زەلەنسكي دەلەگاتسيالار مەن تەحنيكالىق توپتار شەشە الماعان ماسەلەلەردى ەكى ەل باسشىسى تىكەلەي تالقىلاي الاتىنىن اتاپ ءوتتى. ۋكراينا باسشىسىنىڭ ايتۋىنشا، ەردوعاننىڭ پۋتينمەن بايلانىسى بولعاندىقتان، كيەۆ انكارانىڭ ارا اعايىندىعىمەن كەزدەسۋ وتكىزۋگە قارسى ەمەس.
«ءبىز تۇركيادا وتەتىن كەزدەسۋگە دايىنبىز. پرەزيدەنت ەردوعاننىڭ پۋتينمەن ءوزارا بايلانىسى بار ەكەنىن بىلەمىن. سوندىقتان تۇركيادا كەزدەسۋ وتكىزۋ باستاماسىن قولدايمىز»، دەدى ۋكراينا پرەزيدەنتى.
زەلەنسكي كەلىسسوز كەزىندە ەڭ الدىمەن مايدان شەبىندە اتىستى توقتاتۋ ماسەلەسىن تالقىلاۋدى ۇسىندى. سونداي-اق ءبىتىمنىڭ ساقتالۋىن قاداعالايتىن باقىلاۋ تەتىگىن قۇرۋ قاجەت ەكەنىن ايتتى. ونىڭ سوزىنشە، سوعىس توقتاعاننان كەيىن قايتا باستالماۋى ءۇشىن ۋكرايناعا قاۋىپسىزدىك كەپىلدىكتەرى بەرىلۋى كەرەك.
سونىمەن قاتار ۋكراينا پرەزيدەنتى دونباسس اۋماعىن رەسەيگە بەرۋگە جانە قىرىمدى ونىڭ اۋماعى دەپ تانۋعا كەلىسپەيتىنىن مالىمدەدى. زەلەنسكي مۇنداي شەشىم ۋكراينا كونستيتۋتسياسىنا قايشى كەلەتىنىن اتاپ ءوتتى.
ەسكە سالايىق، بۇعان دەيىن ا ق ش پرەزيدەنتى دونالد ترامپ ۋكرايناعا كەلىسسوز جۇرگىزە الاتىن جاڭا باسشى سايلاۋ قاجەت ەكەنىن ايتقان بولاتىن. بۇعان جاۋاپ رەتىندە ۋكراينا سىرتقى ىستەر ءمينيسترى اندرەي سيبيگا ەل باسشىلىعىنا قاتىستى شەشىمدى تەك ۋكراين حالقى قابىلدايتىنىن مالىمدەدى.