زەرتتەۋ. قازاقستاندا مارقۇمدى اقتىق ساپارعا اتتاندىرۋعا قانشا اقشا جۇمسالادى

استانا. قازاقپارات - ەلدە باقيلىق بولعان جاندى اقتىق ساپارعا شىعارىپ سالۋ قىمباتقا ءتۇسىپ بارادى.

ءولۋ قىمبات وڭىرلەر

Finprom-نىڭ جاڭا زەرتتەۋى جەرلەۋ ءراسىمىنىڭ كۇرت قىمباتتاعانىن كورسەتەدى.

قازاقستاندا جەرلەۋ ءراسىمىنىڭ قۇنى 2024 -جىلدىڭ قىركۇيەك ايىنىڭ قورىتىندىسى بويىنشا 11,6 پايىزعا ارتىپ، وتكەن جىلى ايتارلىقتاي ءوستى. ەلدىڭ جەكەلەگەن ايماقتارىندا جەرلەۋ قىزمەتتەرىنىڭ قۇنى 90 پايىزعا وسكەن. مىسالى، باتىس قازاقستان وبلىسىندا سالتتىق قىزمەتتەر 87,7 پايىزعا قىمباتتادى. سونداي-اق، كەلەسى وڭىرلەردە دە ايتارلىقتاي ءوسۋ بايقالدى:

جەتىسۋ وبلىسى - 33,3 پايىزعا ءوستى؛

استانا - 30,3 پايىزعا؛

ماڭعىستاۋ وبلىسى - 27,9 پايىزعا؛

قوستاناي وبلىسى - 25,5 پايىزعا؛

قاراعاندى وبلىسى - 25 پايىزعا؛

اباي وبلىسى - 23,2 پايىزعا.

ال جامبىل وبلىسىندا باعا 1,2 پايىزعا وسكەن، بۇل ەلدەگى ەڭ تومەنگى كورسەتكىش بولىپ تۇر. اقمولا، اقتوبە، الماتى، اتىراۋ جانە باسقا دا ءبىرقاتار وڭىرلەردە سالتتىق قىزمەتتەردىڭ باعاسى وتكەن جىلمەن سالىستىرعاندا وزگەرگەن جوق.

قىزمەت

باعانىڭ وسۋىنە قاراماستان، قازاقستاندا جەرلەۋ ءراسىمىن ۇيىمداستىرۋ جانە ىلەسپە قىزمەت كورسەتۋ كولەمى تومەندەگەن. 2024 -جىلدىڭ ءبىرىنشى جارتىجىلدىعىندا ول 2,9 ميلليارد تەڭگە بولدى. بۇل وتكەن جىلدىڭ سايكەس كەزەڭىمەن سالىستىرعاندا 19,2 پايىزعا از. كولەمنىڭ تومەندەۋ ءۇردىسى كورسەتكىشتەر شىڭىنا جەتكەن 2022 -جىلدان باستاپ بايقالادى.

عۇرىپتىق قىزمەتتەرگە جەرلەۋ، كرەماتسيا، ولارعا دايىندىق، زيراتتان ورىن ساتىپ الۋ، قابىرلەر مەن كەسەنەلەردى ۇستاۋ كىرەدى. ايتا كەتۋ كەرەك، بۇل ساناتقا ءدىني راسىمدەر مەن قابىرلەردى كۇتۋ كىرمەيدى.

سالتتىق قىزمەتتەرگە باعانىڭ ءوسۋى قازاقستاندا ءولىم-ءجىتىمنىڭ ارتۋى اياسىندا ورىن الۋدا. 2024 -جىلدىڭ العاشقى جەتى ايىندا ەلدە 78 مىڭ ادام قايتىس بولدى - بۇل 2023 -جىلدىڭ سايكەس كەزەڭىمەن سالىستىرعاندا 4,2 پايىزعا كوپ.

قاي وڭىردە ءولىم-ءجىتىم كوپ

قايتىس بولعانداردىڭ ەڭ كوپ سانى الماتىدا تىركەلدى، وندا قاڭتار- شىلدە ايلارىندا 7,1 مىڭ ادام قايتىس بولدى، بۇل وتكەن جىلمەن سالىستىرعاندا 4,6 پايىزعا ارتىق. ودان كەيىن قاراعاندى وبلىسى (6,3 مىڭ ادام، ءوسىم 1,8 پايىزعا) جانە تۇركىستان وبلىسى (5,9 مىڭ ادام) كەلەدى.

قاي وڭىردە ءولىم از

جەتى ايداعى ءولىم كوەففيتسيەنتى 1000 ادامعا شاققاندا 6,64 بولدى. ەڭ جوعارى كورسەتكىشتەر سولتۇستىك قازاقستان (11,65)، شىعىس قازاقستان (11,49) جانە قوستاناي (10,16) وبلىستارىندا تىركەلدى. ەڭ تومەن ماندەر ەلوردادا - 1000 ادامعا شاققاندا 3,88، شىمكەنتتە - 4,04، ماڭعىستاۋ وبلىسىندا - 4,65 بايقالادى.

 Ulysmedia.kz