ا ق ش قۇپيا قىزمەتىنىڭ باسشىسى وتستاۆكاعا كەتتى

استانا. KAZINFORM - ا ق ش قۇپيا قىزمەتىنىڭ ديرەكتورى كيمبەرلي چيتل وتستاۆكاعا كەتۋ تۋرالى ءوتىنىش جازدى. بۇل تۋرالى CNN تەلەارناسى ءوز دەرەككوزدەرىنە سىلتەمە جاساي وتىرىپ حابارلادى.

چيتلدىڭ قىزمەتتەن كەتۋىنە ەكس-پرەزيدەنت دونالد ترامپقا جاسالعان قاستاندىق سەبەپ بولعانى ايتىلادى. بۇعان دەيىن ا ق ش كونگرەسىنىڭ وكىلدەرى قاۋىپسىزدىكتىڭ ساقتالماعانىنا بايلانىستى قۇپيا قىزمەتتىڭ ديرەكتورىن قىزمەتتەن كەتۋگە شاقىرعان بولاتىن. الايدا كيمبەرلي چيتل بۇل ۇندەۋدى قابىلداۋدان باس تارتىپ، ءوزىن «قۇپيا قىزمەتتى باسقارۋعا قابىلەتتى» دەپ سانايتىنىن جەتكىزگەن.

كيمبەرلي چيتل كونگرەستەگى تىڭداۋدا دونالد ترامپقا جاسالعان شابۋىلدى سوڭعى ونجىلدىقتاعى ەڭ ۇلكەن ساتسىزدىك دەپ اتادى.

- قۇپيا قىزمەتتىڭ قاسيەتتى ميسسياسى - ۇلتىمىزدىڭ كوشباسشىلارىن قورعاۋ، - دەدى ول پالاتانىڭ باقىلاۋ كوميتەتىندەگى شيەلەنىستى تىڭداۋ كەزىندە. - 13-شىلدەدە ءبىز بۇل تاپسىرمانى ورىنداي المادىق. ا ق ش قۇپيا قىزمەتىنىڭ ديرەكتورى رەتىندە مەن كەز كەلگەن قاۋىپسىزدىكتىڭ بۇزىلعانى ءۇشىن تولىق جاۋاپكەرشىلىكتى ءوز موينىما الامىن. قاتەلىك كەتكەنى انىق جانە بۇل ەندى قايتالانباۋى ءۇشىن بار كۇشىمىزدى سالامىز.

ەسكە سالا كەتەيىك، ا ق ش-تىڭ پەنسيلۆانيا شتاتىنداعى باتلەر قالاسىندا سايلاۋالدى ناۋقان كەزىندە دونالد ترامپقا قاستاندىق جاسالدى. 20 جاستاعى توماس مەتيۋ كرۋكس ترامپ سويلەي باستاعاننان بىرنەشە مينۋتتان سوڭ اۆتوماتتان وق جاۋدىردى.

تىڭداۋدى اشقان قاداعالاۋ كوميتەتىنىڭ ءتوراعاسى رەسپۋبليكالىق دجەيمس كومەر وقيعانىڭ الدىن الۋعا بولاتىنىن ايتتى.

اۆتور

ەركەجان سماعۇلوۆا