ا ق ش پرەزيدەنتىنىڭ ۇلى زاڭسىز قارۋ ساقتاعانى ءۇشىن كىنالى دەپ تانىلدى
استانا. KAZINFORM - ا ق ش پرەزيدەنتىنىڭ ۇلى حانتەر بايدەن قارۋدى ساقتاۋ ەرەجەلەرىن بۇزعانى ءۇشىن كىنالى دەپ تانىلدى. ول 25 جىلعا دەيىن باس بوستاندىعىنان ايىرىلۋى مۇمكىن.

قازىلار القاسى ا ق ش پرەزيدەنتىنىڭ ۇلى حانتەر بايدەندى قارۋدى ساقتاۋ ەرەجەسىن بۇزدى دەپ تاپتى، دەپ حابارلايدى CNN.
امەريكا تاريحىندا العاش رەت ەل باسقارىپ تۇرعان پرەزيدەنتتىڭ بالاسىنا اۋىر قىلمىس جاسادى دەگەن ايىپ تاعىلىپ وتىر.
پروكۋرورلاردىڭ ايتۋىنشا، 54 جاستاعى حانتەر بايدەن 2018 -جىلى تاپانشا ساتىپ العان كەزدە تىزىلىمگە جالعان اقپارات كورسەتكەن. اتاپ ايتقاندا، ول ءوتىنىش بلانكىلەرىنە ءوزىنىڭ ناشاقورلىققا تاۋەلدىگى تۋرالى جالعان اقپارات بەرگەن.
كەيىنىرەك حانتەر قارۋدان قۇتىلۋ ءۇشىن ونى تاستاي سالعان. قارۋ دەلاۆەر شتاتىنىڭ گرينۆيلل قالاسىنداعى ازىق-تۇلىك دۇكەنىنەن تابىلعان. وسىلايشا تەرگەۋ باستالدى. اقىرىندا تەرگەۋشىلەر پرەزيدەنتتىڭ بالاسى ساتىپ الۋ كەزىندە تولتىرعان قۇجاتقا توقتالدى.
حانتەر 25 جىلعا دەيىن باس بوستاندىعىنان ايىرىلۋى جانە 750000 دوللارعا دەيىن ايىپپۇل تولەۋى مۇمكىن، ءبىراق CNN ەڭ جوعارى جازانى ەكىتالاي دەپ اتايدى، ويتكەنى بۇل - ونىڭ ءبىرىنشى اۋىر قىلمىس ءۇشىن سوتتالۋى.
سوت ۇكىمى ءالى بەلگىلەنگەن جوق، ءبىراق ول ادەتتە 120 كۇن ىشىندە، ياعني قازان ايىنىڭ ورتاسىندا جاريالانادى.
دجو بايدەن سوت ۇكىمىنە رەاكسيا ءبىلدىرىپ، ناشاقورلىققا تاۋەلدىلىگىن جەڭگەن ۇلىن قولدادى.
- مەن پرەزيدەنتپىن، ءبىراق، سونىمەن قاتار اكەمىن. دجيل ەكەۋمىز ۇلىمىزدى جاقسى كورەمىز جانە بۇگىن ونى ماقتان تۇتامىز... مەن بۇل ءىستىڭ ناتيجەسىن قابىلدايمىن جانە حانتەردىڭ اپەللياتسيالىق شاعىمىن قاراستىرعان ساتتە سوت پروتسەسىن قۇرمەتتەيمىن، - دەدى ول.
اۆتور
جاراسقان نۇرىبايەۆ