- كولىك-لوگيستيكا الەۋەتىن نىعايتۋ اياسىندا ەلدىڭ ينفراقۇرىلىمىن كەڭەيتۋ نەگىزگى باعىتقا اينالادى. 2027 -جىلدىڭ مامىر ايىندا زايسان، كاتونقاراعاي جانە كەندىرلىدە جاڭا اۋەجايلاردى پايدالانۋعا بەرۋ جوسپارلانعان، ال ماۋسىم ايىندا ءىرى الەمدىك كومپانيانى تارتا وتىرىپ، استانادا اۋەجاي قۇرىلىسى باستالادى. سونىمەن قاتار، 2027 -جىلدىڭ سوڭىنا دەيىن «باقتى - اياگوز» تەمىرجول جەلىسىن پايدالانۋعا بەرۋ جوسپارلانىپ وتىر. بۇل قازاقستاندى ەۋرازياداعى كولىك-لوگيستيكالىق حابقا اينالدىرۋ بويىنشا جۇيەلى جۇمىستىڭ ءبىر بولىگى بولادى، -دەدى سەرىك جۇمانعارين.
ونىڭ ايتۋىنشا، اۆتوكولىك سالاسىندا رەسپۋبليكالىق جانە جەرگىلىكتى ماڭىزى بار جولداردى سالۋ مەن قايتا قۇرۋ جۇمىستارى جالعاسادى، ونىڭ ىشىندە «ارال - كاسپي» جانە «كوكشەتاۋ - پەتروپاۆل» كۇرە جولدارى قاراستىرىلعان.
— بارلىق اۆتوكولىك وتكىزۋ بەكەتتەرىن تولىق قايتا قۇرۋ، سونداي-اق زياتكەرلىك كولىك جۇيەسىن ەنگىزۋ ارقىلى جۇك تاسىمالىن ەلەكتروندىق قۇجاتتارعا كوشىرۋ جۇزەگە اسىرىلادى، - دەدى مينيستر.
بۇعان دەيىن حابارلانعانداي، بۇگىن ۇكىمەت وتىرىسىندا مەملەكەت باسشىسىنىڭ بيىلعى 28-قازانداعى «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارىنىڭ» جوباسى ماقۇلدانىپ، ءتيىستى قاۋلى قابىلداندى.