21,2 ميلليارد تەڭگەنىڭ نەگىزسىز جۇمسالۋىنا جول بەرىلمەدى - اسحات جۇماعالي پرەزيدەنتكە ەسەپ بەردى
استانا. KAZINFORM - مەملەكەت باسشىسى سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعاليدى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنت اگەنتتىكتىڭ ەلىمىزدە سىبايلاس جەمقورلىققا قارسى اتقارىپ جاتقان جۇمىسىمەن تانىستى. مەملەكەت باسشىسىنا بيىلعى ءبىرىنشى توقسانداعى ۆەدومستۆو قىزمەتىنىڭ ناتيجەلەرى مەن «زاڭ جانە ءتارتىپ» تۇجىرىمداماسىن ىسكە اسىرۋ جونىندە باياندالدى.
اسحات جۇماعاليدىڭ ايتۋىنشا، جىل باسىنان بەرى سىبايلاس جەمقورلىققا قاتىستى 521 قىلمىس تىركەلگەن. اتاپ ايتقاندا، 257 لاۋازىمدى تۇلعا اشكەرەلەندى، ولاردىڭ 141- ءى - ءارتۇرلى دەڭگەيدەگى باسشىلار. سوتقا 366 قىلمىستىق ءىس جىبەرىلدى.
پرەزيدەنتكە بيىل مەملەكەت پايداسىنا 15 ميلليارد تەڭگە وتەلگەنى تۋرالى مالىمەت بەرىلدى. 2022 -جىلدان باستاپ جالپى سوماسى 1,13 تريلليون تەڭگە بولاتىن اكتيۆتەر قايتارىلعان. مەملەكەتتىك ساتىپ الۋ مەن قارجىنىڭ ماقساتتى پايدالانۋىنا مونيتورينگ جۇرگىزۋ بارىسىندا 21,2 ميلليارد تەڭگەنىڭ نەگىزسىز جۇمسالۋىنا جول بەرىلمەدى.
مەملەكەت باسشىسىنا تۋريزم سالاسىنداعى سىبايلاس جەمقورلىق تاۋەكەلدەرىنە سىرتقى تالداۋ جۇرگىزىلگەنى، ونىڭ ناتيجەسى بويىنشا ۋاكىلەتتى ورگانعا ۇسىنىمدار ەنگىزىلگەنى جايىندا ايتىلدى.
اگەنتتىك ءتوراعاسى اۆتوكولىك جولدارى قۇرىلىسىندا «اقشانى بوياۋ» جوباسىن ىسكە اسىرۋ جونىندە ايتتى.
قاسىم-جومارت توقايەۆقا «زاڭ جانە ءتارتىپ»، «ادال ازامات» تۇجىرىمدامالارىنا سايكەس سىبايلاس جەمقورلىققا قارسى مادەنيەتتى قالىپتاستىرۋ باعىتىنداعى باستامالار تانىستىرىلدى. ءارتۇرلى فورماتتاعى 3 مىڭعا جۋىق ءىس-شارا وتكىزىلىپ، وعان 450 مىڭنان استام ازامات قاتىستى. «سىبايلاس جەمقورلىققا قارسى ۆولونتەرلىك» جوباسى ىسكە اسىرىلىپ جاتىر. اگەنتتىك ەلىمىزدىڭ جەتەكشى جوعارى وقۋ ورىندارىنىڭ اكادەميالىق ادالدىق ليگاسىمەن جۇمىستى قولعا الدى.
پرەزيدەنتكە حالىقارالىق ىنتىماقتاستىق، سونىڭ ىشىندە ەىدۇ جانە سىبايلاس جەمقورلىققا قارسى كۇرەس جونىندەگى مەملەكەتتەر توبىمەن سەرىكتەستىك جايىندا اقپارات بەرىلدى. اگەنتتىك حالىقارالىق سىبايلاس جەمقورلىققا قارسى ورگاندار قاۋىمداستىعىمەن بەرىك بايلانىس ورناتقان جانە بيىلعى اقپان ايىندا اتالعان ۇيىمنىڭ اتقارۋ كوميتەتى قۇرامىنا كىردى.
بىلتىر Transparency international سىبايلاس جەمقورلىقتى قابىلداۋ يندەكسىنە ساي اتقارىلعان جۇمىستاردىڭ ناتيجەسىندە قازاقستان 40 بالعا يە بولىپ، 180 ەلدىڭ اراسىندا 88-ورىنعا تۇراقتادى.
كەزدەسۋ سوڭىندا پرەزيدەنت ەلىمىزدەگى سىبايلاس جەمقورلىققا قارسى ءىس-قيمىلداردى ودان ءارى جالعاستىرۋ، تامىر جايعان قىلمىستىق تىزبەكتىڭ جولىن كەسۋ جانە قوعامدا سىبايلاس جەمقورلىققا قارسى مادەنيەت قالىپتاستىرۋ جونىندە ءبىرقاتار تاپسىرما بەردى.
