ا ق ش پرەزيدەنتى دجو بايدەن يزرايلگە بارادى

Израиль
Фото: Фото: Джейкоб Мэттингли

ا ق ش پرەزيدەنتى دجو بايدەن سارسەنبى كۇنى يزرايلگە بارادى. بۇل تۋرالى ا ق ش مەملەكەتتىك حاتشىسى ەنتوني بلينكەن ءمالىم ەتتى، دەپ حابارلايدى Kazinform اگەنتتىگى CNN- گە سىلتەمە جاساپ.

ا ق ش مەملەكەتتىك حاتشىسىنىڭ يزرايلگە جاساعان سوڭعى ساپارى ونىڭ تاياۋ شىعىستاعى جەتى ەلگە جاساعان تۋرىنىڭ ءبىر بولىگى بولدى. ويتكەنى، يزرايل گازا سەكتورىنا باسىپ كىرۋگە دايىن كورىنەدى جانە قاقتىعىستىڭ ايماقتىڭ باسقا بولىكتەرىنە تاراۋ قاۋپى بار.

يزرايلگە ساپارى بارىسىندا بايدەن يزرايلدىڭ گازا سەكتورىنداعى وپەراتسياسى تۋرالى جوسپارىن بىلەدى. وپەراتسيا بەيبىت تۇرعىنداردىڭ شىعىنىن بارىنشا ازايتاتىنداي جانە گازا سەكتورىنداعى بەيبىت تۇرعىندارعا جەتكىزىلەتىن گۋمانيتارلىق كومەك حاماس- قا پايدا اكەلمەيتىندەي بولۋى كەرەك.

ا ق ش مەملەكەتتىك حاتشىسىنىڭ ايتۋىنشا، بايدەننىڭ ساپارى بولىپ جاتقان جاعدايدى پايدالانىپ، يزرايلگە شابۋىل جاساعىسى كەلەتىن ەلدەرگە ەسكەرتۋ بولۋى كەرەك.

- ا ق ش پرەزيدەنتى يزرايلدىك سەرىكتەستەرىمەن حاماس تاراپىنان كەپىلگە الىنعان ەرلەردى، ايەلدەر مەن كىشكەنتاي بالالاردى بوساتۋدى قامتاماسىز ەتۋ ارەكەتىن جالعاستىرادى، - دەدى بلينكەن.

سارسەنبى كۇنى يزرايلگە ساپارىمەن قاتار بايدەن ا ق ش- تىڭ جاقىن وداقتاسى يوردانياعا دا بارادى. اق ءۇي تاراتقان مالىمەتكە سايكەس، ول تاياۋ شىعىس ەلدەرىنىڭ ءبىر توپ باسشىلارىمەن، سونىڭ ىشىندە يوردانيا كورولى ابداللا 2، مىسىر پرەزيدەنتى ابدەل فاتتاح اس- سيسي جانە پالەستينا اۆتونومياسىنىڭ باسشىسى ماحمۋد ابباسپەن كەزدەسەدى.

ۇلتتىق قاۋىپسىزدىك كەڭەسىنىڭ وكىلى دجون كيربي جۋرناليستەرگە بەرگەن سۇحباتىندا بايدەننىڭ يوردانياداعى باستى نازارى داعدارىس كەزىندە گۋمانيتارلىق كومەك كورسەتۋ بولاتىنىن ايتتى.

12- قازاندا ا ق ش مەملەكەتتىك حاتشىسى انتوني بلينكەن يزرايلگە بارىپ، يزرايل پرەمەر- مينيسترى بينيامين نەتانياحۋمەن، ونىڭ قاۋىپسىزدىك كابينەتىمەن جانە ەل پرەزيدەنتى يسااك گەرتسوگپەن كەزدەستى.

ءتورت كۇننەن كەيىن بلينكەن التى اراب مەملەكەتىندەگى كەلىسسوزدەردەن كەيىن حاماس- قا قارسى كۇش- جىگەردى ۇيلەستىرۋ جانە گازا سەكتورىنداعى گۋمانيتارلىق داعدارىستى شەشۋ جولدارىن ىزدەۋ ءۇشىن يزرايلگە ورالدى.

اۆتور

ەركەجان سماعۇلوۆا

سوڭعى جاڭالىقتار