ا ق ش ب ۇ ۇ قاۋىپسىزدىك كەڭەسىنىڭ گازادا ادامدارعا وق جاۋدىرۋىن ايىپتاعان مالىمدەمەسىنە توسقاۋىل قويدى
استانا. KAZINFORM - ا ق ش ب ۇ ۇ قاۋىپسىزدىك كەڭەسىنىڭ گازا سەكتورىندا گۋمانيتارلىق كومەك ءۇشىن جينالعان پالەستينالىقتاردى يزرايلدىڭ اتقىلاۋىن ايىپتاعان مالىمدەمە قابىلداۋىنا كەدەرگى جاسادى.
وقيعا سالدارىنان 100 دەن استام ادام زارداپ شەكتى، 750 دەن استامى جاراقات الدى، دەپ حابارلايدى Anadolu اقپارات اگەنتتىگى.
قاۋىپسىزدىك كەڭەسىنىڭ جابىق وتىرىسىنان كەيىن قانداي دا ءبىر مالىمدەمە جاسالعان جوق. يزرايلگە قاتىستى سىني مالىمدەمەلەردى قامتيتىن قارار جوباسى ا ق ش- تىڭ ب ۇ ۇ جانىنداعى تۇراقتى وكىلدىگى تاراپىنان ماقۇلدانعان جوق.
قارار جوباسىندا بولعان وقيعاعا قاتىستى قاتتى الاڭداۋشىلىق بىلدىرىلگەن.
قۇجات بارلىق تاراپتى حالىقارالىق گۋمانيتارلىق قۇقىققا سايكەس گازا سەكتورىنداعى بەيبىت تۇرعىنداردى نەگىزگى قىزمەتتەر مەن گۋمانيتارلىق كومەككە قولجەتىمدىلىكتەن ايىرۋدان باس تارتۋعا شاقىرادى.
جوبا اۆتورلارى سونداي-اق شۇعىل شارالار قابىلدانباسا، گازا سەكتورىنىڭ 2,2 ميلليون حالقىنا اسەر ەتەتىن وتكىر ازىق-تۇلىك داعدارىسى قاۋپى ءتونىپ تۇرعانىن ەسكەرتتى.
قاۋىپسىزدىك كەڭەسىنىڭ مۇشەلەرى گازاعا گۋمانيتارلىق كومەك اعىنىن جەڭىلدەتۋ ءۇشىن يزرايلدى باقىلاۋ-وتكىزۋ بەكەتىن جاپپاۋعا شاقىردى.
گازا سەكتورىندا گۋمانيتارلىق كومەك كۇتكەن پالەستينالىقتارعا يزرايل ارمياسىنىڭ جاساعان سوققىسىنان قازا تاپقاندار سانى 112 ادامعا جەتتى، تاعى 760 ادام جاراقات العان.
بۇعان دەيىن حابارلانعانداي، بىرىككەن ۇلتتار ۇيىمىنىڭ (ب ۇ ۇ) باس حاتشىسى انتونيۋ گۋتەرريش گازا سەكتورىندا كومەك كۇتىپ تۇرعان 100-دەن استام بەيبىت تۇرعىننىڭ ءومىرىن قيعان شابۋىلدى ايىپتاپ، گۋمانيتارلىق اتىستى تەز ارادا توقتاتۋعا شاقىردى.
اۆتور
زارينا تۋعانبايەۆا
