ولار قاسيەتتى سانالاتىن تاستى ۇستاپ، ارمان-تىلەكتەرىن ايتادى. كوز الدىڭنان كەتپەسە ەكەن دەپ تىلەيتىن سۇلۋ تابيعاتى بار سول جەرگە Kazinform ءتىلشىسى بارىپ، فوتورەپورتاج جاساپ قايتتى.
مۇزتاۋ شىڭى - ەلىمىزدىڭ كيەلى جەرلەرىنىڭ ءبىرى. ول اسپانمەن استاسقان ءور التايدىڭ ەڭ بيىك نۇكتەسى. بيىكتىگى - 4506 مەتر.
سونىڭ ەتەگىندەگى كىندىكتاستىڭ قاسيەتىن سەزىنۋ ءۇشىن وسىندا قازاقستاننىڭ ءار وڭىرىنەن بولەك، شەتەلدىك مەيماندار دا از كەلمەيدى.
ۇلتتىق ويۋمەن بەزەندىرىلگەن تاقتادا مىناداي ءماتىن جازىلىپ تۇر: «كىندىك تاس مۇزتاۋ تاۋىنىڭ ەتەگىندە ورنالاسقان. بۇل تاس ەرەكشە ەنەرگەتيكالىق قۋاتقا يە جانە ودان ميستيكالىق كۇش تارايدى. بۇل جەر - جەردىڭ تۇبىنەن تارايتىن كۇشتىڭ شىعاتىن ورنى. كورگەن ادامدار بۇرشاقتى داۋىل بولعاندا، اتموسفەرالىق ەلەكتر توگى اينالانى قانىقتىرعان كەزدە كىندىك تاستىڭ ۇستىندە كۇلگىن ءتۇستى جارقىل پايدا بولادى دەيدى».
وسى ءماتىن ءۇش تىلدە جازىلىپتى، اتاپ ايتقاندا قازاق، ورىس، اعىلشىن.
كەي ادامدار بۇل تاستى مۇزتاۋعا تاعزىم ەتەتىن، تىلەك تىلەيتىن كيەلى ورىن دەپ سانايدى. تاستىڭ ماڭىنا جەكە زات قالدىرۋ سياقتى ءداستۇر دە قالىپتاسقان دەسەدى.
الايدا ءبىز بارعاندا ەشقانداي زاتتى بايقامادىق. جۇرت سول جەردە ارمان-تىلەكتەرىن ايتىپ، رۋحاني كۇش الامىز دەپ سەنەدى.
كىندىكتاستىڭ ماڭىندا جاتقان ءتۇسى سوعان ۇقساس، ءبىراق ءپىشىنى كىشى باسقا دا تاستاردى بايقادىق.
سونداي تاستاردىڭ بىرىندە قىتاي تىلىنە ۇقسايتىن قارىپپەن جازۋ جازىلىپتى.
بۇل جەردىڭ تابيعاتىنىڭ سۇلۋلىعىن ەشقانداي فوتواپپارات دالمە-ءدال جەتكىزە الماسى انىق.
تاۋ بوكتەرىندە سارى مەن جاسىل ارالاس قالىڭ اعاش. زەڭگىر تاۋلاردىڭ ورتاسىن قاق ءبولىپ، اقبەرەل وزەنى اعىپ جاتىر.
قازاق ءۇشىن تاۋ قاشاندا بيىكتىكتىڭ، بەرىكتىكتىڭ، ەركىندىكتىڭ سيمۆولى بولعان. وسى تۇرعىدان العاندا مۇزتاۋ - ادام مەن تابيعات اراسىنداعى بايلانىستىڭ دا بەينەسى ىسپەتتى.
مۇزتاۋ شىڭىنىڭ قازاقستان مەن رەسەي شەكاراسىندا ورنالاسۋى ونىڭ تابيعي ءارى گەوگرافيالىق ماڭىزىن ودان سايىن ارتتىرا تۇسەدى. سوعان وراي مۇندا شەكارا بەكەتىنىڭ ءمودۋلى ورناتىلىپتى. ول تەك جاز كەزىندە جۇمىس ىستەيدى. سول ءۇشىن ىشكە كىرىپ كورە المادىق.
وبلىس اكىمدىگىنىڭ مالىمەتىنشە، مودۋلدە ءتورت شەكاراشى كەزەكشىلىك اتقارادى. وندا شەكاراشىلارعا قاجەتتى بىرنەشە بولمە قاراستىرىلعان. مودۋل قاجەتتى جابدىقتارمەن قامتاماسىز ەتىلگەن.
كوبىنە باسىن بۇلت شالىپ تۇراتىن مۇزتاۋ شىڭى بۇگىن اشىق، اپ-انىق كورىندى. كەي ادامدار وسى ساپارعا ۇزاق دايىندالىپ ايتەۋىر دەگەندە جەتكەندە مۇزتاۋدى كورە الماي ارماندا كەتىپ جاتادى. ال ءبىزدىڭ جولىمىز بولعان ەكەن.
التاي تاۋىنىڭ ەڭ بيىك شىڭىن ەكراننان ەمەس، ءوز كوزىڭىزبەن كورگىڭىز كەلسە مىندەتتى تۇردە بارىڭىز، قادىرلى وقىرمان. سول كەزدە ءسىزدىڭ دە جولىڭىز بولىپ، مۇزتاۋ شىڭى اشىق بولعاي!
ەسكە سالساق، بۇعان دەيىن كاتونقاراعاي مەملەكەتتىك ۇلتتىق تابيعي پاركىندە فوتوتۇزاققا ەكى بۇركىت تۇسكەنى حابارلانعان.