زياندى «پايدالى» تاعامدار

استانا. قازاقپارات - زاماناۋي جارناما قۇرالدارى دەنساۋلىققا ەش پايداسى جوق تاعامداردى دا بىزگە جاقسى دەپ ۇيرەتىپ كەلەدى. كەيبىر شىن مانىندە زيان بولاتىن، ءبىراق ءبىز پايدالى دەپ تانيتىن تاعامداردى ءبىلىپ ءجۇرىڭىز.

ديەتاعا ارنالعان نان

ءتۇرلى ءداندى داقىلداردان ازىرلەنگەن، ارنايى ديەتاعا ارنالعان ناندى پايدالى، قۇرامىنداعى تالشىقتار اسقورىتۋ جۇيەسىن جاقسارتادى دەگەن پىكىر قالىپتاسقان. ءبىراق ءجيى جاعدايدا ءداندى داقىلدى ناندا ءداننىڭ ۇنى عانا قولدانىلادى، ال ول ءوز كەزەگىندە سونشالىقتى پايدالى بولمايدى.

اسقورىتۋ جۇيەسىنە ناعىز پايدانى تۇتاس ءداندى نان عانا اكەلەدى. تۇتاس داندەردەن پىسىرىلگەن ناندا ءداننىڭ كەبەگى ساقتالادى. ءدال وسى كەبەك اسقازانعا پايدالى بولىپ، ىشەكتەردى تازالايدى.

دايىن تاڭعى اس

دايىن تاڭعى اس تۇرماق، تاڭعى استى ءىشۋدىڭ ءوزى دەنساۋلىققا پايدالى دەپ بىلەمىز. وندىرۋشىلەر استىڭ ءدامىن كەلتىرۋ ءۇشىن دايىن تاڭعى اسقا قانت پەن كانسەراگەندى قوسپالار قوسادى. سوندىقتان ونىڭ دا پايداسىنان گورى زيانى كوپ.

ميۋسلي اتالاتىن تۇتاس ءداندى داقىلدار مەن جاڭعاق، كەپتىرىلگەن جەمىستەن تۇراتىن تاڭعى اس ءتاتتى دايىن تاڭعى استاردان الدەقايدا پايدالى. گرانولا اتتى تاڭعى اس تا تەك تابيعي داندەر مەن جاڭعاقتار مەن بالدان ازىرلەنەدى. كەلەسىدە دايىن تاڭعى استاردىن وسى تۇرلەرىن الىپ كورىڭىز.

سۋشي مەن روللدار

ارينە سۋشي مەن رولدارداعى پىسپەگەن بالىق، كۇرىشتىڭ كالوريالىعى تومەن بولادى. ءبىراق ەڭ ءدامدى سۋشي تۇرلەرىنە ءجيى جاعدايدا مايونەز، ىرىمشىك، قۋىرىلعان قۇرامداس بولىكتەر قوسادى.

ۇيرەنشىكتى سۋشيگە تاپسىرىس بەرگەندە ونىڭ اراسىنان ەڭ ديەتيكالىق تۇرلەرىن تاڭداپ، تەك تەڭىز ونىمدەرى مەن كۇرىشتەن ازىرلەنگەنىن تاڭداڭىز. سونداي-اق كوكونىستەردەن جاسالىناتىن رولدار، كيمباپتارعا نازار اۋدارىڭىز.

شىرىن

شىرىن جەمىستەردىڭ دارۋمەندەرى مەن تابيعي پايدالى زاتتاردىڭ قاينار كوزى دەپ بىلەمىز. ءبىراق دۇكەندەگى دايىن شىرىنعا قانت پەن بوياعىش زاتتار، سۋ قوسادى. كەلەسى جولى پايدالى شىرىن ىشكىڭىز كەلسە، جاڭا سىعىلعان ءتۇرىن ىزدەڭىز نەمەسە كەز-كەلگەن جەمىستى جەڭىز، دەپ جازادى massaget.kz.