زەرتتەۋشىلەر «ءىنجۋ سىرعالى قىز» كارتيناسى ميدا ەرەكشە رەاكسيا تۋدىراتىنىن انىقتادى

استانا. KAZINFORM - زەرتتەۋشىلەر گوللانديالىق سۋرەتشى يان ۆەرمەەردىڭ ء«ىنجۋ سىرعالى قىز» كارتيناسى كورەرمەندەردىڭ ميىندا ەرەكشە رەاكسيا تۋدىرىپ، ولاردى شەديەۆردىڭ الدىندا ۇزاق تۇرۋعا سەبەپ بولاتىنىن انىقتادى. بۇل ونەر تۋىندىسى ساقتالعان گااگاداعى ماۋريتسحەيس مۇراجايىندا جاقىندا جۇرگىزىلگەن زەرتتەۋ ناتيجەسىندە بەلگىلى بولدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

نەيرولوگ مارتين دەن وتتەردىڭ ايتۋىنشا، كارتينا وزىندىك ۆيزۋالدى تسيكل جاساۋ ارقىلى كورەرمەندەردىڭ نازارىن اۋدارادى، دەپ جازادى Times گازەتى.

«ادەتتە ادام باسقا ادامعا قاراعان كەزدە ونىڭ كوزقاراسى كوزدەن اۋىزعا قاراي جىلجيدى. اڭگىمەلەسۋشىنىڭ كوڭىل كۇيى مەن نيەتىن بىردەن باعالاۋ ءۇشىن ادەتتە وسى قاسيەتتەردى ءبىر شولۋ جەتكىلىكتى»، - دەيدى ول.

دەگەنمەن، «ءىنجۋ سىرعالى قىزدا» باسقا ديناميكا بار: كورەرمەننىڭ كوزقاراسى كوزدەن ەرىنگە، سودان كەيىن ءىنجۋ-مارجانعا، سوسىن كوزگە قايتا ورالادى. بۇل نازاردى وزىنە اۋداراتىن جانە قىزدىڭ بەتىنە قايتا-قايتا قاراۋعا ماجبۇرلەيتىن تۇراقتى سيكل جاسايدى.

بۇل قۇبىلىستى زەرتتەۋشى كوركەم شىعارمانىڭ تاڭعاجايىپ تارتىمدىلىعىمەن تۇسىندىرەدى.

زەرتتەۋ ميدىڭ ءارتۇرلى ايماقتارىنىڭ بەلسەندىلىگىن جانە كوز قوزعالىسىن باقىلاۋ ءۇشىن ارنايى گارنيتۋرامەن جابدىقتالعان 20 ەرىكتىنىڭ قاتىسۋىمەن جۇرگىزىلدى. ەرىكتىلەر رەاكسيالارىن جازىپ الۋ ءۇشىن «ءىنجۋ سىرعالى قىز» جانە ماۋريسحەيستەگى باسقا دا سۋرەتتەردى قارادى.