42 قارجى پيراميداسى جويىلدى: پرەزيدەنت قارجىلىق مونيتورينگ اگەنتتىگى ءتوراعاسىن قابىلدادى
استانا. KAZINFORM - مەملەكەت باسشىسى قارجىلىق مونيتورينگ اگەنتتىگىنىڭ ءتوراعاسى جانات ەليمانوۆتى قابىلدادى. پرەزيدەنتكە ۆەدومستۆونىڭ 2024 -جىلى اتقارعان جۇمىسىنىڭ نەگىزگى قورىتىندىلارى مەن الداعى كەزەڭگە ارنالعان مىندەتتەرى جونىندە مالىمەت بەرىلدى.
قارجىلىق مونيتورينگ اگەنتتىگىنىڭ ءتوراعاسى مەملەكەت باسشىسىنا 2023-2025 -جىلدارعا ارنالعان كەشەندى جوسپاردىڭ ءىس- شارالارىن جۇزەگە اسىرۋ كولەڭكەلى ەكونوميكا دەڭگەيىن 1,3 پايىزعا تومەندەتۋگە مۇمكىندىك بەرگەنىن باياندادى.
اتاپ ايتقاندا، اگەنتتىك 1312 قىلمىستىق ءىستى تەرگەپ-تەكسەرۋدى اياقتاپ، ناتيجەسىندە 236,8 ميلليارد تەڭگەنىڭ زالالىن وتەدى. قىلمىستىق جولمەن تابىلعان 152,3 ميلليارد تەڭگە كىرىس تاركىلەندى.
سونىمەن قاتار ۇيىمداسقان قىلمىستىق توپتارعا قاتىستى 20 جانە ترانسۇلتتىق توپپەن بايلانىستى 1 سوتقا دەيىنگى تەرگەپ-تەكسەرۋ امالدارى باستالدى. 42 قارجى پيراميداسى جويىلىپ، الاياقتىق سحەمالاردى جارنامالايتىن 15 مىڭعا جۋىق سايت پەن اككاۋنت بۇعاتتالدى، مەسسەندجەرلەردەگى 327 چات جابىلدى. وسىلايشا 2 ميلليوننان استام ازاماتتىڭ قارجىلاي شىعىنعا ۇشىراۋىنا جول بەرىلمەدى.
بۇدان بولەك، الەۋمەتتىك جەلىلەردەگى 41 ونلاين قۇمار ويىن الاڭى، استىرتىن جۇمىس ىستەيتىن 30 ويىن زالى، كازينو مەن بۋكمەكەرلىك كەڭسە اشكەرەلەندى. 11,7 مىڭنان استام ونلاين-كازينو سايتىنا كىرۋگە توسقاۋىل قويىلدى.
اگەنتتىك قىزمەتكەرلەرى 120 ميلليارد تەڭگە كولەمىندەگى نەگىزسىز بيۋدجەت شىعىندارىنىڭ الدىن الىپ، زاڭسىز كريپتو الماستىرۋشى ارقىلى قىلمىستىق كىرىستەردى زاڭداستىرۋعا نيەتتەنگەن 36 ارەكەتتىڭ جولىن كەستى.
پرەزيدەنتكە قازاقستان، بەلارۋس جانە رەسەي مەملەكەتتەرىنىڭ قارجى بارلاۋشىلارى بىرلەسە جۇرگىزگەن ارنايى وپەراتسيانىڭ قورىتىندىسى تۋرالى ەسەپ بەرىلدى. ونىڭ ناتيجەسىندە ءۇش اۋقىمدى «ناركوشوپ» جابىلىپ، 35 ناركوديلەر ۇستالعان. جالعان قارجىلىق وپەراتسيالار مەن مامىلەلەر جاساعان 1787 زاڭدى تۇلعانىڭ قىزمەتى توقتاتىلعان، سونداي- اق تەرروريستىك جانە ەكسترەميستىك ۇيىمداردىڭ شوتتارىنا قاراجات اۋدارۋعا 1,2 مىڭ ارەكەت انىقتالىپ، بۇعاتتالعان.
كەزدەسۋ سوڭىندا مەملەكەت باسشىسى اگەنتتىك قىزمەتىنىڭ نەگىزگى باعىتتارى بويىنشا ءبىرقاتار تاپسىرما بەردى.
