زووپارك ەمەس: سەناتور كولونيادا بيشىمبايەۆتى نەلىكتەن كورسەتپەي جاتقانىن ءتۇسىندىردى

استانا. KAZINFORM – ق ر ىشكى ىستەر ءمينيسترىنىڭ بۇرىنعى ورىنباسارى جانە جاقىندا سەناتور بولعان مارات قوجايەۆ سوتتالعان قۋاندىق بيشىمبايەۆتىڭ جازاسىن وتەۋ تارتىبىنە قاتىستى تۇسىنىك بەردى.

بۇگىن سەناتتىڭ جالپى وتىرىسىنان كەيىن تىلشىلەر «ق. بيشىمبايەۆتىڭ شىنىمەن دە جازاسىن وتەپ جاتقانى تۋرالى فوتوسۋرەتى نەمەسە بەينەماتەريالدار نەگە جاريالانبادى؟» دەگەن سۇراق قويدى.

«بيشىمبايەۆتىڭ قاي جەردە قاماۋدا وتىرعانى قۇپيا ەمەس. بىزدەگى كولونيالار ءارتۇرلى كاتەگوريالارعا بولىنگەن، ياعني جەڭىلدەتىلگەن، ورتاشا جانە قاۋىپسىزدىك دەڭگەيى جوعارى دەپ ايقىندالعان. ول كىسى بارىنشا جوعارى قاۋىپسىزدىك تالابى قاراستىرىلعان ستەپنوگورداعى كولونيادا ءوز جازاسىن وتەپ جاتىر»، - دەدى م. قوجايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ پايىمىنشا، ق. بيشىمبايەۆتىڭ قاماۋدا وتىرعان ورنىنا قاتىستى دۇربەلەڭگە تىلشىلەردىڭ تەكسەرىلمەگەن مالىمەتتەردى تاراتىپ جىبەرۋى سەبەپ بولدى. ەگەر سوتتى بولعان ادام ءوزىن كوپشىلىككە كورسەتكىسى كەلمەسە، ونى ەشكىم ماجبۇرلەي المايدى.

«ءتيىستى كولونيادا جازاسىن وتەپ جاتقانى ناقتىلاندى. سوتتالعان ادامنىڭ قۇقىعى بار عوي؟ ول جەر زووپارك ەمەس. قىلمىستىق- اتقارۋ جۇيەسى كوميتەتىنىڭ وكىلدەرى سول جەردە بيشىمبايەۆ وتىر دەپ ەكسكۋرسيا جاساي المايدى»، - دەدى سەناتور.

ايتا كەتەيىك، جاقىندا الەۋمەتتىك جەلىدە ق. بيشىمبايەۆتىڭ قاي كولونيادا وتىرعانى جايىندا مالىمەت انىقتالماي جاتىر دەگەن حابارلاما بولدى.

اۆتور

رۋسلان عابباسوۆ