ءىس-شارا ساعات 11:00- 13:00 ارالىعىندا ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ «وتىرار» كىتاپحاناسىنداعى «اقسەلەۋ سەيدىمبەك» زالىندا ۇيىمداستىرىلادى.
سەميناردى ە ۇ ۋ «الاش» مادەنيەت جانە رۋحاني دامۋ ينستيتۋتى مەن «التىن وردا وركەنيەتى» كافەدراسى ۇيىمداستىرادى. مودەراتور - تاريح عىلىمدارىنىڭ دوكتورى، پروفەسسور، كافەدرا مەڭگەرۋشىسى ماحسات الپىسبەس.
عىلىمي جيىندا ق ر ۇ ع ا اكادەميگى، فيلولوگيا عىلىمدارىنىڭ دوكتورى، پروفەسسور ديحان قامزابەك ۇلى، فيلولوگيا عىلىمدارىنىڭ دوكتورى، پروفەسسور سەرىك نەگيموۆ، PhD دوكتورى، «الاش» مادەنيەت جانە رۋحاني دامۋ ينستيتۋتىنىڭ ديرەكتورى سۇلتانحان اققۇل ۇلى، اقىن، «الاش» سىيلىعىنىڭ لاۋرەاتى عالىم جايلىباي، تاريح عىلىمدارىنىڭ دوكتورى، پروفەسسور تۇرسىنحان زاكەن، اكادەميك قايرات ايدارحان ۇلى جانە جازۋشى ۇزبەن قۇرمانباي ۇلى قاتارلى جازۋشى، عالىمدار بايانداما جاساپ، ءسوز سويلەيدى.
سونداي-اق سەمينارعا قىرعىز رەسپۋبليكاسىنداعى قازاقتاردىڭ «الاش» قوعامدىق بىرلەستىگىنىڭ ءتوراعاسى ەركىن بولەكبايەۆ، زۋقا باتىردىڭ نەمەرەسى، قاجى ءارى قوعام قايراتكەرى ارىستان شادەت ۇلى، گەرمانياداعى قوعام قايراتكەرى، جۋرناليست ءومىرحان التىن جانە زۋقا باتىردىڭ نەمەرەسى، قوعام قايراتكەرى قىزىرحان شولپان قاتىسادى.
ءىس-شارا اياسىندا زۋقا باتىر ءسابيت ۇلىنىڭ 160 جىلدىق مەرەيتويىنا ارنالعان «قاراكوپىر» جانە «قورعان» كىتاپتارىنىڭ تانىستىرىلىمى مەن تۇساۋكەسەرى وتەدى. ونىڭ ءومىر جولى مەن ەرلىگىنە ارنالعان جاڭا جيناقتارعا زەرتتەۋلەر، ماقالالار، ولەڭدەر مەن جىر- تولعاۋلار ەنگىزىلگەن. كىتاپتار باتىردىڭ شىققان تەگى، ءومىرى مەن تاريحي قىزمەتىن تانىستىرىپ، ۇلتتىق تاريحي سانانى جاڭعىرتۋعا، ۇرپاقتار ساباقتاستىعىن نىعايتۋعا باعىتتالعان. باسىلىمدار تاريحشىلارعا، زەرتتەۋشىلەرگە، ادەبيەتشىلەرگە جانە قالىڭ وقىرمان قاۋىمعا ارنالعان.
سەميناردىڭ ماقساتى - الاشتىڭ ارداقتى ۇلدارىنىڭ مۇراسىن عىلىمي تۇرعىدان زەردەلەۋ، تاريحي تۇلعالاردىڭ ونەگەلى ءومىر جولىن ناسيحاتتاۋ جانە ۇلتتىق رۋحانياتتاعى ورنىن ايقىنداۋ.
زۋقا باتىر ءسابيت ۇلى (1866- 1929) - قازىرگى اباي وبلىسىنىڭ كەندىرلىك وڭىرىندە دۇنيەگە كەلگەن، ەل قورعاعان باتىر، قوعام جانە ءدىن قايراتكەرى. ول ۇلتقا، دىنگە جانە الەۋمەتتىك جاعدايعا بولمەي، كەدەي-كەپشىككە، السىزگە جانە پانا ىزدەگەن جاندارعا قورعان بولعان تۇلعا رەتىندە حالىق جادىندا ساقتالعان. ونىڭ ءومىر جولى - ەلدىك پەن ەرلىكتىڭ، يماندىلىق پەن ادامگەرشىلىكتىڭ، ادىلدىك پەن قايسارلىقتىڭ ونەگەسى.
1929 -جىلى التايدىڭ ارعى بەتىندە شەيىت بولعان زۋقا باتىردىڭ تاعدىرى - قازاق حالقىنىڭ كۇردەلى تاريحي كەزەڭدەرىمەن ساباقتاس. ونىڭ ەسىمى قاجىعۇمار شابدان ۇلىنىڭ «پانا»، باتىرحان قۇسبەگيننىڭ «زۋقا باتىر»، تالعات كەڭەسبايەۆتىڭ «قاراڭعى ءتۇننىڭ جۇلدىزى» اتتى شىعارمالارى جانە باتىردىڭ ءومىرى مەن ەرلىگىنە ارنالعان وزگە دە ادەبي، دەرەكتى ەڭبەكتەر ارقىلى كەڭىنەن تانىلا ءتۇستى.
باتىردىڭ ءومىرى مەن قىزمەتىن زەردەلەۋ - وتكەندى ەسكە الۋمەن عانا شەكتەلمەيدى. بۇل - ۇلتتىق تاريحي سانانى جاڭعىرتۋ، ۇرپاقتار ساباقتاستىعىن نىعايتۋ، جاس بۋىننىڭ بويىنا وتانسۇيگىشتىك قاسيەتتەردى ءسىڭىرۋ جولىنداعى ماڭىزدى قادام. زۋقا باتىردىڭ ەل قورعاۋداعى ەرلىگى مەن ادامگەرشىلىك ۇستانىمدارى بۇگىنگى قوعام ءۇشىن دە تاعىلىمدىق ءمانىن جوعالتقان جوق.