ۇ ق ش ۇ بىتىمگەرلەرى قاڭتار وقيعاسى كەزىندە ءبىر دە ءبىر وق اتقان جوق - توقايەۆ

قاسىم-جومارت توقايەۆتىڭ Egemen Qazaqstan گازەتىنە بەرگەن سۇحباتىندا قاڭتار وقيعاسى كەزىندەگى ۇجىمدىق قاۋىپسىزدىك تۋرالى شارت ۇيىمىنىڭ ءرولى ءسوز بولدى، دەپ حابارلايدى Kazinform.

«ايماقتاردا جاپپاي تارتىپسىزدىك بەلەڭ الىپ، جەرگىلىكتى بيلىك دارمەنسىزدىك تانىتقاندا، قاۋىپسىزدىك كەڭەسى ۇجىمدىق قاۋىپسىزدىك تۋرالى شارت ۇيىمىنا جۇگىنۋ تۋرالى شەشىم قابىلدادى. قازاقستان ونىڭ بىتىمگەرلىك كۇشتەرىن تۇراقتىلىق پەن قاۋىپسىزدىكتى قامتاماسىز ەتۋ ءۇشىن عانا قىسقا مەرزىمگە ەنگىزۋدى سۇرادى. بۇل جەردە مىنا جايتقا باسا ءمان بەرۋ كەرەك. ءبىز بۇل قۇرىلىمنىڭ مۇشەسى رەتىندە رەسەيگە ەمەس، ۇجىمدىق قاۋىپسىزدىك تۋرالى شارت ۇيىمىنا جۇگىندىك. سول كەزدە وسى ۇيىمنىڭ ءتوراعاسى ارمەنيا ەدى. بيىل ۇ ق ش ۇ- عا قازاقستان ءتوراعالىق ەتەدى. قۇرىلىم جاساعى، شىن مانىندە، بىتىمگەرلىك ءرول اتقارىپ، قاسىرەتتى كۇندەردە ەلدى جايلاعان جۇگەنسىزدىكتى توقتاتۋعا سەپتىگىن تيگىزدى. ۇيىمعا مۇشە- مەملەكەتتەرمەن كەلىسىلگەندەي، بۇل بىتىمگەرلىك كۇشتەر الدىن الا ەشقانداي تالاپ قويماستان، ونىڭ ۇستىنە مەرزىمىنەن بۇرىن قازاقستاننان سىرتقا شىعارىلدى»، - دەپ اتاپ ءوتتى قاسىم-جومارت توقايەۆ.

ونىڭ ايتۋىنشا، ۇ ق ش ۇ بىتىمگەرلىك كۇشتەرى لاڭكەستىككە قارسى وپەراتسيالارعا قاتىسقان جوق، ءبىر دە ءبىر وق اتقان جوق.

ارمەنيا جاساعى «اقساي» نان زاۋىتىن جانە «الماتى سۋ» مەكەمەسىن، بەلارۋس جاساعى جەتىگەندەگى ايەرودرومدى، تاجىكستان مەن قىرعىز رەسپۋبليكاسىنىڭ اسكەري قىزمەتشىلەرى الماتى قالاسىنىڭ ءبىرىنشى جانە ەكىنشى جىلۋ ەلەكتر ورتالىقتارىن، رەسەي جاساعى ءۇشىنشى جىلۋ ەلەكتر ورتالىعى مەن تەلەكوممۋنيكاتسيا نىساندارىن كۇزەتتى.

«وسى ماڭىزدى نىساندارعا لاڭكەستىك شابۋىلدار جاسالۋى مۇمكىن دەگەن قاۋىپ بولدى. سوندىقتان بىتىمگەرلىك كۇشتەر سولاردى كۇزەتۋگە جىبەرىلدى. ەڭ باستىسى، سول ارقىلى ءوز كۇشتەرىمىزدى لاڭكەستىككە قارسى وپەراتسياعا جۇمىلدىرۋعا مۇمكىندىك تۋدى»، - دەيدى مەملەكەت باسشىسى.

اۆتور

جانات قاپالبايەۆا