ا ق ش اسكەري بازالارى ەلەكتر قۋاتى مەن سۋعا تاۋەلسىز جۇمىس ىستەۋگە كوشەدى
استانا. KAZINFORM — ا ق ش قورعانىس مينيسترلىگى اۋقىمدى اسكەري قاقتىعىس تۋىنداعان جاعدايدا ەلدەگى ءىرى اسكەري بازالاردىڭ كەمىندە 90 كۇن بويى دەربەس جۇمىس ىستەۋىن قامتاماسىز ەتۋگە دايىندالىپ جاتىر. بۇل تۋرالى Anadolu اگەنتتى جازدى.
Fox News مالىمەتىنشە، دايىندىق جۇمىستارى FORTRESS باستاماسى اياسىندا جۇرگىزىلىپ جاتىر. ونىڭ ماقساتى - ازاماتتىق ينفراقۇرىلىمدا اقاۋلار تۋىنداعان جاعدايدا دا اسكەري نىسانداردىڭ ۇزدىكسىز جۇمىس ىستەۋىن قامتاماسىز ەتۋ.
جوسپارعا سايكەس، ا ق ش- تىڭ قۇرلىقتىق بولىگىندەگى ءىرى اسكەري بازالار كەمىندە 90 كۇن بويى ەلەكتر ەنەرگياسىمەن، سۋمەن، وتىنمەن جانە بايلانىسپەن ءوز بەتىنشە قامتاماسىز ەتىلۋى ءتيىس.
باعدارلاما اياسىندا پەنتاگون قارۋ-جاراق پەن وتىننىڭ ستراتەگيالىق قورىن جاساقتاۋدى، بالاما جەتكىزۋ تىزبەكتەرىن قۇرۋدى جانە داعدارىس كەزىندە ازاماتتىق كاسىپورىنداردى قورعانىس ونىمدەرىن شىعارۋعا بەيىمدەۋ مۇمكىندىگىن قاراستىرىپ وتىر.
بۇدان بولەك، موبيلدى يادرولىق رەاكتورلاردى، ەنەرگيانى ساقتاۋعا ارنالعان ءىرى اككۋمۋلياتورلىق جۇيەلەردى جانە جەرگىلىكتى ەلەكتر جەلىلەرىن پايدالانۋ جوسپارلانعان. بۇل تەحنولوگيالار ازاماتتىق ەلەكتر جەلىلەرىنەن ۇزاق ۋاقىتقا اجىراتىلعان جاعدايدا دا اسكەري نىسانداردىڭ جۇمىسىن جالعاستىرۋعا مۇمكىندىك بەرەدى.
پەنتاگون وكىلى شون پارنەلل Anadolu اگەنتتىگىنە بەرگەن تۇسىنىكتەمەسىندە ۇلتتىق قورعانىستىڭ ازاماتتىق ينفراقۇرىلىمعا تاۋەلدى بولۋى ەلەۋلى قاۋىپ توندىرەتىنىن اتاپ ءوتتى.
«ۇلتتىق قورعانىستى قامتاماسىز ەتۋ كەزىندە قاراپايىم ازاماتتىق ينفراقۇرىلىمعا تاۋەلدى بولعىمىز كەلمەيدى. ءبىز مۇنداي تاۋەكەلگە بارا المايمىز. بۇل - جول بەرۋگە بولمايتىن قاۋىپ»، — دەدى ول.
پارنەلل FORTRESS باستاماسىن ا ق ش- تىڭ قورعانىس قابىلەتىن ساقتاۋعا ارنالعان وزىندىك ساقتاندىرۋ تەتىگىنە تەڭەدى. ونىڭ ايتۋىنشا، ەلەكتر ەنەرگياسىنىڭ ءۇزىلۋى بايلانىس جۇيەلەرىنىڭ، سۋمەن جابدىقتاۋدىڭ، لوگيستيكانىڭ جانە اسكەري باسقارۋ ورگاندارىنىڭ جۇمىسىنا كەدەرگى كەلتىرۋى مۇمكىن.
ول بۇعان دەيىن ا ق ش- تىڭ قورعانىس تۇجىرىمداماسى ەلدىڭ ەكى مۇحيتتىڭ اراسىندا ورنالاسۋىنا، ياعني گەوگرافيالىق ارتىقشىلىعىنا ەداۋىر دارەجەدە سۇيەنگەنىن ايتتى. الايدا قازىرگى زامانعى قاۋىپ-قاتەرلەر بۇل ءتاسىلدى قايتا قاراۋدى تالاپ ەتەدى.
وسى ورايدا پەنتاگون وكىلى ا ق ش پرەزيدەنتى دونالد ترامپتىڭ گرەنلاندياعا، پاناماعا جانە باتىس جارتىشارعا قاتىستى ماسەلەلەرگە نازار اۋدارعانىن، سونداي-اق «التىن كۇمبەز» دەپ اتالاتىن ۇلتتىق زىمىرانعا قارسى قورعانىس جۇيەسىن قۇرۋ جوسپارىن اتاپ ءوتتى.
بۇعان دەيىن ا ق ش تاياۋ شىعىس بازالارىنداعى اسكەرىن ازايتىپ جاتقانىن جازدىق.
