بۇل تۋرالى Fortune باسىلىمى Boston Consulting Group (BCG) جانىنداعى Center for Macroeconomics ەسەبىنە سىلتەمە جاساپ جازدى، دەپ حابارلايدى turkystan.kz.
Philipp Carlsson-Szlezak, Paul Swartz جانە Henry Rubin دايىنداعان «The Kids Are Alright: The Timeless Angst Over Young People and Money» ەسەبىندە ءار بۋىننىڭ قارجىلىق جاعدايى سالىستىرىلعان. اۆتورلاردىڭ ايتۋىنشا، Gen Z- ءنىڭ قازىرگى كورسەتكىشتەرى قوعامداعى «جاستاردىڭ الدىڭعى بۋىنداردان كەدەي ءومىر ءسۇرىپ جاتىر» دەگەن تۇسىنىككە تولىق سايكەس كەلمەيدى.
دەگەنمەن زۋمەرلەر وزدەرىن قارجىلىق تۇرعىدان جايلى سەزىنبەيدى. زەرتتەۋشىلەر مۇنى ەڭ الدىمەن تۇرعىن ءۇي باعاسىنىڭ قىمباتتاۋىمەن جانە ءبىلىم الۋعا بايلانىستى قارىزداردىڭ قىسىمىمەن بايلانىستىرادى. ياعني تابىستىڭ جوعارى بولۋى اۆتوماتتى تۇردە بايلىق سەزىمىن قالىپتاستىرمايدى.
ەسەپتە جاستاردىڭ اقشاعا قاتىستى الاڭداۋشىلىعى جاڭا قۇبىلىس ەمەس ەكەنى دە كورسەتىلگەن. اۆتورلار 1866-جىلى جاريالانعان ماقالادان تۇرعىن ءۇي مەن جيھازدىڭ قىمباتتاۋىنا شاعىمدانعان جاستار تۋرالى ءۇزىندىنى مىسال رەتىندە كەلتىرەدى. سول كەزەڭدەگى شاعىمداردىڭ قازىرگى جاستاردىڭ قارجىلىق ماسەلەلەرىمەن ۇقساستىعى بار.
زەرتتەۋشىلەردىڭ قورىتىندىسى بويىنشا، Gen Z ءبىر جاعىنان ستاتيستيكالىق كورسەتكىشتەر بويىنشا ءوز جاسىنداعى بۇرىنعى ۇرپاقتاردان اۋقاتتىراق بولسا، ەكىنشى جاعىنان اقشا ماسەلەسىنە قاتىستى ءوزىن جايسىز سەزىنەتىن بۋىن بولىپ وتىر.