قازىر وقيعانىڭ ءمان-جايى تەكسەرىلىپ جاتىر. بۇل تۋرالى ورمان شارۋاشىلىعى جانە جانۋارلار دۇنيەسى كوميتەتى ءمالىم ەتتى.
كەشە «وحوتزووپروم» كاسىپورنىنىڭ قىزمەتكەرلەرى مەسسەندجەرلەردە زاڭسىز اڭشىلىق بەلگىلەرى بولۋى مۇمكىن بەينەجازبالاردى انىقتاعان.
- بەينەجازبالارداعى اۆتوكولىكتەردىڭ مەملەكەتتىك تىركەۋ نومىرلەرى بويىنشا ولاردىڭ شىعىس قازاقستان وبلىسىندا تىركەلگەنى بولجاندى. «وحوتزووپروم» قىزمەتكەرلەرى جەدەل تۇردە قوسىمشا اقپارات جيناپ، اتالعان كولىكتەردىڭ زايسان قالاسىندا بولۋى مۇمكىن ەكەنىن انىقتادى. الىنعان مالىمەتتەر تابيعات قورعاۋ پوليتسياسىنا بەرىلدى، - دەپ حابارلادى كوميتەتتەن.
سول كۇنى ساعات 22:10 شاماسىندا زايسان قالاسىندا «وحوتزووپروم» ينسپەكتورلارى پوليتسيا قىزمەتكەرلەرىمەن بىرلەسىپ، بەينەجازبالارعا قاتىسى بولۋى مۇمكىن ءۇش جول تالعامايتىن كولىكتى توقتاتقان.
تەكسەرۋ جۇرگىزۋ ءۇشىن 9 شەتەل ازاماتى مەن 1 قازاقستان ازاماتى ۇستالعان.
28-قازاندا اتالعان دەرەك بەلگىلەنگەن تارتىپپەن تىركەلدى.
قازىرگى ۋاقىتتا اتالعان ازاماتتاردىڭ زاڭسىز اڭشىلىققا قاتىسى بار-جوعى انىقتالىپ جاتىر. قۇزىرەتتى ورگاندار وقيعانىڭ بارلىق ءمان-جايىن انىقتاۋ بويىنشا تەكسەرۋ جۇمىستارىن جۇرگىزبەك.