وسكەمەندە بالاباقشا ەسەپشىسى 16 ميلليون تەڭگە جىمقىرعان
وسكەمەن. KAZINFORM - وسكەمەن قالاسىندا 16 ميلليون تەڭگە جىمقىرعان بالاباقشا ەسەپشىسىنە قاتىستى سوت ۇكىمى شىقتى.
قالالىق №2 سوتى باسپا ءسوز قىزمەتىنىڭ مالىمەتىنە سۇيەنسەك، مەملەكەتتىك «جەمچۋجينكا» بالاباقشاسىندا ەسەپشى بولىپ جۇمىس ىستەگەن ايىپتالۋشى بىرنەشە جىل بويى اقشا جىمقىرىپ كەلگەن.
«2020 -جىلدىڭ قاراشاسى مەن 2023 -جىلدىڭ قازان ايلارى ارالىعىندا ايەل ادام قىزمەت بابىن پايدالانىپ، جۇمىس بەرۋشىنىڭ 15988396 تەڭگەسىن قالتاعا باسقان. سوت بارىسىندا ول ءوز كىناسىن مويىنداماي، كەلتىرىلگەن ماتەريالدىق زالالدى وتەۋدەن باس تارتتى. سوت شەشىمىمەن سوتتالۋشى كىنالى دەپ تانىلىپ، بەس جىل مەرزىمگە باس بوستاندىعىنان ايىرىلدى»، - دەلىنگەن اقپاراتتا.
ايەل ادامنىڭ كامەلەتتىك جاسقا تولماعان بالاسىنىڭ بولۋىنا بايلانىستى جازانى وتەۋ مەرزىمى 3 جىلعا شەگەرىلدى. ۇكىم ءالى زاڭدى كۇشىنە ەنگەن جوق.
ەسكە سالساق، وسىعان دەيىن وسكەمەندە ءوزىن وبلىس اكىمىنىڭ ورىنباسارى رەتىندە تانىستىرىپ، كاسىپكەردەن 50 ميلليون تەڭگە العان الاياق سوتتالعانى حابارلانعان.
اۆتور
تالعاتجان مۇحامەتبەك ۇلى
