زەينەتاقى قورىنداعى اقشانى ءتىس ەمدەۋگە جۇمساۋعا تىيىم سالىنادى

استانا. KAZINFORM - پروتەزدەۋ جانە ءتىس يمپلانتاتتاۋ بويىنشا قىمبات تۇراتىن ستوماتولوگيالىق قىزمەتتەرگە قاراجات پايدالانۋدى 2024 -جىلعى 10-تامىز بەن 2025 -جىلعى 1-اقپان ارالىعىندا ۋاقىتشا توقتاتا تۇرۋ جوسپارلانىپ وتىر.

ءبىرجولعى زەينەتاقى تولەمدەرى جونىندەگى ۋاكىلەتتى وپەراتور «وتباسى بانك» ا ق مالىمەتىنە سەنسەك، ءبىرىڭعاي جيناقتاۋشى زەينەتاقى قورىنان قاراجاتتى ستوماتولوگيالىق قىزمەتتەرگە پايدالانۋ كەزىندە نىسانالى ەمەس شىعارۋ جاعدايلارى تىركەلگەن.

بانكتىڭ مالىمەتىنشە، ول جۇرگىزگەن قىزمەتتىك تەكسەرۋلەردىڭ بارىسىندا جالعان قۇجات پايدالانۋ جانە ناقتى مەديتسينالىق قىزمەتتەردى كورسەتپەۋ فاكتىلەرى انىقتالدى.

وسىعان بايلانىستى ق ر دەنساۋلىق ساقتاۋ مينيسترلىگى 2021 -جىلى 15-اقپاندا قابىلدانعان «ەمدەۋگە ءبىرجولعى زەينەتاقى تولەمدەرىن پايدالانۋ قاعيدالارىن بەكىتۋ تۋرالى بۇيرىققا وزگەرىستەر ەنگىزۋ تۋرالى» بۇيرىقتىڭ جوباسىن ازىرلەدى.

وسى بۇيرىق ارقىلى پروتەزدەۋ جانە ءتىس يمپلانتاتتاۋ بويىنشا قىمبات تۇراتىن ستوماتولوگيالىق قىزمەتتەرگە قاراجات پايدالانۋدى 2024 -جىلعى 10-تامىزدان 2025 -جىلعى 1-اقپانعا دەيىن التى اي مەرزىمگە ۋاقىتشا توقتاتا تۇرۋ كوزدەلىپ وتىر.

وسى ۋاقىتتىڭ ىشىندە ءبىرجولعى زەينەتاقى تولەمدەرى جونىندەگى ۋاكىلەتتى وپەراتور بجت قاراجاتىن ماقساتسىز پايدالانۋعا جول بەرمەۋ جانە ستوماتولوگيالىق قىزمەتتەر كورسەتۋدىڭ اشىقتىعىن قامتاماسىز ەتۋ جونىندە ءتيىستى جۇمىس جۇرگىزۋگە نيەتتى.

بۇيرىقتىڭ جوباسى 2024 -جىلعى 24-شىلدەدە تالقىلاۋ ءۇشىن اشىق نورماتيۆتىك قۇقىقتىق اكتىلەر پورتالىندا ورنالاستىرىلدى.