21 جاسىندا «ءتىسسىز قالعان» كليەنت: «وتباسى بانك» ب ج ز ق اقشاسىنا ءتىس ەمدەتۋگە نەگە تىيىم سالىنعانىن ءتۇسىندىردى
استانا. KAZINFORM - وتباسىن بانك دەنساۋلىق ساقتاۋ مينيسترلىگىنىڭ ب ج ز ق جيناعىنداعى شەكتى مولشەردەن ارتىلعان سومانى ءتىس ەمىنە جۇمساۋعا نەگە تىيىم سالعالى وتىرعانىن ءتۇسىندىردى.
ءبىرىڭعاي جيناقتىق زەينەتاقى قورىنىڭ سالىمشىلارىنا شوتىنداعى شەكتى مولشەردەن ارتىلعان سومانى ءتىس ەمدەۋ شىعىندارىنا جۇمساۋعا تىيىم سالاتىن قۇجات جوباسىن قوعامدىق تالقىلاۋعا شىعارعانىن جازعانبىز. «وتباسى بانك» وسى شارانىڭ نە ءۇشىن قاجەت ەكەنىن ءتۇسىندىردى.
«1 -شىلدەدەگى جاعداي بويىنشا 386533 ادام جالپى سوماسى 615,5 ميلليارد تەڭگەگە «وتباسى بانك» ارقىلى ەمدەلۋگە وزدەرىنىڭ ءبىرجولعى زەينەتاقى تولەمدەرىن پايدالاندى. بۇل سومانىڭ شامامەن 40%- ى ستوماتولوگيالىق قىزمەتتەرگە تيەسىلى - ءتىس پروتەزدەۋ جانە يمپلانتاتسيا. الايدا حالىقتىڭ ەمدەلۋگە جۇمساعان ءبىرجولعى زەينەتاقى تولەمدەرىن تەكسەرۋ كەزىندە ماقساتسىز پايدالانۋ جاعدايلارى انىقتالدى. بانك ءبىرقاتار كۇدىكتى سحەمالاردىڭ بەلگىلەرىن انىقتاپ، ولار بويىنشا ىشكى تەكسەرۋلەر جۇرگىزدى. ءىستىڭ قولدا بار ماتەريالدارىمەن بانك كۇدىكتى ادامداردى انىقتاۋ جانە ولاردى جاۋاپقا تارتۋ ءۇشىن قۇقىق قورعاۋ ورگاندارىنا جۇگىندى.
وسىلايشا، كورسەتىلگەن قىزمەتتەرگە اقى تولەۋ تۇرىندە كەيبىر ستوماتولوگيالىق كلينيكالار ازاماتتارعا قولما-قول اقشا الۋعا كومەكتەسكەن. بۇل زەينەتاقى تولەمدەرىن ماقساتسىز پايدالانۋ»، - دەپ جازىلعان «وتباسى بانك» تۇسىندىرمەسىندە.
بانك مالىمەتىنە سۇيەنسەك، كەيبىر ستوماتولوگيالىق كلينيكالار كۇنىنە 70-تەن استام كليەنت قابىلداعان. الايدا بۇل مەديتسينالىق مەكەمەلەردىڭ مۇنشا ەمدەلۋشىنى قابىلداپ، ءتيىستى قىزمەت كورسەتەتىندەي الەۋەتى بولماسا كەرەك.
«وتباسى بانك» ساراپتاماسى جەكە كلينيكالاردىڭ قىزمەت كورسەتۋ زاڭدىلىعىنا كۇمان كەلتىرەتىن بىرنەشە فاكتىنى انىقتاعان: ولار:
- ستوماتولوگيالىق كلينيكالاردىڭ ورنالاسقان مەكەنجايى كليەنتتەردىڭ تۇرعىلىقتى مەكەنجايى مەن مەديتسينالىق تىركەۋىنە سايكەس كەلمەگەن؛
- قىزمەت كورسەتىلگەنىن قۇجاتتاردىڭ راستالماۋى؛
- كەيبىر كليەنتتەر زەينەتاقى تولەمدەرىن ەشقانداي ستوماتولوگيالىق قىزمەت الماي، دەلدالدار ارقىلى جانە اقشالاي سىياقى تولەپ العاندارىن مويىنداعان.
