ازاماتتىق اۆياتسيا كوميتەتى جاڭا نىساندارداعى جۇمىستىڭ قاي دەڭگەيگە جەتكەنىن جانە قۇرىلىستىڭ قاشان اياقتالاتىنىن مالىمدەدى. جوسپار بويىنشا زايسانداعى اۋەجاي قۇرىلىسى 2026-جىلعى قاراشادا، ال قاتونقاراعاي مەن كەندىرلىدەگى نىساندار جەلتوقساندا اياقتالۋعا ءتيىس.
كەندىرلىدەگى اۋەجاي
جاڭا اۋەجاي ماڭعىستاۋ وبلىسىنداعى كەندىرلى دەمالىس ايماعىندا، كاسپي تەڭىزىنىڭ جاعالاۋىنان شامامەن 13 شاقىرىم جەردە سالىنىپ جاتىر.
قازىر نىسانداعى جۇمىستىڭ 54 پايىزى اياقتالعان. گاز قۇبىرى تارتىلىپ، سىرتقى بايلانىس جەلىلەرى جۇرگىزىلگەن. ۇشۋ-قونۋ جولاعى، پەررون، ۇشاقتاردىڭ قوزعالۋىنا ارنالعان جول، جولاۋشىلار تەرمينالى، كىرەبەرىس جول جانە اكىمشىلىك-تەحنيكالىق عيماراتتاردىڭ قۇرىلىسى جالعاسىپ جاتىر. جوبانى 2026-جىلعى جەلتوقساندا اياقتاۋ جوسپارلانعان.
كەندىرلى اۋەجايى ىشكى جانە حالىقارالىق رەيستەرگە قىزمەت كورسەتۋگە ەسەپتەلگەن. جوبا بويىنشا ول جىلىنا 1,3 ميلليون جولاۋشى قابىلداي الادى.
بۇعان دەيىن استانا، الماتى، اقتوبە، اتىراۋ، ورال جانە قىزىلورداعا، سونداي-اق نۇكىس، باكۋ مەن استراحانعا رەيس اشۋ مۇمكىندىگى قاراستىرىلعانى حابارلانعان. جوبانىڭ العاشقى كەزەڭىندە ۇزىندىعى 2200 مەتر بولاتىن ۇشۋ-قونۋ جولاعى سالىنادى. ول Q-400 ،ATR جانە CRJ ۇلگىسىندەگى ۇشاقتاردى قابىلداي الادى.
كەيىن اۋەجاي ينفراقۇرىلىمىن كەڭەيتىپ، Airbus A320 جانە Boeing 737 سەكىلدى ءىرى جولاۋشىلار ۇشاقتارىن قابىلداۋعا مۇمكىندىك جاساۋ كوزدەلگەن.
زايسانداعى اۋەجاي
شىعىس قازاقستان وبلىسىنداعى زايسان اۋەجايىنىڭ قۇرىلىسى اياقتالۋعا جاقىن. قازىر نىساننىڭ دايىندىعى 95,3 پايىزعا جەتكەن.
ۇشۋ-قونۋ جولاعى، پەررون، ۇشاقتاردىڭ قوزعالۋىنا ارنالعان جول مەن كىرەبەرىس جولدار سالىنىپ بىتكەن. نەگىزگى سىرتقى ينجەنەرلىك جەلىلەر تارتىلىپ، جارىقپەن بەلگى بەرۋ جۇيەسى ورناتىلعان. قازىر جولاۋشىلار تەرمينالى مەن اكىمشىلىك-تەحنيكالىق عيماراتتار سالىنىپ، قاجەتتى جابدىقتار ورناتىلىپ جاتىر. قۇرىلىستى 2026-جىلعى قاراشادا اياقتاۋ جوسپارلانعان.
اۋەجاي زايساننان شامامەن 25 شاقىرىم جەردەگى ءساتباي اۋىلىنىڭ ماڭىندا، بۇرىنعى اسكەري اەرودرومنىڭ ورنىندا سالىنىپ جاتىر. قۇرىلىس 2025-جىلعى ناۋرىزدا باستالعان.
جوبا بويىنشا ۇشۋ-قونۋ جولاعىنىڭ ۇزىندىعى 2,2 شاقىرىم بولادى. قاجەت بولعان جاعدايدا ونى كەيىن ۇزارتۋ مۇمكىندىگى قاراستىرىلعان. جولاق Bombardier Q400 جانە ATR-72 سەكىلدى وڭىرلىك باعىتتارعا قاتىنايتىن ۇشاقتاردى قابىلداۋعا لايىقتالادى.
اۋەجاي اۋماعىندا ءتورت ۇشاققا ارنالعان پەررون، اۋماعى 4 مىڭ شارشى مەترگە دەيىن جەتەتىن جولاۋشىلار تەرمينالى، ديسپەتچەرلىك مۇنارا، اپاتتىق-قۇتقارۋ قىزمەتى، مەتەوستانتسيا جانە راديوناۆيگاتسيالىق جابدىقتار قاراستىرىلعان.
تەرمينال ساعاتىنا 150 جولاۋشىعا دەيىن قابىلداي الادى. العاشقى جوسپار بويىنشا زايسان اۋەجايى 2026-جىلعى ماۋسىمدا دايىن بولۋى ءتيىس ەدى. كەيىن قۇرىلىس مەرزىمى قاراشاعا اۋىستىرىلدى.
بۇعان دەيىن زايساننان استانا، الماتى جانە وسكەمەنگە، سونداي-اق قىتايدىڭ ءۇرىمجى، التاي جانە قاناس باعىتتارىنا رەيس اشۋ جوسپارلانعانى حابارلانعان.
