ا ق ش پەن ونىڭ وداقتاستارى يزرايل مەن «حەزبوللا» اراسىنداعى اتىستى 21 كۇنگە توقتاتۋعا شاقىردى

استانا. KAZINFORM - ا ق ش، فرانسيا جانە ولاردىڭ كەيبىر وداقتاستارى يزرايل مەن «حەزبوللا» اراسىنداعى اتىستى 21 كۇنگە دەرەۋ توقتاتۋعا شاقىردى. سونىمەن قاتار گازاداعى بىتىمگە قولداۋ ءبىلدىردى. بۇل تۋرالى سارسەنبى كۇنى ب ۇ ۇ قاۋىپسىزدىك كەڭەسىنىڭ ليۆان ماسەلەسى بويىنشا شۇعىل وتىرىسىنان كەيىن اق ءۇي تاراتقان بىرلەسكەن مالىمدەمەدە ايتىلدى.

وتىنىشكە ا ق ش، اۋستراليا، كانادا، ەۋروپالىق وداق، فرانسيا، گەرمانيا، يتاليا، جاپونيا، ساۋد ارابياسى، بىرىككەن اراب امىرلىكتەرى، ۇلى بريتانيا جانە قاتار قول قويدى. ولار يزرايل مەن ليۆان ۇكىمەتتەرىن اتىستى ۋاقىتشا توقتاتۋعا دەرەۋ كەلىسۋگە شاقىردى.

- 2023 -جىلدىڭ 8-قازانىنان بەرى ليۆان مەن يزرايل اراسىنداعى جاعداي ادام توزگىسىز جانە ايماقتىق شيەلەنىس قاۋپىن توندىرەدى. بۇل يزرايل حالقىنىڭ دا، ليۆان حالقىنىڭ دا مۇددەسىنە سايكەس كەلمەيدى.. . ءبىز بارلىق تاراپتاردى، سونىڭ ىشىندە يزرايل مەن ليۆان ۇكىمەتتەرىن وسى كەزەڭدەگى ب ۇ ۇ قاۋىپسىزدىك كەڭەسىنىڭ 1701 قارارىنا سايكەس ۋاقىتشا اتىستى توقتاتۋدى دەرەۋ ماقۇلداۋعا جانە ديپلوماتيالىق رەتتەۋگە ناقتى مۇمكىندىك بەرۋگە شاقىرامىز، - دەلىنگەن بىرلەسكەن مالىمدەمەدە.

- ءبىز بۇل تالقىلاۋلاردى ءبىراز ۋاقىتتان بەرى جۇرگىزىپ كەلەمىز، - دەدى Reuters اگەنتتىگىنە جوعارى لاۋازىمدى امەريكالىق شەنەۋنىك.

ايتۋىنشا، ۆاشينگتون مەن ونىڭ وداقتاستارى وسى 21 كۇندىك ءۇزىلىس كەزىندە بۇل كەلىسسوزدەردى بۇدان كەڭىرەك كەلىسىمگە اينالدىرۋعا نيەتتى.

يزرايلدىڭ ب ۇ ۇ- داعى وكىلى شاقىرۋدى قۇپتاپ، يزرايلدىڭ ديپلوماتيالىق شەشىمدى قالايتىنىن ايتتى. ەگەر كەلىسىم يزرايلدىكتەردىڭ ۇيلەرىنە امان-ەسەن ورالۋىنا مۇمكىندىك بەرمەسە، يزرايل كۇش قولدانۋدان تارتىنبايتىنىن ەسكەرتتى، دەپ جازادى The Times of Israel.

باسىلىمنىڭ حابارلاۋىنشا، يزرايل مەن ليۆان الداعى ساعاتتاردا جاۋاپ بەرۋى ءتيىس، ال يران «حەزبوللاعا» تولىق قولداۋ كورسەتۋگە ۋادە بەردى.

يزرايل مەن يراننىڭ قولداۋىنداعى «حەزبوللا» اراسىنداعى شايقاس سوڭعى اپتادا كۇرت شيەلەنىسىپ، جاپپاي سوعىستىڭ از-اق الدىندا تۇر، بۇل قاقتىعىس بۇكىل تاياۋ شىعىسقا تارالۋى مۇمكىن دەگەن الاڭداۋشىلىق تۋعىزدى.

اۆتور

ەركەجان سماعۇلوۆا