ەڭ ۇزاق بيلىك قۇرعان قازاق حانى

استانا. قازاقپارات - قازاق حاندىعىنىڭ 300 جىلدىق تاريحىندا ەڭ ۇزاق حاندىق قۇرعان - حاقنازار حان. ول بيلىككە 1538 - جىلى كەلىپ، 1580 - جىلعا دەيىن، ياعني 42 جىل بويى حان بولدى.

قاسىم حاننىڭ بالاسى حاقنازار (اقنازار) حان تۇسىندا قازاق حاندىعى قايتا بىرىگىپ، دامي ءتۇستى. ول ەل باسقارۋ، قيىن-قىستاۋ، اسكەري-ساياسي ىستەرى جاعىندا قاجىرلى دا قابىلەتتى قايراتكەر بولدى.

ونىڭ ۇستىنە اسا كۇردەلى سىرتقى جاعدايلاردا ديپلوماتيالىق دارىنى مول مايتالمان ەكەندىگىن كورسەتتى. وزىنەن بۇرىنعى تاحير حان جانە بۇيداش حان تۇسىندا بىتىراڭقى جاعدايعا تۇسكەن قازاق حاندىعىن قايتا بىرىكتىردى.

1523-1524 - جىلدارى قازاق-قىرعىز وداعىن نىعايتىپ، ءتىپتى سول زاماننىڭ تاريحي دەرەكتەرىندە حاقنازار حان «قازاقتار مەن قىرعىزداردىڭ پاتشاسى» دەپ اتالا باستادى. ول وسى قازاق-قىرعىز وداعىنا سۇيەنە وتىرىپ، موعولستان حاندارىنىڭ جەتىسۋ مەن ىستىقكول الابىن جاۋلاپ الۋ ارەكەتىنە تويتارىس بەردى. قازاق حاندىعىنىڭ كۇشەيۋى جانە حالىق ءومىرىنىڭ وڭالۋى، نوعاي وداعىنا قاراستى كوشپەلى تايپالاردىڭ ءبىر بولىگى قاڭلىلار، قىپشاقتار تاعى باسقالاردىڭ قازاق حاندىعىنا كەلىپ قوسىلۋىنا سەپتىگىن تيگىزدى.