ا ق ش پەن قىتاي اراسىنداعى ساۋدا سوعىسى ءورشىپ بارادى
استانا. قازاقپارات - قىتاي ا ق ش ونىمدەرىنە قارىمتا تاريف ەنگىزەدى، دەپ حابارلايدى 24kz.
كەلەسى اپتادان باستاپ امەريكادان كەلەتىن اۋىلشارۋاشىلىق تاۋارلارىنا %10 مەن %15 ارالىعىندا قوسىمشا باج سالىعى سالىنادى. بۇعان دەيىن دونالد ترامپ قىتايلىق ونىمدەرگە الىمدى 2 ەسە ۇلعايتىپ، %20- كە دەيىن كوتەرىپ جىبەرگەن ەدى.
«سەبەبى بەيجىڭ ەسىرتكى ساۋداسىمەن دۇرىس كۇرەسپەي وتىر»، - دەيدى ول. ءبىراق بۇل شەشىم قىتاي تارابىنىڭ نارازىلىعىن تۋدىرىپ، كورشى ەل دۇنيەجۇزىلىك ساۋدا ۇيىمىنا شاعىم ءتۇسىردى.
لين جيان، قىتاي سىرتقى ىستەر مينيسترلىگىنىڭ رەسمي وكىلى:
- ەگەر ا ق ش-تا ەسىرتكى ساۋداسىمەن كۇرەسكە قاتىستى سۇراقتار بولسا، وندا قىتايمەن ءوزارا تەڭدىك جانە ءوزارا سىيلاستىق نەگىزىندە كەڭەس باستاۋى كەرەك ەدى. ءبىراق امەريكالىقتار ساۋدا سوعىسىن تاڭداپ وتىر. وندا قىتاي سوڭىنا دەيىن بارادى. ءبىز ا ق ش- تى سەس كورسەتۋدەن باس تارتىپ، ديالوگقا كەلۋگە شاقىرامىز.
