زەينەتاقى جيناعىن الۋ: ۇلتتىق بانك تالاپتاردى كۇشەيتۋدى ۇسىندى

استانا. KAZINFORM – ق ر ۇلتتىق بانكىنىڭ ءتوراعاسى تيمۋر سۇلەيمەنوۆ زەينەتاقى جۇيەسىنە قاتىستى جۇمىس توبىندا ب ج ز ق-دان زەينەتاقى جيناعىن مەرزىمىنەن بۇرىن الۋ تالاپتارىن كۇشەيتۋدى پىسىقتاپ جاتقانىن ايتتى.

«قازىر ۇكىمەتتىڭ الەۋمەتتىك بلوگى جۇمىس توبىندا زەينەتاقى جۇيەسىنىڭ كونتۋرى تالقىلانىپ جاتىر. بۇل جۇمىس توبىندا ۇلتتىق بانك وكىلدەرى دە قامتىلعان. مەنىڭ ويىمشا، ونى رەفورمالاۋ كەرەك ەكەنىنە ەشكىم كۇمان كەلتىرمەيدى. بۇل ءوز كەزەگىندە وتە كۇردەلى پروتسەسس ەكەنى تۇسىنىكتى. وسى تۇرعىدا زەينەتاقىعا ءبىراز فاكتور اسەر ەتەدى، ياعني ءومىر ءسۇرۋ ۇزاقتىعى، حالىق سانى، ينفلياتسيا، حالىقتىڭ ناقتى تابىسى سياقتى ماسەلەنى نازارعا الۋ كەرەك»، - دەدى ت. سۇلەيمەنوۆ ەلوردادا وتكەن باسپا ءسوز ءماسليحاتىندا.

ونىڭ ايتۋىنشا، ەڭ تومەنگى جەتكىلىكتىلىك شەگىنەن اسقان زەينەتاقى جيناعىن الۋ قىسقارتىلۋى مۇمكىن.

«اسىرەسە، مەديتسينالىق قىزمەتكە، ستوماتولوگياعا قاراجات كەرەك دەگەن جەلەۋمەن مالىمەتتەردى بۇرمالاۋدىڭ ءتۇرلى جاعدايى كەزدەسىپ جاتىر. شىن مانىندە، وسى قاراجات باسقا ماقساتتارعا العان. مۇنداي ءىس- قيمىلدارعا جول بەرمەس ءۇشىن تالاپتاردى كۇشەيتۋ كەرەك. اتاپ ايتقاندا، وسى يدەيا پىسىقتالىپ جاتىر»، - دەدى ۇب باسشىسى.

ەسكە سالساق، ءبىرىڭعاي جيناقتاۋشى زەينەتاقى قورى 2024-جىلعا ارنالعان زەينەتاقى جيناعىنىڭ ەڭ تومەنگى جەتكىلىكتىلىك شەگىن جاريالادى.