زەينەتاقىنىڭ ورتاشا مولشەرى 96562 تەڭگە بولادى

استانا. قازاقپارات - 2025 -جىلى زەينەتاقىنىڭ ورتاشا مولشەرى 96562 تەڭگە بولادى. بۇل تۋرالى ۇكىمەت وتىرىسىندا پرەمەر-ءمينيستردىڭ ورىنباسارى - قارجى ءمينيسترى ءمادي تاكيەۆ ايتتى.

«بيۋدجەت الەۋمەتتىك باعىتقا باعدارلانعان بولىپ قالا بەرەدى. 2025 -جىلى الەۋمەتتىك سالاعا 2024 -جىلمەن سالىستىرعاندا 794 ميلليارد تەڭگەگە ۇلعايىپ 9,8 تريلليون تەڭگە باعىتتالادى. شىعىستاردىڭ وسۋىنە كەلەسى فاكتورلار اسەر ەتەدى. ءبىرىنشى، ينفلياتسيانىڭ ورتاشا دەڭگەيىنە الەۋمەتتىك تولەمدەردى يندەكستەۋ: بازالىق زەينەتاقى مەن جاردەماقىنى 6,5 پايىزعا، ورتاق زەينەتاقىنى ينفلياتسيانىڭ ورتاشا دەڭگەيىنەن 2 پايىزعا اسىرا وتىرىپ، 8,5 پايىزعا يندەكستەۋ. يندەكستەۋگە جانە الەۋمەتتىك تولەمدەردى الۋشىلار سانىن ۇلعايتۋعا قوسىمشا 626 ميلليارد تەڭگە باعىتتالاتىن بولادى. ناتيجەسىندە 2025 -جىلى زەينەتاقىنىڭ ورتاشا مولشەرى 96562 تەڭگە بولادى»، - دەدى ءمادي تاكيەۆ.

ونىڭ دەرەگىنشە، ەكىنشىدەن، بيىلمەن سالىستىرعاندا گرانتتار سانىن 2500 ورىنعا ۇلعايتۋ كوزدەلەدى. ناتيجەسىندە قوسىمشا ورىنداردى ەسكەرە وتىرىپ، 2025 -جىلى شامامەن 78 مىڭ ءبىلىم بەرۋ گرانتى بولىنەتىن بولادى.

«ۇشىنشىدەن - جوعارعى وقۋ ورىندارىنىڭ ستۋدەنتتەرىنە شاكىرتاقىسى مولشەرىن ورتا ەسەپپەن 15-20 پايىزعا ۇلعايتۋ. ناتيجەسىندە شاكىرتاقىنىڭ ورتاشا مولشەرى باكالاۆريات ستۋدەنتتەرى ءۇشىن - 52372 تەڭگە، ماگيستراتۋرا ءۇشىن 117098 تەڭگە بولادى. تورتىنشىدەن - حالىق سانىنىڭ ءوسۋى مەن ناۋقاستار سانىنىڭ ۇلعايۋىن ەسكەرە وتىرىپ، تەگىن مەديتسينالىق كومەكتىڭ كەپىلدەندىرىلگەن كولەمى مەن مىندەتتى الەۋمەتتىك مەديتسينالىق ساقتاندىرۋ اياسىندا حالىقتى مەديتسينالىق كومەكپەن قامتۋدى ۇلعايتۋ»، - دەدى ول.

اۆتور

مارلان جيەمباي