«21 جاستاعى قازاقستاندىققا «تولىق ادەنتيا»، ياعني تىستەردىڭ تولىق بولماۋى دياگنوزى قويىلعانى انىقتالدى. سونىمەن قاتار، دارىگەرلىك كوميسسيانىڭ قورىتىندىسىندا وعان ەمدەۋدىڭ كەلەسى تۇرلەرى ۇسىنىلدى - تىستەردى تازارتۋ، برەكەت ورناتۋ.
ءبىرىڭعاي زەينەتاقى تولەمدەرىن پايدالانۋ كەزىندە زاڭعا قارسى ءىس-ارەكەتتەردىڭ جانە جاپپاي ماقساتسىز پايدالانۋ فاكتىلەرىنىڭ بولۋىن ەسكەرە وتىرىپ، وتباسى بانك مۇنداي فاكتىلەردىڭ جولىن قيۋ ءۇشىن قاجەتتى شارالاردى قولعا الۋ تۋرالى ۇسىنىس ءبىلدىردى»، - دەلىنگەن رەسمي مالىمەتتە.
«وتباسى بانكتىڭ» باسقارما ءتوراعاسى ءلاززات يبراگيموۆا قازاقستاندىقتار اراسىندا ب ج ز ق اقشاسى تۋرالى جاڭساق تۇسىنىك بار ەكەنىن ايتادى.
«ءبىز 2021-2024 -جىلدار ارالىعىندا ب ج ز ق قاراجاتىنا ەڭ كوپ قىزمەت كورسەتكەن 25 ستوماتولوگيالىق كلينيكانىڭ مەملەكەتكە 63 ميلليون تەڭگە عانا سالىق تولەگەنىن انىقتادىق. ال ب ج ز ق قاراجاتى ەسەبىنەن كورسەتىلگەن قىزمەتتەر كولەمى شامامەن 91 ميلليارد تەڭگە بولعان. ياعني، سالىق جۇكتەمەسى نەبارى %0,07 عانا. ءبىزدىڭ ويىمىزشا، بۇل ستوماتولوگيالىق كلينيكالار تاراپىنان كورسەتىلەتىن قىزمەتتەردىڭ، اسىرەسە، پروتەزدەۋ جانە يمپلانتاتسيالاۋ سياقتى كۇردەلى پروتسەدۋرالاردىڭ شىنايىلىعىنا كۇماندانۋعا سەبەپ بولادى»، - دەيدى ءلاززات يبراگيموۆا.
وسىنى العا تارتقان دەنساۋلىق ساقتاۋ مينيسترلىگى 2024 -جىلدىڭ 10 -تامىزىنان 2025 -جىلدىڭ 1 -اقپانىنا دەيىن پروتەزدەۋ جانە ءتىس يمپلانتاتسيالاۋ قىزمەتتەرىنە بولىنگەن قاراجاتتى پايدالانۋدى ۋاقىتشا توقتاتۋدى جوسپارلاپ وتىر.
«وسى ۋاقىت ىشىندە بانك ءبىرجولعى زەينەتاقى تولەمدەرىنىڭ ۋاكىلەتتى وپەراتورى رەتىندە ب ز ت قاراجاتىن ماقساتسىز پايدالانۋدىڭ الدىن الۋ جانە ستوماتولوگيالىق قىزمەت كورسەتۋدىڭ اشىقتىعىن قامتاماسىز ەتۋ بويىنشا ءتيىستى جۇمىستاردى جۇرگىزۋدى كوزدەپ وتىر»، - دەلىنگەن «وتباسى بانك» تۇسىندىرمەسىندە.
اۆتور
ەسىمجان ناقتىباي
