ا ق ش كونگرەسىندە بيلىك اۋىسۋى مۇمكىن: دەموكراتتار وكىلدەر پالاتاسىن باقىلاۋعا الماق
استانا. قازاقپارات - NBC News بولجامدارىنا قاراعاندا، دەموكراتتار وكىلدەر پالاتاسىن سوڭعى جيىرما جىلدا ەڭ ۇلكەن ايىرماشىلىقپەن باقىلاۋعا الدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
تالداۋعا سايكەس، دەموكراتتار وكىلدەر پالاتاسىنداعى 435 ورىننىڭ شامامەن 248- ءىن جەڭىپ الماق. قورىتىندى ناتيجە وسى بولجامنان بىرنەشە ورىنعا كوپ نەمەسە از بولۋى مۇمكىن، ءبىراق سونىڭ وزىندە دەموكراتيالىق پارتيا پالاتاداعى باسىمدىققا يە بولۋ ءۇشىن قاجەتتى 218 ورىننان ايتارلىقتاي كوپ ماندات الماق.
دەموكراتتارعا پالاتاداعى باسىمدىقتى قايتارىپ الۋ ءۇشىن قوسىمشا ءۇش ورىن عانا الۋ قاجەت ەدى. بولجامعا سايكەس، ولار بۇرىن رەسپۋبليكالىق پارتيا يەلەنگەن كوپتەگەن ورىنداردى قايتارىپ الدى. ولار، اسىرەسە دونالد ترامپ 2024 -جىلعى سايلاۋدا جەڭىپ العان وكرۋگتەردە كوپ جەتىستىككە جەتىپ وتىر.
دەموكراتتاردىڭ جەڭىسى ترامپ قابىلداعان شارالداردى كوپشىلىكتىڭ قولداماۋىنا قاتىستى رەفەرەندىم ەكەنى ايتىلىپ ءجۇر. اتاپ ايتقاندا، اق ءۇي باسشىسى قاتايتقان يمميگراتسيالىق زاڭدار، يرانداعى سەگىز ايلىق سوعىس، بەنزين، ازىق-تۇلىك جانە باسقا دا تاۋارلاردىڭ باعاسىنىڭ وسۋىنە اكەپ سوقتىرعان ا ق ش وداقتاستارىنىڭ تاۋارلارىنا ەنگىزىلگەن تاريفتەر امەريكالىقتارعا ۇناي قويماعان.
2027 -جىلدىڭ 3-قاڭتارىندا، جاڭا ا ق ش كونگرەسى قىزمەتىنە كىرىسكەن كەزدە، وكىلدەر پالاتاسىن دەموكراتيالىق پارتيا باقىلاۋى مۇمكىن. بۇل ترامپتىڭ ەكىنشى مەرزىمىندە كونگرەستى تولىق باقىلاماعان العاشقى جاعداي بولعالى تۇر.
امەريكالىقتار وكىلدەر پالاتاسىنىڭ بارلىق 435 مۇشەسىن جانە سەناتتىڭ ۇشتەن ءبىر بولىگىن، ياعني 100 سەناتوردىڭ 35- ءىن سايلايتىنىن بۇعان دەيىن دە جازعان ەدىك. پوشتا ارقىلى جىبەرىلگەن بيۋللەتەندەردى، سونداي-اق باسقا دا داۋىستاردى ساناۋ سايلاۋ ۋچاسكەلەرى جابىلعاننان كەيىن دە جالعاسۋى مۇمكىن. سوندىقتان، كەيبىر وكرۋگتەردەگى قورىتىندى ناتيجەلەر بىرنەشە كۇن نەمەسە اپتادان كەيىن انىقتالۋى مۇمكىن.
46 سايلاۋ وكرۋگى (12 پايىز) نەگىزگى ساياسي تارتىس الاڭىنا اينالماق.
