ا ق ش «ۇشاتىن تارەلكە» تۋرالى قۇپيا ماتەريالدار جاريالادى: استروناۆتار ايدا نە كوردى
استانا. KAZINFORM - ا ق ش قورعانىس مينيسترلىگى PURSUE اتتى اقپاراتتى قۇپياسىزداندىرۋ باستاماسى اياسىندا بەلگىسىز ۇشاتىن نىساندارعا (ب ۇ ن) قاتىستى دەرەكتەردى تۇراقتى تۇردە جاريالاي باستايتىنىن مالىمدەدى. ءتيىستى حابارلامانى اتالعان مينيسترلىك تاراتتى.
رەسمي مالىمدەمەدە:
- بۇگىن قورعانىس مينيسترلىگى ب ۇ ن- دى بايقاۋ جاعدايلارى تۋرالى پرەزيدەنتتىك اشىقتىق جانە ەسەپ بەرۋ جۇيەسى (PURSUE) اياسىندا بۇرىن جاريالانباعان جاڭا قۇجاتتاردى ورنالاستىرۋدىڭ العاشقى كەزەڭى باستالعانىن حابارلايدى. بۇل ۆەدومستۆوارالىق باعدارلاما اق ءۇي، ۇلتتىق بارلاۋ ديرەكتورىنىڭ كەڭسەسى، ەنەرگەتيكا مينيسترلىگى، بارلىق سالاداعى انوماليالاردى زەرتتەۋ باسقارماسى، NASA، FBI جانە ا ق ش بارلاۋ قاۋىمداستىعىنداعى وزگە قۇرىلىمداردىڭ كۇشىن بىرىكتىرەدى، - دەلىنگەن.
ۆەدومستۆو وكىلدەرى قۇپياسىزداندىرىلعان فايلدارعا پەنتاگوننىڭ رەسمي سايتىنداعى ارنايى ءبولىم ارقىلى قول جەتكىزۋگە بولاتىنىن ءتۇسىندىردى.
- سوعىس مينيسترلىگى قۇجاتتاردىڭ كەلەسى توپتامالارىن تۇراقتى نەگىزدە جاريالاپ وتىرادى، - دەپ قوستى مينيسترلىك.
العاشقى جاريالانعان ماتەريالدار پاكەتىنە Apollo 17 ميسسياسى كەزىندە تۇسىرىلگەن ارحيۆتىك فوتوسۋرەتتەر، 2025- 2026 -جىلدارداعى اسكەري باقىلاۋ دەرەكتەرى جانە ءالى كۇنگە دەيىن ناقتى تۇسىندىرىلمەگەن بىرنەشە وقيعانىڭ سيپاتتامالارى ەنگەن.
قۇجاتتار اراسىندا اي بەتىندە تۇسىرىلگەن فوتوسۋرەتتەر دە بار. وندا ءارتۇرلى كولەمدەگى جانە پىشىندەگى جارقىراعان نۇكتەلەرگە ۇقساس نىساندار بايقالاتىنى ايتىلعان.
سونىمەن قاتار جاريالانعان ماتەريالدارعا «اپوللون» جانە Gemini 7 عارىش كەمەلەرى ەكيپاجدارىنىڭ راديوبايلانىس جازبالارىنىڭ ستەنوگراممالارى ەنگىزىلگەن. بۇل جازبالاردا ەكيپاج مۇشەلەرى كەمە سىرتىندا بايقالعان ەرەكشە جارىق نىساندارىن سيپاتتايدى.
كەيبىر كۋالىكتەردە باقىلانعان نىسانداردىڭ عارىش كەڭىستىگىندە رەتسىز ءارى بەيبەرەكەت قوزعالعانى ايتىلعان. الايدا جاريالانعان قۇجاتتاردا بۇل قۇبىلىستاردىڭ تابيعاتىنا ناقتى تۇسىنىكتەمە بەرىلمەگەن.
- يلليۋميناتوردىڭ ار جاعىندا كوپتەگەن ۇلكەن جارىقتار تۇر. ولار وتە تەگىس ەمەس، بۇرىشتى بولشەكتەرگە ۇقسايدى جانە كەڭىستىكتە اينالىپ ءجۇر، - دەلىنگەن ماتەريالداردىڭ بىرىندە.
بۇل اقپاراتتى جاريالاۋ جوسپارى تۋرالى ءساۋىر ايىنىڭ سوڭىندا ا ق ش پرەزيدەنتى دونالد ترامپ مالىمدەگەن ەدى. ونىڭ ايتۋىنشا، ول جاقىندا امەريكالىق اسكەري ۇشقىشتارمەن ب ۇ ن تاقىرىبىن تالقىلاعان.
ترامپتىڭ سوزىنشە، ۇشقىشتار وزدەرى «سەنۋ قيىن نارسەلەردى» كورگەنىن ايتقان.