قاتونقاراعايداعى اۋەجاي
قاتونقاراعاي اۋدانىنداعى جاڭا اۋەجايدىڭ دايىندىعى 79 پايىزدى قۇرايدى.
ۇشۋ-قونۋ جولاعى، پەررون، ۇشاقتاردىڭ قوزعالۋىنا ارنالعان جول، رەسپۋبليكالىق ماڭىزى بار اۆتوجول جانە مودۋلدىك قازاندىق سالىنىپ بىتكەن. قازىر جولاۋشىلار تەرمينالى، اكىمشىلىك-تەحنيكالىق عيماراتتار مەن ينجەنەرلىك جەلىلەردىڭ قۇرىلىسى ءجۇرىپ جاتىر. جوبانى 2026-جىلعى جەلتوقساندا اياقتاۋ جوسپارلانعان.
اۋەجاي قاتونقاراعاي مەن ۇلكەن نارىن اۋىلدارىنىڭ اراسىندا، سولداتوۆو اۋىلىنىڭ ماڭىندا سالىنىپ جاتىر. قاتونقاراعاي اۋىلىنان نىسانعا دەيىنگى قاشىقتىق شامامەن 38 شاقىرىم.
اۋەجايداعى ۇشۋ-قونۋ جولاعىنىڭ ۇزىندىعى 2,2 شاقىرىم، ەنى 35 مەتر بولادى. وعان اسفالت-بەتون توسەلەدى. جولاۋشىلار تەرمينالى ساعاتىنا 150 ادامعا دەيىن قابىلداي الادى دەپ جوسپارلانعان.
بۇعان دەيىن قاتونقاراعايدان استانا، الماتى جانە وسكەمەنگە ىشكى رەيستەر، قىتايدىڭ التاي جانە قاناس باعىتتارىنا، سونداي-اق موڭعوليانىڭ بايان-ولگەي ايماعىنا حالىقارالىق رەيستەر اشىلۋى مۇمكىن ەكەنى ايتىلعان.
الايدا ناقتى قانداي اۋە كومپانيالارى ۇشاتىنى جانە تۇراقتى باعىتتار ءتىزىمى ازىرگە بەكىتىلمەگەن. بۇل ماسەلە ءالى پىسىقتالىپ جاتىر. العاشقى جوسپار بويىنشا كاتونقاراعايداعى اۋەجاي قۇرىلىسى 2026-جىلعى قىركۇيەكتە اياقتالۋى كەرەك ەدى. كەيىن مەرزىم جەلتوقسانعا شەگەرىلدى.
ءۇرجار اۋەجايى دا جاڭعىرتىلىپ جاتىر
ەلدەگى اۋەجاي ينفراقۇرىلىمىن جاڭارتۋ جۇمىستارى جاڭا ءۇش نىسانمەن شەكتەلمەيدى. اباي وبلىسىنداعى ءۇرجار اۋەجايىنىڭ جولاۋشىلار تەرمينالىن جاڭعىرتۋ دا قولعا الىنعان.
جوسپار بويىنشا تەرمينالدىڭ وتكىزۋ مۇمكىندىگى ساعاتىنا 100 جولاۋشىعا دەيىن ۇلعايتىلماق. ءۇرجار تۋريستەر كوپ باراتىن الاكولگە قاتىنايتىن نەگىزگى باعىتتاردىڭ ءبىرى بولعاندىقتان، اۋەجاي ينفراقۇرىلىمىن جاڭارتۋ وڭىرگە كەلەتىن جولاۋشىلارعا قىزمەت كورسەتۋ مۇمكىندىگىن ارتتىرۋعا باعىتتالعان.
اۋەجايلار نە ءۇشىن سالىنىپ جاتىر؟
زايسان، قاتونقاراعاي جانە كەندىرلىدەگى جوبالاردىڭ ورتاق ەرەكشەلىگى - ۇشەۋى دە تۋريستىك الەۋەتى بار وڭىرلەردە جۇزەگە اسىرىلىپ جاتىر.
كەندىرلى كاسپي جاعالاۋىنداعى تۋريزمدى دامىتۋعا باعىتتالسا، قاتونقاراعاي مەن زايسانداعى جاڭا اۋەجايلار شىعىس قازاقستاننىڭ شالعاي تۋريستىك ايماقتارىنا جەتۋدى جەڭىلدەتۋگە مۇمكىندىك بەرەدى.
سونىمەن قاتار جاڭا اۋەجايلاردىڭ حالىقارالىق باعىتتارعا قىزمەت كورسەتۋ مۇمكىندىگى دە قاراستىرىلىپ وتىر. زايسان مەن قاتونقاراعاي بويىنشا قىتاي باعىتتارى، كەندىرلى بويىنشا ازەربايجان، وزبەكستان جانە رەسەي قالالارى اتالعان. ناقتى رەيستەر اۋە كومپانيالارىمەن كەلىسىم جاسالىپ، باعىتتار بەكىتىلگەننەن كەيىن بەلگىلى بولادى.
قۇرىلىس اياقتالعاننان كەيىن جاڭا اۋەجايلاردى پايدالانۋعا بەرۋ جانە سەرتيفيكاتتاۋ جۇمىستارى جۇرگىزىلەدى. ال تۇراقتى رەيستەردىڭ باستالۋ مەرزىمى مەن باعىتتارى اۋە كومپانيالارىمەن كەلىسىلگەننەن كەيىن ناقتىلانادى.