىلدى، ونىڭ اراسىندا دجەكسون-ۆەنيك تۇزەتۋىن جويۋ جانە قازاقستانعا «تۇراقتى قالىپتى ساۋدا قاتىناستارى» (PNTR) بار ەل مارتەبەسىن بەرۋ ماسەلەسى قوزعالدى. اتاپ ايتقاندا، سەناتور ستيۆ دەينس ورتالىق ازيا ەلدەرى كوپ ۆەكتورلى ديپلوماتيانى قولدانادى جانە امەريكا قۇراما شتاتتارىمەن ءوزارا ارەكەتتەسۋدى قالايدى دەپ حابارلادى.
- سايلاۋدان كەيىن 13 جىل بويى بىردە-ءبىر امەريكالىق سەناتور بارماعان ورتالىق ازياعا ساپار شەكتىم. سەناتور گەري پيتەرس ەكەۋمىزدىڭ العاشقى ماقساتىمىزدىڭ ءبىرى - ايماقتاعى دجەكسون- ۆەنيك تۇزەتۋلەرىن جويىپ، قازاقستان جانە وزبەكستانمەن تۇراقتى قالىپتى ساۋدا قاتىناستارىن كەڭەيتۋ، - دەدى ستيۆ دەينس.
سونىمەن قاتار سەناتور ماركو رۋبيودان «ءسىز مەنىمەن جانە سەناتور گەري پيتەرسپەن وسى ەرەجەنىڭ كۇشىن جويۋ ءۇشىن كومانداڭىزبەن بىرلەسىپ جۇمىس ىستەۋگە كەلىسەسىز بە؟»، - دەپ سۇرادى.
وعان ماركو رۋبيو بىلايشا جاۋاپ قاتتى:
- ءيا، مەنىڭشە، تۇپكىلىكتى جويۋ ءۇشىن زاڭنامالىق شارالار قاجەت. بۇل - وتكەن ءداۋىردىڭ قالدىعى. ولار شارتتاردى ورىندادى، سوندىقتان ءبىز سىزبەن بىرلەسىپ جۇمىس ىستەيمىز، - دەپ جاۋاپ بەردى ماركو.
ايماقتى تالقىلاۋدى اياقتاعان ستيۆ دەينس:
- بىزگە ورتالىق ازيادا كوپ دوس كەرەك. سىزدەرمەن جۇمىس ىستەۋدى اسىعا كۇتەمىن، - دەپ تولىقتىردى.
ءوز كەزەگىندە ماركو رۋبيو امەريكا قۇراما شتاتتارىنىڭ سىرتقى ساياساتىن پرەزيدەنت ايقىندايتىنىن ايتتى.
- ال مەنىڭ مىندەتىم - بۇل تۋرالى كەڭەس بەرۋ جانە ونى ورىنداۋ. مەنىڭ ويىمشا، پرەزيدەنت ايقىن ايتتى، ونىڭ ساياساتى امەريكانى قاۋىپسىز، كۇشتى ەتۋ ءارى وركەندەتۋ، - دەدى ول.
فلوريدالىق 53 جاستاعى رەسپۋبليكاشىل ماركو رۋبيو - امەريكانىڭ باس ديپلوماتى قىزمەتىن اتقاراتىن العاشقى يسپانيالىق ازامات. ول كۋبالىق يمميگرانتتاردىڭ ۇلى جانە العاش رەت 2010 -جىلى سەناتور بولىپ سايلاندى. ول مانسابى بارىسىندا قىتاي، يران، كۋبا جانە ۆەنەسۋەلا ماسەلەلەرى بويىنشا «سۇڭقار» لاقاپ اتىنا يە بولدى.
ايتا كەتسەك، بىرەر كۇن بۇرىن ا ق ش كونگرەسىندە گرەنلانديانى ساتىپ الۋ تۋرالى زاڭ جوباسى ۇسىنىلدى.
اۆتور
داۋلەت ىزتىلەۋ